Kɑnɑnin tem nɔɔ burɑ yenu
34
1 Yinni Gusunɔ u kɑ Mɔwisi gɑri kuɑ u nɛɛ, 2 ɑ Isirelibɑ sɔ̃ɔwɔ ɑ nɛɛ, bɑ̀ n duɑ Kɑnɑnin temɔ, mɛ mu koo ko begim, mɛn nɔɔ burɑ yenu wee. 3 Sɔ̃ɔ yɛ̃sɑn nɔm dwɑru giɑ mu koo nɔɔ yɔ̃rɑwɑ berɑ mi bɑ mɔ̀ Siniɔ mi tem mu sɑɑrɑm sɑ̃ɑ kpɑ gu mɑɑ dɑ Mɔɑbun tem bɔkuɔ. Nɔɔ ge, gɑ koo torewɑ nim wɔ̃ku bɔruguun bɔkuɔ, sɔ̃ɔ yɑri yeru giɑ. 4 Min di, kpɑ gu fukɑ gu dɑ Akɑrɑbimun guunu giɑ sɔ̃ɔ yɛ̃sɑn nɔm dwɑrɔ kpɑ gu berɑ mi bɑ mɔ̀ Sinin sukum sɑrɑ sere kɑ Kɑdɛsi Bɑɑnɛɑɔ, n kɑ dɑ Hɑsɑɑ Adɑriɔ sere kɑ Asimɔɔwɔ. 5 Sɑɑ Asimɔɔn di kpɑ gu mɑɑ dɑ Egibitin dɑɑ torɑ gɑɑn mi kpɑ gu dɑ gu yɔ̃rɑ nim wɔ̃kuɔ ge bɑ mɔ̀ Mɛditerɑnɛ. 6 Sɔ̃ɔ kpee yeru giɑ mɛn nɔɔ gɑ koo yɔ̃rɑwɑ nim wɔ̃ku teu gen mi. 7 Sɔ̃ɔ yɛ̃sɑn nɔm geu giɑ bɑ koo tem mɛn nɔɔ suɑwɑ sɑɑ nim wɔ̃ku gen min di n kɑ dɑ Horin guurɔ. 8 Min di, bɑ koo de gu kpewɑ kɑ Hɑmɑtiɔ n kɑ nɑ Sedɑdiɔ. 9 Kpɑ gu doonɑ min di gu dɑ Siforoniɔ kpɑ gu dɑ gu yɔ̃rɑ Hɑsɑɑ Enɑniɔ. Miyɑ n ko n sɑ̃ɑ bɛɛn tem nɔɔ burɑ yeru sɔ̃ɔ yɛ̃sɑn nɔm geu giɑ. 10 Sɔ̃ɔ yɑri yeru giɑ mɑɑ, mɛn nɔɔ burɑ yerɑ koo torewɑ sɑɑ Hɑsɑɑ Enɑnin di kpɑ tu dɑ Sefɑmuɔ. 11 Sɑɑ Sefɑmun di kpɑ tu dɑ Ribilɑn berɑ giɑ Ainin sɔ̃ɔ yɑri yeru giɑ kpɑ tu Kinɛrɛtin dɑɑ burerun gooru bɛwɑ. 12 Sɑɑ min di, kpɑ tu dɑ Yuudɛnin berɑ giɑ kpɑ tu dɑ tu yɔ̃rɑ nim wɔ̃ku bɔruguuɔ. Mi n ko n sɑ̃ɑ bɛɛn tem nɔɔ burɑ yeru miyɑ mi.
13 Ye Mɔwisi u Isirelibɑ gɑri yi sɔ̃ɔwɑ mɑ u mɑɑ nɛɛ, tem mɛyɑ mi, mɛ Yinni Gusunɔ u himbɑ kuɑ u bɛɛ bwese kɛri nɔɔbɑ nnɛ kɑ bɔnu wɛ̃ i bɔnu ko kɑ tɛtɛ. 14-15 Bwese kɛri yiru kɑ bɔnu yeni, Rubɛnigiru kɑ Gɑdigiru kɑ Mɑnɑsegirun bɔnu, bɑ ben tem mwɑ kɔ Yuudɛnin berɑ gee, Yerikon deedeeru, sɔ̃ɔ yɑri yeru giɑ.
Wirugii be Gusunɔ u gɔsɑ
bu kɑ tem mɛ bɔnu ko
16 Yinni Gusunɔ u Mɔwisi sɔ̃ɔwɑ u nɛɛ, 17 yɑ̃ku kowo Eleɑsɑɑ kɑ Yosue Nunin bii, beyɑ bɑ koo tem mɛn bɔnu kobun wunɑnɔsu ko, 18 kpɑ ɑ ben bwese kɛrɑ bɑɑyeren di wirugii turo wunɑ u rɑɑ bu somi. 19 Be bɑ koo bu somi, beyɑKɑlɛbu, Yɛfunɛn bii, Yudɑn bweseru sɔɔ. 20 Kɑ Sɑmuɛli, Amihudun bii, Simɛɔn bweseru sɔɔ, 21 kɑ Ɛlidɑdi, Kisilonin bii, Bɛnyɑmɛɛn bweseru sɔɔ, 22 kɑ Buki, Yogilin bii, Dɑnun bweseru sɔɔ, 23-24 kɑ Hɑniɛli, Efodun bii, Mɑnɑsen bweseru sɔɔ kɑ Kemuɛli, Sifitɑnin bii, Efɑrɑimun bweseru sɔɔ. N deemɑ Mɑnɑse kɑ Efɑrɑimun bwesenu nu sɑ̃ɑwɑ Yosɛfun bwese kɛri. 25 Kɑ Elisɑfɑni, Pɑɑnɑkin bii, Sɑbulonin bweseru sɔɔ, 26 kɑ Pɑtiɛli, Asɑnin bii, Isɑkɑrin bweseru sɔɔ, 27 kɑ Ahihudu, Selɔmin bii, Asɛɛn bweseru sɔɔ, 28 kɑ Pedɑhɛli, Amihudun bii, Nɛfitɑlin bweseru sɔɔ.
29 Be Yinni Gusunɔ u gɔsɑ bu kɑ Isirelibɑn bwese kɛri Kɑnɑnin tem mɛ bɔnu kuɑ, berɑ mi.