23
1 Mɑ Bɑlɑmu u Bɑlɑki sɔ̃ɔwɑ u nɛɛ, u nùn yɑ̃ku yenu nɔɔbɑ yiru kuo. Yen biru, kpɑ u kɛtɛ nɔɔbɑ yiru kɑ yɑ̃ɑ kinɛnu nɔɔbɑ yiru kɑsu. 2 Mɑ Bɑlɑki u kuɑ ye Bɑlɑmu u nùn sɔ̃ɔwɑ. Mɑ wi kɑ Bɑlɑmu bɑ kɛtɛ yen tiɑ kɑ yɑ̃ɑ kinɛ teeru go yɑ̃ku yee nin bɑɑteren wɔllɔ. 3 Yerɑ Bɑlɑmu u Bɑlɑki sɔ̃ɔwɑ u nɛɛ, ɑ yɔ̃ro yɑ̃ku dɔ̃ɔ mwɑɑrugii nin bɔkuɔ kpɑ nɛ n dɛsirɑ n dɑ gɑm gum. Sɔrɔkudo Yinni Gusunɔ u koo mɑn kure mi, kpɑ u mɑn sɔ̃ ye kon nun sɔ̃.
Mɑ Bɑlɑmu u dɑ gunguru gɑrun wɔllɔ. 4 Yerɑ Yinni Gusunɔ u nùn kure mɑ Bɑlɑmu u geruɑ u nɛɛ, wee nɑ yɑ̃ku yenu nɔɔbɑ yiru kuɑ mɑ nɑ kɛtɛ kɑ yɑ̃ɑru go yɑ̃ku yee nin bɑɑteren wɔllɔ.
5 Sɑɑ yerɑ Yinni Gusunɔ u nùn sɔ̃ɔwɑ ye u koo Bɑlɑki sɔ̃, mɑ u nɛɛ, u gɔsiro u wurɑ Bɑlɑkin mi. 6 Mɑ Bɑlɑmu u wurɑ u dɑ u Bɑlɑki deemɑ mi u win yɑ̃ku ni mɔ̀ kɑ Mɔɑbubɑn wirugibu gɑbu. 7 Sɑɑ yerɑ Bɑlɑmu u gɑri geruɑ u nɛɛ,
wee Bɑlɑki Mɔɑbun sunɔ u derɑ nɑ nɑ sɑɑ Arɑmun di.
Wiyɑ u derɑ nɑ sɑrɑmɑ sɑɑ sɔ̃ɔ yɑri yerun guunun di.
U nɛɛ, n be nɑ n Yɑkɔbun bweseru bɔ̃rusi.
N be nɑ n kɑ be Isirelibɑ mɔru ko.
8 Adɑmɑ kon tɔnu bɔ̃rusi wi Gusunɔ kun bɔ̃rusi?
Amɔnɑ kon kɑ tɔnu mɔru ko wi Gusunɔ kun kɑ mɔru mɔ̀.
9 Nɑ Isirelibɑ wɑɑmɔ guunu wɔllɔ kɑ gungunu wɔllɔ
bɑ wɑ̃ɑ nɛnɛm bɑ#ǹ kɑ bweseru gɑru weenɛ.
10 Goo kun kpɛ̃ u bu gɑri.
Bɑ dɑbi nge yɑni sɛɛri mini.
Wɑrɑ u koo kpĩ u ben bɔnu nnɛn sube teeru gɑri.
Nɑ kɑnɑmɔwɑ n gbi nge Isireli be, be bɑ sɑ̃ɑ gemgibu.
Nɑ kĩwɑ nɛn wɑ̃ɑrun wii goberu tɑ n sɑ̃ɑ nge begiru.
11 Yerɑ Bɑlɑki u Bɑlɑmu bikiɑ u nɛɛ, mbɑ ɑ mɑn kuɑmmɛ mɛsum. Nɑ nun sokusiɑwɑ ɑ kɑ nɛn yibɛrɛbɑ bɔ̃rusi. Adɑmɑ wee domɑrɑ ɑ bu kuɑmmɛ.
12 Mɑ Bɑlɑmu u nùn wisɑ u nɛɛ, ye Yinni Gusunɔ u mɑn sɔ̃ɔwɑ, n ǹ yerɑ kon gere?
Bɑlɑmu u Isirelibɑ
domɑru kuɑ nɔn mɛɛruse
13 Bɑlɑki u mɑɑ Bɑlɑmu sɔ̃ɔwɑ u nɛɛ, ɑ mɑn swĩimɑ su dɑ gɑm giɑ. Min di kɑɑ ben sukum wɑ n ǹ be kpuro. Be ɑ wɑ mi, kpɑ ɑ bu bɔ̃rusi.
14 Mɑ u kɑ nùn dɑ sɑnsɑnin kɔ̃su yeru gɑrun mi, Pisigɑn guuru wɔllɔ. Miyɑ u mɑɑ yɑ̃ku yenu nɔɔbɑ yiru kuɑ. Mɑ u nɑɑ kinɛru kɑ yɑ̃ɑ kinɛru go yɑ̃ku yee nin bɑɑteren wɔllɔ. 15 Mɑ Bɑlɑmu u Bɑlɑki sɔ̃ɔwɑ u nɛɛ, ɑ yɔ̃ro mi ɑ yɑ̃ku dɔ̃ɔ mwɑɑrɑruginu mɔ̀ mini, kpɑ n dɑ n nɔ ye Yinni Gusunɔ u koo mɑn sɔ̃.
16 Yerɑ Yinni Gusunɔ u nɑ u kɑ Bɑlɑmu yinnɑ. Mɑ u nùn sɔ̃ɔwɑ ye u koo Bɑlɑki sɔ̃. Mɑ u nɛɛ, u wuro Bɑlɑki win mi. 17 Mɑ u wurɑ u dɑ Bɑlɑkin mi u deemɑ u wɑ̃ɑ win yɑ̃kunun bɔkuɔ, wi kɑ Mɔɑbubɑn wirugibu. Sɑɑ yerɑ u Bɑlɑmu bikiɑ u nɛɛ, mbɑ Yinni Gusunɔ u nun sɔ̃ɔwɑ.
18 Mɑ Bɑlɑmu u nɛɛ,
Bɑlɑki, ɑ seewo ɑ swɑɑ dɑki.
Wunɛ Siporin bii, ɑ swɑɑ tem kpĩiyɔ ɑ nɔ.
19 Gusunɔ kun sɑ̃ɑ nge tɔnu u sere weesu ko.
U#ǹ sɑ̃ɑ nge tɔnu u sere kɔbiɑ ye u rɑɑ geruɑ.
Ye u geruɑ, yerɑ u rɑ ko.
Yèn himbɑ u mɑɑ yi, yɑ rɑ koorewɑ.
20 Wee Gusunɔ u mɑn woodɑ wɛ̃ n Isirelibɑ domɑru kuɑ.
Win tiiwɑ u bu tu kuɑ kɔ.
Yen sɔ̃, nɑ#ǹ kpɛ̃ n tu yinɑ.
21 U#ǹ torɑru gɑru wɑ Isirelibɑ sɔɔ.
U sɑ̃ɑwɑ Gusunɔ ben Yinni, u mɑɑ wɑ̃ɑ kɑ be.
U sɑ̃ɑwɑ ben sinɑ boko.
U mɑɑ nuku dobu mɔ ben sɔ̃.
22 Wiyɑ u bu yɑrɑ Egibitin di.
U bu dɑm wɛ̃ nge kɛtɛ gbeekiru.
23 Sɔroru tɑ#ǹ kpɛ̃ tu Isirelibɑ gɑ̃ɑnu kuɑ.
Dobo dobo yɑ#ǹ kpɛ̃ yu bu nɔni wɔ̃ke.
Sɑɑ yɑ̀ n turɑ bɑ koo bu sɔ̃ bu nɛɛ,
bu mɛɛrio ye Yinni Gusunɔ u kuɑ.
24 Bɑ sɑ̃ɑwɑ nge gbee sunɔ ge gɑ rɑ yɑɑ mwɛ gu tem
kpɑ gu yen yɛm nɔ gu sere dɑ gu kpunɑ.
25 Mɑ Bɑlɑki u Bɑlɑmu sɔ̃ɔwɑ u nɛɛ, ɑ̀ kun kĩ ɑ bu bɔ̃rusi, ɑ ku bu domɑru kuɑ.
26 Yerɑ Bɑlɑmu u nùn wisɑ u nɛɛ, nɑ#ǹ dɑɑ nun sɔ̃ɔwɑ nɑ nɛɛ, kon kowɑ ye Yinni Gusunɔ u geruɑ?
Bɑlɑmu u Isirelibɑ
domɑru kuɑ nɔn itɑse
27 Bɑlɑki u mɑɑ Bɑlɑmu sɔ̃ɔwɑ u nɛɛ, ǹ n mɛn nɑ, ɑ nɑ su dɑ gɑm giɑ. Sɔrɔkudo Yinni Gusunɔ u koo wurɑ ɑ Isirelibɑ bɔ̃rusi nɛn sɔ̃.
28 Mɑ Bɑlɑki u kɑ Bɑlɑmu dɑ Peorin guuru wɔllɔ tèn min di bɑ gbɑburu mɛɛrɑ. 29 Bɑlɑmu u Bɑlɑki sɔ̃ɔwɑ u nɛɛ, ɑ mɑn yɑ̃ku yenu nɔɔbɑ yiru kuo, kpɑ ɑ kɑ mɑn nɑɑ kinɛnu nɔɔbɑ yiru kɑ yɑ̃ɑ kinɛnu nɔɔbɑ yiru nɑɑwɑ, 30 mɑ Bɑlɑki u kuɑ ye Bɑlɑmu u nùn sɔ̃ɔwɑ mi. U nɑɑ kinɛru kɑ yɑ̃ɑ kinɛru go yɑ̃ku yee nin bɑɑteren wɔllɔ.