Wuu si bɑ Lefibɑ wɛ̃
35
1 Yinni Gusunɔ u kɑ Mɔwisi gɑri kuɑ Mɔɑbun wɔwɑɔ, Yuudɛnin bɔkuɔ, Yerikon deedeeru u nɛɛ, 2 ɑ Isirelibɑ sɔ̃ɔwɔ bu wusu gɔsi ben tem sɔɔ bu Lefibɑ wɛ̃ mi bɑ ko n wɑ̃ɑ kɑ sere mɑɑ kpɑrɑ yenu. 3 Lefibɑ bɑ koo sinɑwɑ wuu mɑrosu sɔɔ, kpɑ bɑ n tem mɔ mi bɑ ko n dɑ ben yɑɑ sɑbenu kpɑre. 4 Kpɑrɑ yee ni i ko i bu wɛ̃ mi, nin yɑsum mu ko n sɑ̃ɑwɑ gɔm soonu nɔrɔbu (1.000) sɑɑ gbɑ̃rɑrun beri berikɑn di, 5 kpɑ nin dɛ̃ɛbu bu n sɑ̃ɑ gɔm soonu nɔrɔbun subɑ yiru (2.000) sɔ̃ɔ yɑri yeru giɑ, kɑ sɔ̃ɔ duu yeru giɑ, kɑ sɔ̃ɔ yɛ̃sɑn nɔm dwɑru giɑ, kɑ mɑɑ nɔm geu giɑ, kpɑ wuu gɑ n wɑ̃ɑ suunu sɔɔ. Nge mɛyɑ ben kpɑrɑ yee ni, nu ko n sɑ̃ɑ wuu bɑɑgere sɔɔ. 6 Bɑ koo bu wusu nɔɔbɑ tiɑ wɛ̃ mi wi u tɔnu go u ko n dɑ kpikiru de, kɑ mɑɑ wusu gɑsu weeru kɑ yiru. 7 Wuu si kpuro su ko n sɑ̃ɑwɑ weeru kɑ nɔɔbɑ itɑ, kɑ sin kpɑrɑ yenu. 8 Isirelibɑn bwese kɛrɑ bɑɑyere yɑ koo Lefibɑ wusu wɛ̃wɑ nge mɛ yen tem mu kpɑ̃ɑru nɛ. Be bɑ dɑbi bɑ koo wɛ̃wɑ n dɑbi. Be bɑ#ǹ mɑɑ dɑbi, kpɑ bu wɛ̃ fiiko.
Wuu sìn mi
bɑ ko n dɑ kpikiru de
9 Yinni Gusunɔ u Mɔwisi sɔ̃ɔwɑ u nɛɛ, 10 ɑ Isirelibɑ sɔ̃ɔwɔ ɑ nɛɛ, bɑ̀ n Yuudɛni tɔburɑ bɑ duɑ Kɑnɑnin temɔ, 11 bu wusu gɑsu gɔsio mi wi u kun kĩ u kɑ tɔnu go u ko n dɑ kpikiru de, 12 sere bu kɑ nùn dɑ bu siri tɔmbun wuswɑɑɔ. Nge mɛyɑ u koo kɑ yɑri wi u kĩ u nùn mɔru kɔsiɑn nɔmɑn di. 13 Wuu sìn mi bɑ ko n dɑ kpikiru de, su ko n sɑ̃ɑwɑ nɔɔbɑ tiɑ, 14 itɑ yɑ n wɑ̃ɑ Yuudɛnin sɔ̃ɔ yɑri yeru giɑ, itɑ ye yɑ mɑɑ tie yɑ n wɑ̃ɑ Kɑnɑnin temɔ. 15 Isireli goo, ǹ kun mɛ sɔɔ wi u wɑ̃ɑ Isirelibɑn suunu sɔɔ, ù kun kĩ u kɑ tɔnu go, u koo kpĩ u kpikiru dɑ wuu sin gɑgun mi.
16-19 Goo ù n tɔnu so u go kɑ gɑ̃ɑ ni bɑ kuɑ kɑ sisu, ǹ kun mɛ kɑ kperu, ǹ kun mɛ kɑ bokuru, u sɑ̃ɑwɑ tɔn gowo. Wi u go min tɔnu u koo mɑɑ nùn mɔru kɔsie u gowɑ. 20 Goo ù n win winsim tusɑ u bɔriɑ, ǹ kun mɛ u nùn gɑ̃ɑnu kɑrɑ, 21 ǹ kun mɛ u nùn so kɑ nɔmɑ u go, bɑ koo yɛ̃ron tii gowɑ, domi u sɑ̃ɑwɑ tɔn gowo. Wi u go min tɔnu u koo mɑɑ nùn mɔru kɔsie u gowɑ.
22-23 Goo ù kun mɑɑ kĩ u kɑ win winsim bɔriɑ, ǹ kun mɛ u nùn kɑrɑ kɑ gɑ̃ɑnu ǹ kun mɛ, u kɑ nùn kperu so u go, 24 tɔmbu bɑ koo ye yɑ koorɑ min sɑriɑ mɛɛriwɑ bu kɑ yɛ̃ro siri wi u tɔnu go mi. 25 Kpɑ bu nùn wiru dwe bu de u wurɑ wuu gèn mi u rɑɑ kpikiru dɑ, kpɑ u sinɑ mi sere yɑ̃ku kowo tɔnwero u kɑ gbi wi bɑ gum tɑ̃re wirɔ. 26 Wi u tɔnu go mi, ù n yɑrɑ wuu gen min di, gèn mi u kpikiru dɑ mi, 27 mɑ wi u kĩ u nùn mɔru kɔsiɑ u nùn go, yɛ̃ro kun tɑɑrɛ gɑɑ mɔ. 28 Domi wi u tɔnu go mi, n weenɛ u sinɑwɑ wuu mi u rɑɑ kpikiru dɑ sere yɑ̃ku kowo tɔnwero u kɑ gbi. Yen biru u koo kpĩ u wurɑ win temɔ.
29 Woodɑ beniwɑ bɑ ko n dɑ swĩi, be kɑ ben bibun bweseru yɑm kpuro mi bɑ wɑ̃ɑ.
30 Goo ù n tɔnu go, tɔn dɑbirɑ bɑ koo yen seedɑ di bu sere yɛ̃ro go. Tɔn turon seedɑ dibu kun turɑ bu kɑ tɔnu tɑɑrɛ wɛ̃ bu go. 31 Bu ku nɔm birɑn kɛ̃ru mwɑ bu kɑ tɔn gowo deri. N weenɛ u gbiwɑ kɑm kɑm. 32 Bɑ#ǹ mɑɑ nɔm birɑn kɛ̃ru mwɑɑmɔ bu kɑ de u dɑ wuu gèn mi bɑ rɑ kpikiru de, kpɑ u wurɑ win temɔ yɑ̃ku kowo tɔnwero ù n gu.