13
1 I ko i woodɑ be kpuro mɛm nɔɔwɑwɑ be nɑ bɛɛ wɛ̃ mi. I ku rɑ gɑ̃ɑnu gɑnu sosi, i ku rɑ mɑɑ gɑ̃ɑnu gɑnu kɑwɑ be sɔɔ.
Bɑ koo Isireli
be bɑ bũnu sɑ̃ɑmɔ sɛɛyɑsiɑ
2 Bɛɛn suunu sɔɔ, Gusunɔn sɔmɔ goo ǹ kun mɛ yɑm wɑo goo ù n bɛɛ mɑɑmɑɑkin gɑri sɔ̃ɔwɑ, 3 mɑ ye yɛ̃ro u bɛɛ sɔ̃ɔwɑ mi, yɑ koorɑ, mɑ u bɛɛ sɔ̃ɔwɑ u nɛɛ, i dɑ i bũnu sɑ̃ ni i#ǹ dɑɑ yɛ̃, 4 i ku rɑ win gɑri nɔ. Domi Gusunɔ bɛsɛn Yinniwɑ u bɛɛn lɑɑkɑri mɛɛrimɔ u kɑ wɑ ì n nùn kĩn nɑ kɑ bɛɛn gɔ̃ru kpuro kɑ bɛɛn bwɛ̃rɑ kpuro. 5 Gusunɔ bɛsɛn Yinni turowɑ i ko i kɑsu kpɑ i nùn nɑsiɑ. I win woodɑbɑ nɔni dokeo, i nùn mɛm nɔɔwɑ, kpɑ i nùn sɑ̃ kpɑ i n kɑ nùn mɑninɛ. 6 I ko sɔmɔ wi, ǹ kun mɛ yɑm wɑo wi gowɑ wi u bɛɛ bɔriɑmɔ i kɑ Gusunɔ bɛsɛn Yinni deri wi u sun yɑrɑmɑ Egibitin di mi sɑ yoru di. I ko yɛ̃ro gowɑ yèn sɔ̃ u kĩ u bɛɛ gɛrɑsiɑ Gusunɔ bɛsɛn Yinnin swɑɑn di, ye u sun sɔ̃ɔwɑ su swĩi. Nge mɛyɑ i ko i kɑ kɔ̃sɑ kpeerɑsiɑ bɛɛn suunu sɔɔn di.
7-8 Bwese tukunu nu ko n bɛɛ sikerenɛ, gɑnu nu n wɑ̃ɑ turuku kpɑ gɑnu nu n wɑ̃ɑ n tomɑ hɑnduniɑn goonu nnɛ kpuro sɔɔ, nu n bũnu sɑ̃ɑmɔ ni bɛɛ kɑ bɛɛn bɑɑbɑbɑ i#ǹ dɑɑ yɛ̃. Sɔrɔkudo bɛɛn mɔɔ ǹ kun mɛ bɛɛn wɔnɔ ǹ kun mɛ bɛɛn bii tɔn durɔ ǹ kun mɛ tɔn kurɔ ǹ kun mɛ bɛɛn kurɔ ǹ kun mɛ bɛɛn bɔrɔ kĩnɑsi goo u koo bɛɛ kɔkiri ɑsiri sɔɔ u nɛɛ, i dɑ i bũu ni sɑ̃. 9 I ku rɑ yɛ̃ro swɑɑ dɑki i win gɑri gem mwɑ. I ku rɑ mɑɑ win wɔnwɔndu ko i sere nùn biru wukiri. 10 Adɑmɑ i ko i nùn gowɑ. Wunɛ wi u kɔkurɑ, wunɑ kɑɑ gbi ɑ nùn kpenu kɑsukum tore ɑ kɑ go, tɔn be bɑ tie bu sere nun swĩi. 11 I ko i nùn kpenu kɑsuku i gowɑ yèn sɔ̃ u kɑsu u bɛɛ gɛrɑsiɑ Gusunɔ bɛsɛn Yinnin swɑɑn di wi u sun yɑrɑmɑ Egibitin di mi sɑ yoru di. 12 Mɛyɑ n ko n sɑ̃ɑ kpɑ bɛɛ Isirelibɑ kpuro i nɔ, kpɑ i bɛrum soorɑ i ku mɑɑ kɑ kɔ̃sɑ yen bweseru ko bɛɛn suunu sɔɔ.
13-14 Sɔrɔkudo wuu si Gusunɔ u bɛɛ wɛ̃n teu sɔɔ, tɔn kɔ̃sobu gɑbu bɑ koo wuugibu kɔkiri bu nɛɛ, bu dɑ bu bũnu sɑ̃ ni, ni i#ǹ dɑɑ yɛ̃. Ì n nuɑ mɛ, 15 i ko i gɑri yin kɑso kowɑ i yi wɛ̃ɛri kpɑ i yi bikikiɑ kɑ lɑɑkɑri i wɑ bɑ̀ n kɔ̃sɑ ye kuɑn nɑ kɑ gem. 16 Bɑ̀ n ye kuɑn nɑ, sɑɑ yerɑ i ko wuu gen tɔmbu kpuro go kɑ ben yɑɑ sɑbenu kpɑ i wuu gen tii kpeerɑsiɑ kɑ ye yɑ wɑ̃ɑ ge sɔɔ. 17 I ko i wuu gen ɑrumɑni kpuro mɛnnɑwɑ gen yɑɑrɑɔ mi bɑ rɑ mɛnnɛ, kpɑ i wuu ge kɑ ɑrumɑni ye kpuro dɔ̃ɔ mɛni muku muku. Yɑ ko n sɑ̃ɑwɑ nge yɑ̃ku dɔ̃ɔ mwɑɑrɑrugiru te i Gusunɔ bɛɛn Yinni kuɑ. Wuu ge, gɑ ko n sɑ̃ɑwɑ bɑnsu sere kɑ bɑɑdommɑɔ. Bɑ#ǹ mɑɑ su seeyɑmɔ. 18-19 I ku rɑ mɑɑ tii gɑ̃ɑnu yiiyɑ ɑrumɑni ye sɔɔ. Yɑ ko n sɑ̃ɑwɑ Gusunɔ bɛsɛn Yinnigiɑ, kpɑ win mɔru yu wɑ yu sure. Ì n win nɔɔ nuɑ mɑ i win woodɑbɑ kpuro mɛm nɔɔwɑ be nɑ bɛɛ wɛ̃ɛmɔ gisɔ, kpɑ i n mɔ̀ ye yɑ wɑ̃ win nɔni sɔɔ, u koo bɛɛ wɔnwɔndu kɑ durom kuɑ, kpɑ i dɑbiɑ nge mɛ u bɛsɛn bɑɑbɑbɑ yen nɔɔ mwɛɛru kuɑ kɑ bɔ̃ri.