Bɑ Ogu, Bɑsɑnin sinɑ bokon
tem mwɑ
3
1 Yen biru, sɑ tem tureru yɔɔwɑ sɑ dɑ Bɑsɑniɔ. Mɑ Ogu, Bɑsɑnin sinɑ boko kɑ win tɑbu kowobu bɑ nɑ bɑ sun tɑbu wɔri Edɛɛɔ. 2 Mɑ Yinni Gusunɔ u mɑn sɔ̃ɔwɑ u nɛɛ, su ku Ogu win bɛrum ko domi u koo sun nùn nɔmu bɛriɑ, wi kɑ win tɑbu kowobu kɑ win tem kpuro. Sɑ ko nùn kuɑwɑ nge mɛ sɑ Sihoni, Amɔrebɑn sinɑ boko kuɑ, wi u wɑ̃ɑ Hɛsiboniɔ. 3 Mɑ Gusunɔ bɛsɛn Yinni u sun Ogu, Bɑsɑnin sinɑ boko nɔmu bɛriɑ kɑ win tɑbu kowobu kpuro. Sɑ bu kɑmiɑ sɑ kpeerɑsiɑ, bɑɑ tɔn turo sɑ#ǹ deri. 4 Sɑ win wusu kpuro mwɛɛrɑ, bɑɑ teu gɑ#ǹ kpĩɑ gu sun mɑ. Siyɑ wusu wɑtɑ ye yɑ wɑ̃ɑ Aɑgɔbun temɔ Bɑsɑniɔ. Ogun temɑ sere mi. 5 Wuu si kpuro su gbɑ̃rɑnu mɔwɑ ni nu gunu, mɑ bɑ nu gɑmbo sisugii kuɑ bɑ rɑ kɑ kɛnɛ. Wusu mɑɑ wɑ̃ɑ su dɑbi mi, si bɑ#ǹ gbɑ̃rɑnu toosi. 6 Sɑ si kpuro mwɛɛrɑ mɑ sɑ tɔn durɔbu kɑ tɔn kurɔbu kɑ bibu kpuro kpeerɑsiɑ nge mɛ sɑ Sihoni, Hɛsibonin sinɑ boko kuɑ. 7 Mɑ sɑ wuu sin yɑɑ sɑbenu kɑ sin ɑrumɑni gurɑ sɑ tii yiiyɑ.
Bɑ Gɑlɑdin tem bɔnu kuɑ
8 Nge mɛyɑ sɑ kɑ Amɔrebɑn sinɑmbu yiru yen tem mwɑ Yuudɛnin sɔ̃ɔ yɑri yeru giɑ sɑɑ Aɑnɔɔn dɑɑrun di n kɑ dɑ Hɛɛmɔɔn guurɔ. 9 Sidonigibu bɑ rɑ Hɛɛmɔɔn guu te sokuwɑ Sirioni, kpɑ Amɔrebɑ bu mɑɑ tu soku Seniri. 10 Sɑ Bɑsɑnin sinɑ boko Ogun wusu kpuro tɑbu di. Siyɑ wuu si su wɑ̃ɑ gunguru wɔllɔ kɑ Gɑlɑdin temɔ kɑ Bɑsɑnin tem mɛ kpuro sɔɔ n kɑ girɑri Sɑlikɑɔ kɑ Edɛɛɔ. 11 N deemɑ Refɑbɑn bweseru sɔɔ, Ogu, Bɑsɑnin sinɑ boko, wi turowɑ u rɑɑ tie. Kpɑkoro sisugiru sɔɔrɑ bɑ win goru doke. Kpɑkoro te, tɑ wɑ̃ɑ Amɔnibɑn wuu mɑro Rɑbɑɔ. Ten dɛ̃ɛbu sɑ̃ɑwɑ gɔm soonu nɔɔbɑ nnɛ. Mɑ ten yɑsum sɑ̃ɑ gɔm soonu nnɛ.
12 Sɑɑ ye sɔɔrɑ nɑ Rubɛnin bweseru kɑ Gɑdin bweseru tem mɛ wɛ̃ mɛ mu wɑ̃ɑ Aɑnɔɔn berɑ giɑ Aroɛɛn sɔ̃ɔ yɛ̃sɑn nɔm geu giɑ kɑ wuu si su wɑ̃ɑ Gɑlɑdin guunun bee tiɑ. 13 Mɑ nɑ Mɑnɑsen bweserun bɔnu Gɑlɑdin tem sukum mɛ mu tie wɛ̃ kɑ Bɑsɑnin tem mi Ogu u rɑɑ bɑndu dii. N deemɑ Aɑgɔbun tem kɑ Bɑsɑnin tem mɛyɑ bɑ rɑ mɑɑ soku Refɑbɑn tem. 14 Yɑiri, Mɑnɑsen bii, u Aɑgɔbun tem kpuro mwɑ n kɑ dɑ Gesuribɑ kɑ Mɑɑkɑtigibun tem nɔɔ burɑ yerɔ. Mɑ u wuu si su wɑ̃ɑ tem mɛ sɔɔ sokɑ Yɑirin wusu nge mɛ bɑ su sokumɔ sere kɑ gisɔn gisɔ. 15 Mɑ nɑ Mɑkiri Gɑlɑdin tem wɛ̃. 16 Mɑ nɑ Rubɛnin bweseru kɑ Gɑdin bweseru Gɑlɑdin tem bee tiɑ wɛ̃ n kɑ dɑ Aɑnɔɔn dɑɑrɔ sere kɑ Yɑbɔkun dɑɑrɔ. Aɑnɔɔn dɑɑrɑ tɑ sɑ̃ɑ tem mɛn nɔɔ burɑ yeru sɔ̃ɔ yɛ̃sɑn nɔm dwɑru giɑ, mɑ Yɑbɔkun dɑɑru tɑ mɑɑ bu burɑnɛ kɑ Amɔnibɑ. 17 Ben tem mɛyɑ mu wɑ̃ɑ Yuudɛnin wɔwɑɔ, sɑɑ Genɛsɑrɛtin dɑɑ burerun di n kɑ dɑ nim wɔ̃ku bɔruguuɔ. Mɑ mu dɑ sere kɑ Pisigɑn guurɔ sɔ̃ɔ yɑri yeru giɑ.
18 Sɑɑ ye sɔɔ, mɑ nɑ bɛɛ woodɑ yeni wɛ̃ nɑ nɛɛ, tɛ̃, wee Gusunɔ bɛsɛn Yinni u bɛɛ tem mɛ wɛ̃ i n mɔ. Tɛ̃, bɛɛ tɑbu kowobu kpuro, i bɛɛn tɑbu yɑ̃nu suo kpɑ i Yuudɛni tɔburɑ kɑ bɛɛgibu Isirelibɑ sɑnnu. 19 Bɛɛn kurɔbu kɑ bɛɛn bibu kɑ bɛɛn yɑɑ sɑbe ni tɔnɑwɑ i ko i deri wuu si nɑ bɛɛ wɛ̃ sɔɔ. 20 I bɛɛn mɛro bisibu somiɔ sere Gusunɔ bɛsɛn Yinni u kɑ bu swĩi ben temɔ nge mɛ u bɛɛ kuɑ, kpɑ bu sinɑ tem mɛ sɔɔ mɛ u koo bu wɛ̃ Yuudɛnin sɔ̃ɔ kpee yeru giɑ. Sɑɑ ye sɔɔrɑ i ko i wurɑ bɛɛn temɔ mɛ nɑ bɛɛ wɛ̃.
21 Mɑ nɑ Yosue woodɑ yeni wɛ̃ nɑ nɛɛ, win nɔni yi wɑ ye Gusunɔ bɛsɛn Yinni u sinɑmbu yiru ye kuɑ. Nge mɛyɑ u koo mɑɑ sinɑmbu kpuro kuɑ be u koo kɑ tɑbu ko sɑnɑm mɛ i Yuudɛni tɔburɑ. 22 I ku bu nɑsiɑ, domi Gusunɔ bɛsɛn Yinni u koo bɛɛ sɑnnɑ.
Mɔwisi u#ǹ duɔ
Kɑnɑnin temɔ
23 Sɑɑ ye sɔɔ, nɑ Yinni Gusunɔ suuru kɑnɑ nɑ nɛɛ, 24 Gusunɔ nɛn Yinni, ɑ nɛ wunɛn sɔm kowo wunɛn kpɑ̃ɑru kɑ wunɛn dɑm bɑkɑm kookoo gbiikisu sɔ̃ɔsi. Yinni goo sɑri wɔllɔ kɑ temɔ wi u koo kpĩ u ko ye ɑ rɑ ko. 25 A de n Yuudɛni tɔburɑ kpɑ n tem burɑm mɛ wɑ guru giɔ mi guu burɑnu wɑ̃ɑ kɑ mɑɑ Libɑni.
26 Adɑmɑ Yinni Gusunɔ u kɑ mɑn mɔru kuɑ bɛɛn sɔ̃ mɑ u yinɑ u nɛn kɑnɑru nɔ. U nɛɛ, yɑ turɑ mɛ. N ku mɑɑ nùn yen gɑri sɔ̃. 27 U nɛɛ, n yɔɔwo Pisigɑn guurun wii kpiirɔ kpɑ n nɔni seeyɑ n mɛɛri sɔ̃ɔ yɛ̃sɑn nɔm geu giɑ kɑ sɔ̃ɔ yɛ̃sɑn nɔm dwɑru giɑ kɑ sɔ̃ɔ kpee yeru giɑ kɑ sere mɑɑ sɔ̃ɔ yɑri yeru giɑ. Adɑmɑ nɑ#ǹ Yuudɛni tɔburɑmɔ. 28 U nɛɛ, n Yosue bwisi kɛ̃ɛyɔ kpɑ n nùn dɑm kɛ̃, n de u n wɔrugɔru mɔ. Domi wiyɑ u koo Yuudɛni tɔburɑ kpɑ u Isirelibɑ kpɑrɑ u kɑ bu tem mɛ wɛ̃ mɛ kon wɑ mi.
29 Mɑ sɑ sinɑ wɔwɑ mi, Bɛti Peorin deedeeru.