24
1 Ye Bɑlɑmu u wɑ mɑ Yinni Gusunɔ u yɔ̃rɑriwɑ u Isirelibɑ domɑru kuɑ, yerɑ u#ǹ mɑɑ bikiɑru kue Yinni Gusunɔn mi nge mɛ u rɑ rɑɑ ko yellu. Adɑmɑ u win wuswɑɑ tĩiwɑ gbɑburun berɑ giɑ. 2 Ye u nɔni seeyɑ u wɑ Isirelibɑ bɑ ben sɑnsɑni gire bwese kɛrɑ kɑ bwese kɛrɑ, yerɑ Gusunɔn Hunde nùn yɔɔwɑ. 3 Mɑ u gɑri gerubu wɔri u nɛɛ,
nɛ, Bɑlɑmu, Beorin bii, wee ye nɑ gerumɔ.
Nɑ rɑ yɑm wɑ.
4 Nɑ rɑ Gusunɔn nɔɔ nɔ.
Wi, Dɑm kpurogii u rɑ de n kɑ̃sinu wɑ.
Domi u rɑ mɑn tii sɔ̃ɔsi nɑ̀ n nùn sɑ̃ɑmɔ.
5 Bɛɛ Isirelibɑ Yɑkɔbun bweseru, bɛɛn kunu nu wɑ̃.
6 Nu tɛrie nge wɔwɑ mɑ nu sɑ̃ɑ nge gbɑɑ te tɑ wɑ̃ɑ dɑɑrun bɔkuɔ.
Mɑ nu gire nge dɑ̃ɑ ni bɑ mɔ̀ sɛduru ni Yinni Gusunɔ u duurɑ dɑɑrun bɔkuɔ
kɑ sere dɑ̃ɑ kiki si bɑ mɔ̀ ɑloɛsi.
7 Bɑ nim mɔ mu yibɑ mu yɑrimɔ
mu dɑ̃ɑ gbɑɑru nim yɛ̃kɑmɔ.
Isirelibɑn sinɑ boko u koo Agɑgi tɑbu di
kpɑ win bɑndu tu dɑm ko.
8 Gusunɔwɑ u bu yɑrɑ Egibitin di
kɑ win dɑm bɑkɑm nge kɛtɛ gbeekiru.
Wiyɑ u rɑ de bu bwese tukunu kɑmiɑ nɔni kpɑki teeru
kpɑ bu nu sɛ̃ɛnu twee bu nin kukunu kɔsuku bu go.
9 Be wee bɑ kpunɑmɔ nge gbee sinɑnsu.
Wɑrɑ u koo kpĩ u bu seeyɑ.
Bɛɛ, Isirelibɑ, wi u bɛɛ domɑru kuɑ, u koo domɑru wɑ.
Wi u mɑɑ bɛɛ bɔ̃rusi, u koo bɔ̃ri wɑ.
10 Yerɑ Bɑlɑkin mɔru yɑ seewɑ sere u nɔmɑ yɛ̃kɑnɑ. Mɑ u nɛɛ, Bɑlɑmu, nɑ nun sokɑwɑ ɑ kɑ nɛn yibɛrɛbɑ bɔ̃rusi. Adɑmɑ wee ɑ bu domɑru kuɑ nɔn itɑ. 11 Yen sɔ̃, ɑ doonɔ minin di tɛ̃, ɑ wurɑ wunɛn yɛnuɔ. Nɑ rɑɑ nɛɛ, kon nun gɑ̃ɑnu kɛ̃, ɑdɑmɑ Yinni Gusunɔ kun wure ɑ ye wɑ.
Bɑlɑmu u gerumɔ
ye yɑ koo koorɑ
12 Mɑ Bɑlɑmu u Bɑlɑki wisɑ u nɛɛ, nɑ#ǹ dɑɑ wunɛn gɔro be sɔ̃ɔwɑ nɑ nɛɛ, 13 bɑɑ ɑ̀ n mɑn wunɛn diru kɑ̃, te tɑ wurɑ kɑ sii geesu yibɑ nɑ#ǹ kpɛ̃ n geɑ ǹ kun mɛ kɔ̃sɑ gere mɑ n kun mɔ ye Yinni Gusunɔn u mɑn sɔ̃ɔwɑ? 14 Tɛ̃ wee nɑ gɔsirɔ nɛn tɔmbun mi. Adɑmɑ ɑ nɑ ɑ nɔ yè Isirelibɑ bɑ koo wunɛn tɔmbu kuɑ siɑ.
15 Mɑ u mɑɑ nɛɛ,
wee ye nɛ Bɑlɑmu Beorin bii nɑ gerumɔ,
nɛ wi nɑ rɑ yɑm wɑ.
16 Nɑ rɑ Yinni Gusunɔn nɔɔ nɔ.
Nɑ mɑɑ wi, Wɔrukoon himbɑ yɛ̃.
Nɑ rɑ wi Dɑm kpurogiin kɑ̃sinu wɑ,
domi u rɑ mɑn tii sɔ̃ɔsi nɑ̀ n nùn sɑ̃ɑmɔ.
17 Nɑ wɑ ye yɑ sisi, ɑdɑmɑ n ǹ mɔ gisɔ.
Nɑ wɑ ye yɑ koo koorɑ, ɑdɑmɑ n ǹ tɛ̃.
Wee kperɑ gɑɑ yɑrɑ Yɑkɔbun bweserun di.
Sinɑ boko goo u yɑrɑ Isirelibɑn suunu sɔɔn di,
be, be bɑ sɑ̃ɑ Yɑkɔbun bweseru.
Mɑ u kɑ win sinɑ dɛkɑ Mɔɑbubɑ soomɔ bɑɑ sɑburosɔ.
Mɑ yɑ be bɑ tii suen bweserun winu kɔsukumɔ.
18 U mɑɑ Edɔmu be bɑ sɑ̃ɑ win yibɛrɛbɑn tem mwɑ mɛ bɑ mɔ̀ Seiri.
Mɑ Isirelibɑ bɑ nɑsɑrɑ suɑ.
19 Sinɑ boko wi, u win yibɛrɛbɑ tɑɑre.
Mɑ u be bɑ rɑɑ tie go u kpeerɑsiɑ mɑm mɑm.
Isirelibɑn yibɛrɛbɑ
bɑ koo kɑm ko
20 Ye Bɑlɑmu u Amɑlɛkibɑ wɑ, yerɑ u nɛɛ,
Amɑlɛkibɑrɑ bɑ dɑm bo duniɑ sɔɔ.
Adɑmɑ bɑ koo bu kɑm koosiɑ sɔ̃ɔ teeru.
21 Ye Bɑlɑmu u mɑɑ Kenibɑ wɑ, yerɑ u nɛɛ,
bɛɛ Kenibɑ, wee bɛɛn wɑ̃ɑ yerɑ nɑɑnɛ mɔ
nge gunɔ sokuru te tɑ yii kpee bɑɑ sɔɔ.
22 Adɑmɑ Asirigibu bɑ koo bɛɛ yoru mwɛɛri
kpɑ bu bɛɛn wɑ̃ɑ yenu kɔsuku.
23 Mɑ Bɑlɑmu u mɑɑ nɛɛ,
Gusunɔ ù n goon gɔɔn sɑɑ yi, yɛ̃ro u koo kpĩ u n wɑ̃ɑ?
24 Goo nimkusu su koo nɑ sɑɑ Kitimun di
kpɑ yibɛrɛbɑ bu Asirigibu kɑ Ebɛɛn bweseru sekuru doke.
Adɑmɑ yibɛrɛ ben tii bɑ koo kɑm kowɑ.
25 Yenibɑn biru, Bɑlɑmu u gɔsirɑ u dɑ win wuuɔ, mɑ Bɑlɑki u mɑɑ wurɑ win yɛnuɔ.