Yosue 8

Isirelibɑ bɑ Ayigibu kɑmiɑ

¹ Yinni Gusunɔ u Yosue sɔ̃ɔwɑ u nɛɛ, ɑ ku nɑndɑ, ɑ seewo ɑ tɑbu durɔbu kpuro suɑ kpɑ i Ayi wɔri. Domi nɑ bɛɛ yen sunɔ kɑ win tɔmbu kɑ win wuu kɑ gen bɑru kpɑɑnu kpuro nɔmu bɛriɑ. ² Kɑɑ bu kpeerɑsiɑwɑ nge mɛ ɑ Yerikogibu kɑ ben sunɔ kuɑ. Kpɑ i ben ye bɑ mɔ kɑ ben yɑɑ sɑbenu mwɛɛri, ye kpuro yu ko bɛɛgiɑ. Yen sɔ̃, ì n dɑ, bɛɛn gɑbɑ koo kukewɑ wuu gen biruɔ, bɑ n bu yɔɔru bwɛ̃ɛyɛ.

^3-4 Mɑ Yosue u seewɑ u kɑ Ayi wɔri kɑ win tɑbu durɔbu kpuro. Yerɑ be sɔɔ, u nɔrɔbun subɑ tɛnɑ (30.000) gɔsɑ u bu sɔ̃ɔwɑ u nɛɛ, i doo i kuke wuu gen biruɔ wɔ̃kuru, ɑdɑmɑ i kun kɑ bu tomɑ kpɑ i n yɔ̃ mi, i n sɔɔru sɑ̃ɑ. ⁵ Nɛ kɑ mɑɑ tɑbu kowo be bɑ tie, sɑ ko wuu ge susi. Bɑ̀ n sun wɔrim wee, kpɑ su duki gɔsirɑmɑ nge yellu. ⁶ Kpɑ bu sun nɑɑ girɑ. Mɛyɑ sɑ ko kɑ bu yɑrɑ wuun di mɑm mɑm. Domi bɑ koo nɛɛ, sɑ duki mɔ̀wɑ nge mɛ sɑ rɑɑ kuɑ yellu ben wuswɑɑɔ. Kpɑ bu sun nɑɑ swĩi. ⁷ Sɑɑ yerɑ, bɛɛ be i kukuɑ mi, i ko yɑrimɑ i wuu ge wɔri, i gu mwɑ. Yinni Gusunɔwɑ u koo bɛɛ gu nɔmu bɛriɑ. ⁸ Wee, nɑ bɛɛ woodɑ wɛ̃ɛmɔ. Sɑnɑm mɛ i gu mwɑ i kpɑ, i gu dɔ̃ɔ sɔ̃reo, nge mɛ Yinni Gusunɔ u geruɑ.

⁹ Mɑ Yosue u derɑ bɑ dɑ bɑ kukuɑ Ayi kɑ Betɛlin bɑɑ sɔɔ, Ayin sɔ̃ɔ duu yeru giɑ. Adɑmɑ win tii kɑ tɔn be bɑ tie bɑ kpunɑ sɑnsɑniɔ wɔ̃ku te.

¹⁰ Ye n kuɑ buru buru yellu, u seewɑ u win tɑbu kowobu mɛɛrɑ mɛɛrɑ mɑ wi kɑ Isirelibɑn guro gurobu bɑ bu kpɑrɑ bɑ kɑ dɑ Ayi giɑ. ¹¹ Yosue kɑ win tɑbu kowo be, bɑ Ayi susi. Sɑnɑm mɛ bɑ turɑ yen deedeeru, yerɑ bɑ ben sɑnsɑni girɑ sɔ̃ɔ yɛ̃sɑn nɔm geu giɑ. N deemɑ wɔwɑ gɑɑ wɑ̃ɑ be kɑ Ayin bɑɑ sɔɔ. ¹² Yosue u mɑɑ derɑ tɑbu durɔbu nɔrɔbun subɑ nɔɔbu (5.000) yɑ dɑ yɑ kukuɑ Betɛli kɑ Ayin bɑɑ sɔɔ, sɔ̃ɔ duu yeru giɑ. ¹³ Isireli be bɑ tie, bɑ ben sɑnsɑni girɑ sɔ̃ɔ yɛ̃sɑn nɔm geu giɑ. Mɑ ben gɑbɑ mɑɑ dɑ bɑ kukuɑ Ayin sɔ̃ɔ duu yeru giɑ. Adɑmɑ Yosuen tii u dɑ u kpunɑwɑ wɔwɑ yen mi, wɔ̃ku te. ¹⁴ Ye n kuɑ buru buru yellu, yerɑ Ayin sunɔ u Isirelibɑ wɑ. Mɑ wi kɑ win tɑbu kowobu bɑ seewɑ kɑ sɛndɑru bu kɑ Isirelibɑ wɔri Yuudɛnin wɔwɑ mi, mi bɑ rɑɑ bu kɑmiɑ. Adɑmɑ bɑ ǹ yɛ̃ mɑ Isirelibɑn sukum mu kukuɑ wuun biruɔ. ¹⁵ Ye Yosue kɑ win tɔmbu bɑ bu wɑ, yerɑ bɑ bwisi kuɑ bɑ duki yɑkurɑ bɑ swɑɑ mwɑ ye yɑ dɔɔ gbɑburu giɑ. ¹⁶ Mɑ bɑ Ayin tɔn durɔbu kpuro sokɑ. Yerɑ bɑ yɑrɑ bɑ bu nɑɑ girɑ sere mi n tomɑ wuun di. ¹⁷ Tɔn durɔ goo kun mɑɑ tiɑre Ayi kɑ Betɛlin wuu si sɔɔ. Bɑ wuu ge deriwɑ bɑ ǹ kɛnuɑ bɑ Isirelibɑ nɑɑ girɑ. ¹⁸ Mɑ Yinni Gusunɔ u Yosue sɔ̃ɔwɑ u nɛɛ, ɑ wunɛn yɑɑsɑ ye ɑ nɛni mi tĩiyɔ Ayi giɑ, domi kon nun wuu ge nɔmu bɛriɑ.

Mɑ Yosue u win yɑɑsɑ ye tĩi mi. ¹⁹ Sɑɑ yerɑ tɔn be bɑ kukuɑ mi, bɑ yɑrɑ sɑɑ ben kuku yerun di bɑ wuu ge wɔri. Ye bɑ gu mwɑ bɑ kpɑ, mɑ bɑ yɑnde gu dɔ̃ɔ sɔ̃re.

^20-21 Ye Ayigibu bɑ biru sĩirɑ, yerɑ bɑ wɑ wee, dɔ̃ɔ wiirɑ tɑ ben wuu wukiri tɑ wɔllu girɑri. Mɑ bɑ deemɑ bɑ ǹ mɑɑ kpɛ̃ bu gɑm susi bu kɑ tii fɑɑbɑ ko. Sɑɑ yerɑ Yosue kɑ Isireli be bɑ rɑɑ duki mɔ̀ bɑ dɔɔ gbɑburu giɑ mi, bɑ wɑ mɑ begibu bɑ wuu ge dɔ̃ɔ sɔ̃re, yerɑ bɑ gɔsirɑmɑ bɑ Ayigii be wɔri. ²² Sɑnɑm mɛyɑ Isirelin tɑbu kowo be bɑ rɑɑ wuu ge dɔ̃ɔ mɛni mi, bɑ yɑrɑ min di bɑ gen tɑbu kowo be mɑrɑ. Mɑ bɑ bu suunu doke sere bɑ ǹ yɛ̃ mi bɑ koo dɑ. Bɑ bu mwɛɛrɑ bɑ go go kpuro. Ben goo kun bu kisirɑri, ²³ mɑ n kun mɔ ben sunɔ wi bɑ mwɑ wɑsiru bɑ kɑ dɑ Yosuen mi. ²⁴ Ye Isirelibɑ bɑ ben yibɛrɛ be mwɑ bɑ go go gbɑburu mi, mi bɑ bu nɑɑ swĩi, yerɑ bɑ mɑɑ gɔsirɑmɑ Ayiɔ bɑ tɔn be bɑ tie go go. ²⁵ Tɔn be bɑ go dɔmɑ te, kurɔbu kɑ durɔbu, bɑ sɑ̃ɑwɑ nɔrɔbun subɑ wɔkurɑ yiru (12.000). ²⁶ Sɑɑ ye bɑ tɑɑ bi mɔ̀ Yosue u win yɑɑsɑ ye wuu ge tĩiwɑ sere bɑ kɑ gen tɔmbu kpuro go mɑm mɑm. ²⁷ Isirelibɑ bɑ Ayigibun yɑɑ sɑbenu gurɑ kɑ ben ɑrumɑni kpuro, nge mɛ Yinni Gusunɔ u Yosue sɔ̃ɔwɑ. ²⁸ Mɑ Yosue u wuu ge dɔ̃ɔ sɔkɑ mɑ gɑ kuɑ bɑnsu sere kɑ gisɔn gisɔ. ²⁹ Sɑɑ yerɑ u derɑ bɑ Ayin sunɔ wi soorɑ doke bɑ bwɛ̃ bɑ deri sɑɑ bururun di sere sɔ̃ɔ kɑ kpɑ. Yokɑ u derɑ bɑ win goru bwɛ̃ɛyɑ bɑ kɔ̃ wuu gen duu yerɔ. Mɑ bɑ tu kpenu sɛ̃siki. Kpee ni, nu wɑ̃ɑ mi sere kɑ gisɔn gisɔ.

Yosue u Isirelibɑ

Yinni Gusunɔn woodɑ gɑriɑ

guu te bɑ mɔ̀ Ebɑliɔ

³⁰ Yenibɑn biru Yosue u Gusunɔ, Isirelibɑn Yinni yɑ̃ku yeru bɑniɑ guu te bɑ mɔ̀ Ebɑlin wɔllɔ. ³¹ U yɑ̃ku yee te bɑnɑwɑ nge mɛ Mɔwisi, Yinni Gusunɔn sɔm kowo u Isirelibɑ sɔ̃ɔwɑ ye u yoruɑ woodɑbɑn tireru sɔɔ. U nɛɛ, bu Yinni Gusunɔ yɑ̃ku yeru kuo kɑ kpee ni bɑ ǹ dɑ̃ke. Ye bɑ tu bɑnɑ bɑ kpɑ mɑ bɑ yɑ̃ku dɔ̃ɔ mwɑɑrɑruginu kɑ siɑrɑbun yɑ̃kunu kuɑ mi. ³² Isirelibɑ kpuron wuswɑɑɔ Yosue u wure u woodɑ yoruɑ ye Mɔwisi u rɑɑ yoruɑ. ³³ Isirelibɑ kpuro kɑ ben wirugibu kɑ ben siri kowobu kɑ ben guro gurobu kɑ sere be bɑ sɑ̃ɑ sɔbu kpuro bɑ yɔ̃ bɑ kɑ Yinni Gusunɔn woodɑn kpɑkoro te dɛsire. Ben gɑbu bɑ yɔ̃ guu te bɑ mɔ̀ Gɑrisimun berɑ giɑ, gɑbu mɑɑ guu te bɑ mɔ̀ Ebɑlin berɑ giɑ. Mɑ be kpuro bɑ yɑ̃ku kowobu Lefi be bɑ woodɑn kpɑkoro te sɔɔwɑ wuswɑɑ kisi. Domi mɛyɑ Mɔwisi u bu sɔ̃ɔwɑ bu ko sɑɑ ye bɑ koo bu domɑru kuɑ. ³⁴ Yen biru Yosue u bu woodɑ ye gɑriɑ sere kɑ ye yɑ bɔ̃ri kɑ domɑrun gɑri mɔ̀, nge mɛ Mɔwisi u yoruɑ yen tireru sɔɔ. ³⁵ Ye kpurowɑ u gɑrɑ Isirelibɑn wuswɑɑɔ, tɔn durɔbu kɑ tɔn kurɔbu kɑ bibu kɑ sere mɑɑ sɔbu be bɑ wɑ̃ɑ ben suunu sɔɔ. Bɑɑ yen tiɑ, u ǹ bure.