Isirelibɑ bɑ kɑ Gɑbɑonigibu
ɑrukɑwɑni bɔkuɑ
9
1-2 Sinɑm be bɑ wɑ̃ɑ sɔ̃ɔ duu yeru giɑ, guunun berɑ giɑ kɑ nim wɔ̃ku ge bɑ mɔ̀ Mɛditerɑnɛ giɑ n kɑ dɑ Libɑnin tem berɑ giɑ, bɑ nuɑ mɑ Isirelibɑ bɑ Yerikogibu kɑ Ayigibu kɑmiɑ. Yerɑ bɑ nɔɔ tiɑ kuɑ bu kɑ Isirelibɑ kɑ ben wirugii Yosue wɔrimɑ. Bwese ninin sinɑmbɑ, Hɛtibɑ kɑ Amɔrebɑ kɑ Kɑnɑnibɑ kɑ Feresibɑ kɑ Hefibɑ kɑ Yebusibɑ.
3 Adɑmɑ ye Gɑbɑonigibu be bɑ sɑ̃ɑ Hefibɑ bɑ mɑɑ nuɑ ye Yosue u Yerikogibu kɑ Ayigibu kuɑ, 4-5 yerɑ bɑ swɑɑ kɑsu bu kɑ tii dwe. Mɑ bɑ dĩɑnu kusenu kuɑ bɑ doke sɑɑki tɔkɔnu sɔɔ, mɑ bɑ mɑɑ gɔni bɔɔ tɔkɔnu suɑ mì sɔɔ bɑ rɑ tɑm doke kɑ sere mɑɑ pɛ̃ɛ gbebi yi yi bukusɑ kuɑ, mɑ bɑ ye kpuro ben kɛtɛkunu sɔbi. Mɑ ben tii bɑ yɑ̃ɑ tɔkɔnu kɑ bɑrɑ tɔkɔnu doke. 6 Mɑ bɑ dɑ bɑ Yosue kɑ Isirelibɑ deemɑ Giligɑliɔ bɑ nɛɛ, sɑɑ tontonden diyɑ sɑ wee su kɑ bɛɛ ɑrukɑwɑni bɔke.
7 Mɑ Isirelibɑ bɑ bu wisɑ bɑ nɛɛ, sɔrɔkudo i wɑ̃ɑwɑ bɛsɛn turuku mini, sɑ ǹ kpɛ̃ su kɑ bɛɛ ɑrukɑwɑni bɔke.
8 Mɑ bɑ Yosue wisɑ bɑ nɛɛ, sɑ wurɑ su ko wunɛn sɔm kowobu.
Mɑ Yosue u bu bikiɑ u nɛɛ, mɑn diyɑ i wee. Bwese terɑ̀ i sɑ̃ɑ.
9 Mɑ bɑ nùn wisɑ bɑ nɛɛ, bɛsɛ wunɛn bwɑ̃ɑbu sɑ weewɑ sɑɑ tontonden di yèn sɔ̃ sɑ Gusunɔ wunɛn Yinnin bɑɑru nuɑ kɑ mɑɑmɑɑki ye u kuɑ Egibitiɔ, 10 kɑ nge mɛ u Amɔrebɑn sinɑmbu yiru ye kuɑ, be bɑ wɑ̃ɑ Yuudɛnin sɔ̃ɔ yɑri yeru giɑ. Beyɑ Sihoni, Hɛsibonin sunɔ, kɑ Ogu, Bɑsɑnin sunɔ wi u wɑ̃ɑ Asitɑrɔtuɔ. 11 Ye sɑ mɑɑ seewɑ bɛsɛn wuun bukurobu kɑ be bɑ tie bɑ sun kirɔ kuɑ bɑ nɛɛ, su dĩɑnu kusenu koowo swɑɑn sɔ̃ kpɑ su nɑ su bɛɛ deemɑ su bɛɛ bikiɑ i kɑ sun ɑrukɑwɑni bɔke kpɑ sɑ n bɛɛ sɑ̃ɑmɔ. 12 Bɛɛn tii i wɑ nge mɛ bɛsɛn pɛ̃ɛ ye, yɑ gbere yɑ bukusɑ sɑ̃ɑ. Sɑnɑm mɛ sɑ seewɑ yɛnun di, yɑ sɑ̃ɑwɑ pɛ̃ɛ sumɑ. 13 I mɑɑ bɛsɛn gɔni mɛɛrio yì sɔɔ sɑ tɑm doke. Yi rɑɑ sɑ̃ɑwɑ gɔni kpɛɛ, wee tɛ̃ yi gɛ̃ɛkire. Mɛyɑ mɑɑ bɛsɛn bɑrɑnu kɑ yɑ̃ɑ ni sɑ doke, nu gɛ̃ɛkirɑ swɑɑ sɔɔ gbɑbu ten dɛ̃ɛbun sɔ̃.
14 Adɑmɑ Isirelibɑ bɑ ǹ Yinni Gusunɔ bikie bu nɔ ù n kĩ bu kɑ bu ɑrukɑwɑni bɔke. Mɑ bɑ sibun dĩɑ kuse ni murɑ bɑ di. 15 Mɑ Yosue u kɑ bu nɔɔ tiɑ kuɑ, bɑ ɑrukɑwɑni bɔkuɑ bɑ n kɑ wɑ̃ɑsinɛ ɑlɑfiɑ sɔɔ. Mɑ Isirelibɑn bukurobu bɑ wurɑ kɑ bɔ̃ri mɑ bɑ koo ben ɑrukɑwɑni ye yibiɑ.
16 Yen sɔ̃ɔ itɑserɑ Isirelibɑ bɑ nuɑ mɑ tɔn ben wusu wɑ̃ɑwɑ ben turuku mi. 17 Mɑ bɑ seewɑ bɑ wuu si mɛɛrim dɑ. Bɑ sĩɑwɑ sɔ̃ɔ yiru, itɑse mɑ bɑ turɑ mi. Wuu siyɑ, Gɑbɑoni, kɑ Kefirɑ kɑ Berɔtu kɑ Yɑrimun wuu. 18 Adɑmɑ bɑ ǹ bu go yèn sɔ̃ ben bukurobɑ kɑ bu ɑrukɑwɑni bɔkuɑ kɔ, mɑ bɑ koo bu deri ɑlɑfiɑ sɔɔ. Mɑ bɑ ye bɔ̃ruɑ kɑ Gusunɔ ben Yinnin yĩsiru. Kɑ mɛ, be Isireli be, bɑ kɑ ben bukuro be wɔki. 19 Mɑ bukuro be, bɑ wisɑ bɑ nɛɛ, sɑ ǹ kpɛ̃ su tɔn be nɔni sɔ̃, domi sɑ kɑ bu ɑrukɑwɑni bɔkuɑ kɔ. Sɑ bɔ̃ruɑ kɑ Yinni Gusunɔn yĩsiru mɑ sɑ ǹ bu gɑ̃ɑnu kuɑmmɛ. 20 Tilɑsiwɑ su kɑ bu deri. Mɑ n kun mɛ, sɑ ko Yinni Gusunɔn mɔru seeyɑ. 21 Yen sɔ̃, wee ye sɑ ko bu kuɑ. Bɑ ko n dɑ sun dɑ̃ɑ kɑsuewɑ kpɑ bɑ n dɑ sun nim tɑkirie.
22 Mɑ Yosue u Gɑbɑonigii be kpuro sokusiɑ. Ye bɑ tunumɑ u bu bikiɑ u nɛɛ, mbɑn sɔ̃nɑ i sun weesu kuɑ, i nɛɛ, i weewɑ tontonden di. Mɑ sɑ deemɑ i wɑ̃ɑ bɛsɛn turuku. 23 Tɛ̃ i kuɑ bɔ̃rurobu bɛɛ kpuro. I ko i n sɑ̃ɑwɑ bɛsɛn yobu, kpɑ i n dɑ nim tɑkiri, i dɑ̃ɑ kɑsu bɛsɛn Yinnin sɑ̃ɑ yerun sɔ̃.
24 Mɑ Gɑbɑonigii be, bɑ nɛɛ, wee yèn sɔ̃ sɑ kuɑ mɛ. Sɑ nuɑ mɑ Gusunɔ wunɛn Yinni u win sɔm kowo Mɔwisi woodɑ wɛ̃ u bɛɛ tem mɛ kpuro wɛ̃ kpɑ i mɛn tɔmbu kpuro go be i kɑ gesi yinnɑ kpuro. Yen sɔ̃nɑ sɑ kɑ bɛsɛn wɑ̃ɑru nɑndɑ. 25 Tɛ̃, wee sɑ wɑ̃ɑ wunɛn nɔmuɔ. A kɑ sun koowo nge mɛ n weenɛ.