Dibun kɑrɑbu wɔ̃ɔ nɔɔbɑ yiru
kɑ wɔ̃ɔ nɔɔbɑ yiru
15
1 I ko i n dɑ be bɑ bɛɛn dibu nɛni kɑrewɑ wɔ̃ɔ nɔɔbɑ yiru kɑ wɔ̃ɔ nɔɔbɑ yiru. 2 Wee nge mɛ i ko i kɑ woodɑ ye sɔmburu koosinɑ. Sɑnɑm mɛ bɑ dibu kɑrɑbun gɑri kpɑrɑ Yinni Gusunɔn sɔ̃, n weenɛwɑ be bɑ ben winsim gobi bɔkurɑ bu yɛ̃robu dii bi kɑrɑ, kpɑ bu ku mɑɑ bu gɑ̃ɑnu bikiɑ. 3 I ko i kpĩ i sɔbu bɑɑsi bu kɑ bɛɛ bɛɛn dibu kɔsiɑ, ɑdɑmɑ i ko i bɛɛn mɛro bisibu kɑrɑwɑ.
4-5 Ì n gesi Gusunɔ bɛsɛn Yinnin nɔɔ nuɑ, i win woodɑbɑ mɛm nɔɔwɑ mɑm mɑm be nɑ bɛɛ wɛ̃ɛmɔ gisɔ, u koo bɛɛ domɑru kuɑ tem mɛ u koo bɛɛ wɛ̃ sɔɔ kpɑ sɑ̃ɑro u kun wɑ̃ɑ bɛɛ sɔɔ. 6 U koo bɛɛ domɑru kuɑ nge mɛ u bɛɛ nɔɔ mwɛɛru kuɑ. I ko i bwese tuku dɑbinu gobi bɔkurɑ, ɑdɑmɑ bɛɛ, i#ǹ ko i n gobi bɔkurɑbun bukɑtɑ mɔ. I ko i bwese tuku dɑbinu kerɑ, ɑdɑmɑ nu#ǹ kpɛ̃ nu bɛɛ kerɑ.
7 Kɑ mɛ, bɛɛn goo ù n sɑ̃ɑ sɑ̃ɑro tem mɛ Gusunɔ bɛɛn Yinni u koo bɛɛ wɛ̃n wuu gɑgu sɔɔ, i ku rɑ gɔbiɑ i yinɑ i nùn gobi bɔkurɑ. 8 I ko i nùn bɔkurɑwɑ kɑ nuku tiɑ yìn bukɑtɑ u mɔ. 9 I lɑɑkɑri ko, kpɑ i ku rɑ nuku kɔ̃su bwisikunu ko i nɛɛ, wɔ̃ɔ nɔɔbɑ yiruse wee yɑ turuku koomɑ yè sɔɔ bɑ rɑ dibugibu kɑre, kpɑ i sɛ̃siɑ i yinɑ i nùn bɔkurɑ. Ì n kuɑ mɛ, u koo Yinni Gusunɔ nɔɔgiru sue bɛɛn sɔ̃, kpɑ i yen tɑɑrɛn ɑre sɔbe. 10 I nùn bɔkuro kɑ nuku tiɑ. Ì n kuɑ mɛ, Gusunɔ bɛsɛn Yinni u koo bɛɛn sɔmɑ kpuro domɑru kuɑ ye i mɔ̀. 11 Sɑ̃ɑrobu bɑ ko n wɑ̃ɑwɑ tem mɛ sɔɔ sɑɑ kpuro. Yen sɔ̃nɑ nɑ bɛɛ woodɑ yeni wɛ̃ nɑ nɛɛ, i de i n sɑ̃ɑ nuku tiɑgibu bɛɛn mɛro bisi be bɑ sɑ̃ɑ sɑ̃ɑrobu kɑ wɔnwɔndobu sɔɔ.
Yobun kɑrɑbu
12 Bɛɛn Heberusi goo, tɔn durɔ ǹ kun mɛ tɔn kurɔ ù n tii bɛɛ dɔre, u koo bɛɛ sɔmburu kuɑwɑ wɔ̃ɔ nɔɔbɑ tiɑ. Wɔ̃ɔ nɔɔbɑ yiruse i ko i nùn kɑrɑwɑ u doonɑ. 13 Ì n nùn kɑrɑmɔ, i ku de u doonɑ nɔm dirɑ. 14 I ko i nùn kɛ̃ru wɛ̃wɑ bɛɛn yɑɑ sɑbenu sɔɔ kɑ bɛɛn ɑlikɑmɑ sɔɔ kɑ tɑm sɔɔ, kpuro sɔɔ gesi ye Gusunɔ bɛsɛn Yinni u koo bɛɛ domɑru kuɑ. 15 I yɑɑyo mɑ i rɑɑ yoru di Egibitiɔ, mɑ Gusunɔ bɛsɛn Yinni u bɛɛ yɑkiɑ. Yen sɔ̃nɑ nɑ bɛɛ woodɑ yeni wɛ̃ɛmɔ gisɔ.
16 Bɛɛn yoo goo ù n nɛɛ, u#ǹ yɑriɔ bɛɛn min di yèn sɔ̃ u bɛɛ kɑ bɛɛn yɛnugibu kĩ, u mɑɑ dobu nɔɔmɔ bɛɛn mi, 17 sɑɑ ye sɔɔ, u koo gɑmbo gbɑlliwɑ kpɑ i sɔkurɑ suɑ i kɑ win swɑɑ yɑbɑ kpɑ u ko bɛɛn yoo sere kɑ bɑɑdommɑɔ. Nge mɛyɑ i ko i mɑɑ yoo tɔn kurɔn tii kuɑ.
18 I ku rɑ de n bɛɛ sɛ̃sie i kɑ yoo kɑrɑ u doonɑ bɛɛn min di yèn sɔ̃ sɔmbu te u bɛɛ kuɑ wɔ̃ɔ nɔɔbɑ tiɑ sɔɔ tɑ bɛɛ sɔm kowo wi i kɔsiɑmɔn ɑren nɔn yiru wɛ̃, kpɑ Gusunɔ bɛɛn Yinni u bɛɛ domɑru kuɑ ye i mɔ̀ kpuro sɔɔ.
Yɑɑ sɑbenun bii gbiikinu
19 I ko i bɛɛn nɛɛ kɑ bɛɛn yɑ̃ɑnu kɑ bɛɛn bonun bii gbiikii dwɑnu Gusunɔ bɛsɛn Yinni yiiyewɑ. I ku rɑ kɑ bɛɛn nɛɛn bii gbiikinu sɔmburu ko, i ku rɑ mɑɑ bɛɛn yɑ̃ɑnun bii gbiikinun sɑnsu bɔɔri. 20 I ko i n dɑ nin yɑɑ temwɑ bɛɛ kɑ bɛɛn yɛnugibu wɔ̃ɔ bɑɑgere Gusunɔ bɛsɛn Yinnin sɑ̃ɑ yerɔ te u gɔsɑ. 21 Yɑɑ sɑbe nin gɑru tɑ̀ n nɑɑsu bɑrɔ ǹ kun mɛ tɑ̀ n wɔ̃ko sɑ̃ɑ ǹ kun mɛ tɑ̀ n ɑlebu gɑɑ mɔ, i ku rɑ kɑ tu Gusunɔ bɛɛn Yinni yɑ̃kuru kuɑ. 22 I ko i ten yɑɑ temwɑ yɛnuɔ. Wi u dɛɛre kɑ wi u#ǹ dɛɛre, be kpurowɑ bɑ koo ye tem nge mɛ bɑ rɑ nɛmu kɑ ginɑ tem. 23 Adɑmɑ i ku rɑ yen yɛm di. I ko i mu yɑriwɑ temɔ nge nim.