Mɛribɑn nim
20
1 Wɔ̃ɔn suru gbiikoo sɔɔrɑ Isirelibɑ kpuro bɑ tunumɑ gbɑburɔ te bɑ sokumɔ Sini, mɑ bɑ sinɑ Kɑdɛsiɔ. Miyɑ Mɑriɑmu u gu, mɑ bɑ nùn sikɑ.
2 Sɑɑ ye sɔɔrɑ Isirelibɑ bɑ nim biɑ mɑ bɑ Mɔwisi kɑ Aroni seesi. 3 Mɑ tɔn be, bɑ kɑ Mɔwisi wɔki bɑ nɛɛ, mbɑn sɔ̃nɑ ɑ#ǹ dere Yinni Gusunɔ u yɑnde sun go sɑnɑm mɛ u bɛsɛgibu goomɔ. 4 Mbɑn sɔ̃nɑ ɑ kɑ bɛsɛ Gusunɔn tɔmbu nɑ gbɑburu sɔɔ mini su kɑ gbi bɛsɛ kɑ bɛsɛn yɑɑ sɑbenu. 5 Mbɑn sɔ̃nɑ ɑ sun yɑrɑmɑ Egibitin di mɑ ɑ kɑ sun nɑ yɑm kɔ̃sum mini, mi sɑ#ǹ kpɛ̃ su dĩɑnu gɑnu duure. Dɑ̃ɑ ye bɑ mɔ̀ figie sɑri mini, resɛm mɑɑ sɑri, gerenɑdi mɑɑ sɑri. Mɛyɑ nim kun mɑm wɑ̃ɑ mɛ sɑ ko nɔ.
6 Mɑ Mɔwisi kɑ Aroni bɑ tɔn be deri bɑ dɑ Yinni Gusunɔn kurun kɔnnɔwɔ. Mɑ bɑ yiirɑ bɑ wuswɑɑ tem girɑri. Mɑ Yinni Gusunɔn yiiko yɑ sɔ̃ɔsirɑ. 7 Yinni Gusunɔ u Mɔwisi sɔ̃ɔwɑ u nɛɛ, 8 ɑ wunɛn dɛkɑ suo kpɑ wunɛ kɑ wunɛn mɔɔ Aroni i Isirelibɑ mɛnnɑ kpɑ i kɑ kpee te gɑri ko be kpuron wuswɑɑɔ. Tɑ koo nim yɑrɑ i nɔ bɛɛ kɑ bɛɛn yɑɑ sɑbenu.
9 Mɑ Mɔwisi u dɛkɑ ye suɑ ye yɑ wɑ̃ɑ Yinni Gusunɔn sɑ̃ɑ yerɔ nge mɛ Yinni Gusunɔn tii u nùn sɔ̃ɔwɑ. 10 Mɑ wi kɑ Aroni bɑ Isirelibɑ kpuro sokɑ bɑ dɑ kpee ten mi. Yerɑ Mɔwisi u nɛɛ, i swɑɑ dɑkio i nɔ bɛɛ mɛm nɔɔ sɑribɑ. Kpee tenin min diyɑ sɑ ko de nim mu yɑri?
11 Yerɑ Mɔwisi u kpee te so kɑ win dɛkɑ ye, nɔn yiru mɑ nim mu yɑrɑ n kpɑ̃ kpee ten min di. Mɑ tɔn be kpuro kɑ ben yɑɑ sɑbenu bɑ nim mɛ nɔrɑ. 12 Yerɑ Yinni Gusunɔ u Mɔwisi sɔ̃ɔwɑ u nɛɛ, yèn sɔ̃ i mɑn nɑɑnɛ birɑ i#ǹ mɑn bɛɛrɛ wɛ̃ Isirelibɑn wuswɑɑɔ, yen sɔ̃nɑ nɑ#ǹ derimɔ i kɑ bu du tem mɛ sɔɔ, mɛ nɑ bu nɔɔ mwɛɛru kuɑ.
13 Gɑri yinin sɔ̃nɑ bɑ rɑ nim mɛ soku Mɛribɑn nim. Yen tubusiɑnɑ sɑnnɔn nim. Domi miyɑ Isirelibɑ bɑ Yinni Gusunɔ wɔkisi mɑ u bu win dɛɛrɑru sɔ̃ɔsi.
Edɔmubɑn sunɔ u yinɑ
Isirelibɑ bu kpe
sɑɑ win tem di
14 Sɑɑ Kɑdɛsi min diyɑ Mɔwisi u Edɔmun sunɔ gɔriɑ bu nùn sɔ̃ nge mɛ be Isirelibɑ bɑ wɑhɑlɑ kuɑ. 15 U nɛɛ, yellu, bɛsɛn bɑɑbɑbɑ bɑ dɑ Egibitiɔ. Miyɑ bɛsɛn bweserɑ sinɑ n kɑ tɛ. Mɑ Egibitigibu bɑ sun nɔni sɔ̃ɔwɑ bɛsɛ kɑ bɛsɛn bɑɑbɑ be. 16 Sɑɑ ye sɔɔrɑ sɑ Yinni Gusunɔ nɔɔgiru sue sɑ nùn somiru kɑnɑ. Mɑ u bɛsɛn nɔɔ nuɑ u win gɔrɑdo gɔrimɑ u sun yɑrɑ Egibitin di. Wee tɛ̃ sɑ wɑ̃ɑ Kɑdɛsi mini wunɛn tem nɔɔ burɑ yerɔ. 17 Yen sɔ̃, sɑ nun kɑnɑmɔ ɑ de su wunɛn tem bukiɑnɑ. Sɑ#ǹ kpeeyɔ kɑ bɛɛn gbeɑ giɑ, sɑ#ǹ bɛɛn resɛm gbɑɑnu duɔ, sɑ#ǹ mɑɑ bɛɛn dɔkɔbɑn nim nɔrumɔ. Swɑɑ bɑkɑ sɑ ko mwɑ sɑ#ǹ gɛrɑmɔ gɑm sere su kɑ bɛɛn tem sɑrɑ.
18 Adɑmɑ Edɔmun sinɑ boko wi, u nɛɛ, i#ǹ nɛn tem bukiɑnɑmɔ. Ì n mɑɑ yinɑ i nɑ, kon kɑ bɛɛ tɑbu ko.
19 Mɑ Isirelibɑ bɑ nùn wisɑ bɑ nɛɛ, sɑ ko kpewɑ kɑ swɑɑ bɑkɑ. Bɛsɛ kɑ bɛsɛn yɑɑ sɑbenu sɑ̀ n wunɛn dɔkɔbɑn nim nɔrɑ sɑ ko yen gobi kɔsiɑ. A gesi de su wunɛn tem bukiɑnɑ su doonɑ.
20 Mɑ Edɔmun sinɑ boko wi, u nɛɛ, nɑ#ǹ wurewɑ i nɛn tem bukiɑnɑ.
Yerɑ Edɔmubɑn tɑbu kowobu bɑ seewɑ bɑ dɑ bɑ kɑ Isirelibɑ yinnɑ. 21 Mɑ bɑ yinɑ Isirelibɑ bu ben tem mɛ bukiɑnɑ bu doonɑ. Sɑɑ ye sɔɔrɑ Isirelibɑ bɑ gɔsirɑ, bɑ kpɑ gɑm giɑn di.
Aronin gɔɔ
22-23 Isirelibɑ kpuro, bɑ seewɑ Kɑdɛsi min di bɑ dɑ Horin guurɔ, Edɔmun tem nɔɔ burɑ yerɔ. Miyɑ Yinni Gusunɔ u kɑ Mɔwisi kɑ Aroni gɑri kuɑ u nɛɛ, 24 wee Aroni u koo gbi. U#ǹ duɔ tem mɛ sɔɔ mɛ kon Isirelibɑ wɛ̃ yèn sɔ̃ i#ǹ nɛn woodɑ mɛm nɔɔwɛ ye nɑ bɛɛ wɛ̃ Mɛribɑɔ. 25 Wunɛ Mɔwisi, ɑ Aroni kɑ win bii Eleɑsɑɑ suo ɑ kɑ bu dɑ Horin guu ten wɔllɔ. 26 Kpɑ ɑ Aronin sɑ̃ɑ yɑ̃nu potɑ ɑ nu Eleɑsɑɑ sebusiɑ. Domi miyɑ Aroni u koo gbi.
27 Mɑ Mɔwisi u kuɑ ye Yinni Gusunɔ u nùn sɔ̃ɔwɑ. Wi kɑ Aroni kɑ Eleɑsɑɑ bɑ yɔɔwɑ guu ten wɔllɔ Isirelibɑ kpuron nɔni biru. 28 Ye bɑ turɑ mi, u Aronin sɑ̃ɑ yɑ̃ɑ ni potɑ u nu Eleɑsɑɑ sebusiɑ. Yen biru, Aroni u kpunɑ u gu guu ten mi. Mɑ Mɔwisi kɑ Eleɑsɑɑ bɑ sɑrɑmɑ. 29 Ye Isirelibɑ bɑ wɑ mɑ Aroni u guwɑ, yerɑ be kpuro bɑ win gɔɔ swĩ sɔ̃ɔ tɛnɑ.