Isirelibɑ bɑ Kɑnɑnibɑ tɑbu di
21
1 Arɑdin sunɔ Kɑnɑnigii wi u wɑ̃ɑ sɔ̃ɔ yɛ̃sɑn nɔm dwɑru giɑ u nuɑ mɑ Isirelibɑ bɑ wee kɑ Atɑrimun swɑɑ. Yerɑ u dɑ u bu tɑbu wɔri, mɑ u ben gɑbu yoru mwɛɛrɑ. 2 Yerɑ Isirelibɑ bɑ Yinni Gusunɔ nɔɔ mwɛɛ teni kuɑ bɑ nɛɛ, Yinni Gusunɔ, ɑ̀ n sun tɔn beni nɔmu bɛriɑ, sɑ ko ben wusu kpeerɑsiɑwɑ mɑm mɑm.
3 Mɑ u Isirelibɑn gɑri yi wurɑ u bu Kɑnɑni be nɔmu bɛriɑ. Mɑ bɑ Kɑnɑni be, kɑ ben wusu kpeerɑsiɑ. Yerɑ bɑ yɑm mi yĩsiru kɑ̃ Hɔɔmɑ. Yen tubusiɑnɑ bɑnsu.
Wɛɛ dɛ̃ɛgii
4 Yenibɑn biru, Isirelibɑ bɑ seewɑ Horin guurun di mɑ bɑ kpɑ kɑ nim wɔ̃ku ge bɑ mɔ̀ Nɑɑ yɑrin swɑɑɔ kpɑ bu kɑ Edɔmun tem bɛwɑ. Adɑmɑ bɑ tɛmɑnɑbu kpɑnɑ swɑɑɔ. 5 Mɑ bɑ Yinni Gusunɔ kɑ Mɔwisi wɔkisim wɔri bɑ mɔ̀, mbɑn sɔ̃nɑ i sun yɑrɑmɑ Egibitin di. Su kɑ gbi gbɑburɔ? Domi dĩɑnu kɑ nim sɑri mini. Mɑnnɑ ye wee, yɑ sun tusɑ. Dĩɑ kɑmwɑ.
6 Yerɑ Yinni Gusunɔ u bu wɛɛ dɛ̃ɛgii sure mɑ ben dɑbirɑ gu. 7 Yerɑ be bɑ tie bɑ nɑ bɑ Mɔwisi sɔ̃ɔwɑ bɑ nɛɛ, wee sɑ torɑ sɑ wunɛ kɑ Gusunɔ wɔkisi. Tɛ̃, ɑ Gusunɔ kɑnɔ u sun wɛɛ yi girɑ yi tondɑ.
Mɑ Mɔwisi u kɑnɑru kuɑ tɔn ben sɔ̃. 8 Yerɑ Yinni Gusunɔ u nùn sɔ̃ɔwɑ u nɛɛ, ɑ wɑɑn weenɑsiɑ koowo kpɑ ɑ ye bwɛ̃ dɛkɑn wɔllɔ. Wi wɑɑ yɑ dɔmɑ mɑ u wɑɑn weenɑsiɑ ye mɛɛrɑ, u#ǹ mɑɑ gbimɔ.
9 Mɑ Mɔwisi u wɑɑ sii gɑndugiɑ ye kuɑ u ye bwɛ̃ dɛkɑn wɔllɔ. Wi wɑɑ yɑ dɔmɑ kpuro mɑ u wɑɑ sii gɑndugiɑ ye mɛɛrɑ, u ku rɑ mɑɑ gbi.
Isirelibɑ
bɑ turɑ Pisigɑn guurɔ
10 Yenibɑn biru, Isirelibɑ bɑ swɑɑ wɔri mɑ bɑ dɑ bɑ ben sɑnsɑni girɑ Obɔtuɔ. 11 Sɑɑ Obɔtun di, bɑ mɑɑ seewɑ bɑ dɑ bɑ ben sɑnsɑni girɑ Iye Abɑrimun gbɑburɔ, Mɔɑbun deedeeru, sɔ̃ɔ yɑri yeru giɑ. 12 Sɑɑ min di, bɑ mɑɑ seewɑ bɑ dɑ bɑ ben sɑnsɑni girɑ Serɛdin wɔwɑɔ. 13 Sɑɑ Serɛdin di, bɑ mɑɑ dɑ bɑ ben sɑnsɑni girɑ Aɑnɔɔn dɑɑrun guru giɔ, tèn nim mu kokumɔ Amɔrebɑn tem di mu dɔɔ gbɑburu giɑ. Domi Aɑnɔɔ yɑ sɑ̃ɑwɑ Mɔɑbu kɑ Amɔrebɑn tem nɔɔ burɑ yeru. 14 Yen sɔ̃nɑ Yinni Gusunɔn tɑbun tireru sɔɔ bɑ Fɑhɛbun gɑri mɔ̀ ye yɑ wɑ̃ɑ Sufɑn temɔ kɑ yen dɑɑ tori kɑ Aɑnɔɔ 15 kɑ yen dɑɑ tori yi yi wɑ̃ɑ Arin berɑ mɑ yi dɑ yi girɑri Mɔɑbun tem nɔɔ burɑ yerɔ. 16 Sɑɑ min di, bɑ dɑ Beriɔ. Beri miyɑ Yinni Gusunɔ u Mɔwisi sɔ̃ɔwɑ u nɛɛ, ɑ tɔn be mɛnnɔ kpɑ n bu nim wɛ̃.
17 Yerɑ Isirelibɑ bɑ womu geni kuɑ bɑ nɛɛ,
nim, ɑ yɑrimɑ dɔkɔn di kpɑ su tɑki ko.
18 Sinɑmbɑ bɑ dɔkɔ ye gbɑ.
Dɑmgibɑ bɑ ye gbɑ kɑ ben sinɑ dɛki.
Yen biruwɑ Isirelibɑ bɑ seewɑ gbɑbu ten min di bɑ dɑ Mɑtɑnɑɔ. 19 Sɑɑ Mɑtɑnɑn di, bɑ dɑ Nɑhɑliɛliɔ. Sɑɑ Nɑhɑliɛlin di, bɑ dɑ Bɑmɔtuɔ. 20 Sɑɑ Bɑmɔtun di, bɑ mɑɑ dɑ wɔwɑ gɑɑn mi, Mɔɑbun temɔ, guu te bɑ mɔ̀ Pisigɑn wɔllɔ gbɑburun deedeeru.
Isirelibɑ
bɑ Sihoni kɑ Ogu kɑmiɑ
21 Isirelibɑ bɑ Sihoni Amɔrebɑn sinɑ boko sɔmɔbu gɔriɑ bɑ nɛɛ, 22 ɑ de su wunɛn tem bukiɑnɑ. Sɑ#ǹ kpeeyɔ kɑ bɛɛn gbeɑ giɑ, sɑ#ǹ bɛɛn resɛm gbɑɑnu duɔ, sɑ#ǹ mɑɑ bɛɛn dɔkɔbɑn nim nɔrumɔ. Swɑɑ bɑkɑ sɑ ko mwɑ, sɑ#ǹ gɑm gɛrɑmɔ sere su kɑ bɛɛn tem yɑri.
23 Adɑmɑ Sihoni u yinɑ Isirelibɑ bu kpe sɑɑ win tem di. Yerɑ u win tɑbu kowobu mɛnnɑ bɑ dɑ bɑ Isirelibɑ wɔri Yɑhɑsiɔ gbɑburɔ. 24 Mɑ Isirelibɑ bɑ bu go go bɑ ben tem mwɑ sɑɑ dɑɑ te bɑ mɔ̀ Aɑnɔɔn di n kɑ dɑ dɑɑ te bɑ mɔ̀ Yɑbɔkuɔ, sere n kɑ girɑri Amɔnibɑn tem nɔɔ burɑ yerɔ. N deemɑ Amɔni be, bɑ ben tem nɔɔ burɑ yerɔ tem kɔ̃sobu yii. 25 Mɑ Isirelibɑ bɑ Amɔrebɑn wusu kpuro mwɛɛrɑ bɑ sinɑ mi kɑ Hɛsiboniɔ kɑ gen bɑru kpɑɑnɔ. 26 Hɛsiboni ye, yɑ sɑ̃ɑwɑ Sihonin tiin wuu. Sihoni wi, u rɑɑ kɑ Mɔɑbubɑ tɑbu kuɑ mɑ u bu tɑbu di sere u Mɔɑbubɑn tem mwɑ u kɑ nɑ sere dɑɑ te bɑ mɔ̀ Aɑnɔɔwɔ. 27 Yen sɔ̃nɑ wom kowobu bɑ rɑ mɔndu ko bu nɛɛ,
i nɑ i Hɛsiboni bɑni.
I nɑ i Sihonin wuu bɑni i gu gbɑ̃rɑru toosi.
28 Domi dɔ̃ɔ u yɑrɑ Hɛsibonin di.
Dɔ̃ɔ yɑrɑ yɑ yɑrɑ Sihonin wuun di.
Mɑ u wuu ge bɑ mɔ̀ Ari Mɔɑbu di
kɑ bũu ni nu wɑ̃ɑ Aɑnɔɔn gungunu wɔllɔ.
29 Mɔɑbu, ɑ kɑm kuɑwɑ!
Bɛɛ be i mɑɑ bũu wi bɑ mɔ̀ Kemɔsi sɑ̃ɑmɔ, i kɔ̃ɔrɑwɑ!
Domi u derɑ Amɔrebɑn sinɑ boko Sihoni u tɔn durɔbu kɑ tɔn kurɔbu yoru mwɛɛrɑ.
30 Adɑmɑ sɑ Amɔrebɑ sɛ̃ɛnu twee.
Mɑ Hɛsiboni yɑ wɔrukɑ.
Mɑ tem mɛ kpuro mu kɑm kuɑ
sere Diboniɔ n kɑ girɑri Nɔfɑɔ, kɑ Mɛdebɑɔ.
Sɑ ye kpuro kɑm koosiɑwɑ mɑm mɑm. 31 Nge mɛyɑ Isirelibɑ bɑ kɑ sinɑ Amɔrebɑn tem sɔɔ. 32 Mɑ Mɔwisi u gɔrɑ bu dɑ bu Yɑsɛɛn sɑriɑ mɛɛri. Yen biru bɑ ye mwɑ kɑ yen bɑru kpɑɑnu mɑ bɑ Amɔre be bɑ wɑ̃ɑ mi girɑ. 33 Yen biru bɑ swɑɑ kɔsɑ bɑ dɑ Bɑsɑni giɑ. Yerɑ Ogu Bɑsɑnin sunɔ u seewɑ kɑ win tɑbu kowobu u bu tɑbu wɔrim dɑ Edɛɛɔ. 34 Yerɑ Yinni Gusunɔ u Mɔwisi sɔ̃ɔwɑ u nɛɛ, ɑ ku win bɛrum ko, domi kon nun nùn nɔmu sɔndiɑ, wi kɑ win tɔmbu kɑ ben tem kpuro, kpɑ ɑ bu kuɑ nge mɛ ɑ Sihoni, Amɔrebɑn sunɔ kuɑ wi u wɑ̃ɑ Hɛsiboniɔ.
35 Mɑ Isirelibɑ bɑ bu go, wi kɑ win bibu kɑ sere win tɔmbu. Bɑɑ tɔn turo, bɑ#ǹ deri. Mɑ bɑ win tem mwɑ.ISIRELIBA BA WÃA MƆABUBAN TEM BƆKUƆ