Mɔwisi u tɔmbu gɔrɑ
bu Kɑnɑnin tem sɑriɑ mɛɛri
13
1 Yinni Gusunɔ u Mɔwisi sɔ̃ɔwɑ u nɛɛ, 2 ɑ tɔmbu gɔsio bu kɑ Kɑnɑnin tem sɑriɑ mɛɛrim dɑ, mɛ nɑ bɛɛ Isirelibɑ wɛ̃ɛmɔ. Bwese kɛrɑ bɑɑyere sɔɔ, tɔn turowɑ kɑɑ gɔsi u dɑ. Yɛ̃ro u ko n sɑ̃ɑwɑ bwese kɛrɑ yen wirugii turo.
3 Mɑ Mɔwisi u Yinni Gusunɔn gere wurɑ. U tɔn be gɔsɑ u bu gɔrɑ sɑɑ Pɑrɑnin gbɑburun di. Be u gɔsɑ mi, be kpuro bɑ sɑ̃ɑwɑ Isirelibɑn wirugibu. 4 Ben yĩsɑ wee.Rubɛnin bweseru sɔɔ, Sɑmuɑ, Sɑkurin bii. 5 Simɛɔn bweseru sɔɔ, Sɑfɑti, Horin bii. 6 Yudɑn bweseru sɔɔ, Kɑlɛbu, Yɛfunɛn bii. 7 Isɑkɑrin bweseru sɔɔ, Yiguɑli, Yosɛfun bii. 8 Efɑrɑimun bweseru sɔɔ, Osee, Nunin bii. 9 Bɛnyɑmɛɛn bweseru sɔɔ, Pɑɑti, Rɑfun bii. 10 Sɑbulonin bweseru sɔɔ, Gɑdiɛli, Sodin bii. 11 Yosɛfun bweseru sɔɔ, be bɑ sɑ̃ɑ Mɑnɑsen bwese kɛrɑ, Gɑdi, Susin bii. 12 Dɑnun bweseru sɔɔ, Amiɛli, Gemɑlin bii. 13 Asɛɛn bweseru sɔɔ, Seturi, Mikɑɛlin bii. 14 Nɛfitɑlin bweseru sɔɔ, Nɑkɑbi, Fofusin bii. 15 Gɑdin bweseru sɔɔ, Gewɛli, Mɑkin bii.
16 Tɔn be bɑ siɑ mi, beyɑ Mɔwisi u gɔsɑ u gɔrɑ bu kɑ tem mɛn sɑriɑ mɛɛrim dɑ. Mɑ u Osee Nunin bii yĩsiru kɑ̃, Yosue.
17 Mɔwisi u sere bu gɔri u bu sɔ̃ɔwɑ u nɛɛ, i doo Kɑnɑnin temɔ sɑɑ mɛn sɔ̃ɔ yɛ̃sɑn nɔm dwɑru giɑn di kpɑ i kɑ dɑ guunun berɑ giɑ. 18 Kpɑ i tem mɛn sɑriɑ mɛɛri kpɑ i wɑ mɛn tɔmbu bɑ̀ n dɑm mɔ, bɑ̀ kun mɑɑ dɑm mɔ, bɑ̀ n dɑbi, bɑ̀ kun mɑɑ dɑbi. 19 I ko i mɑɑ mɛɛri tem mɛ, mù n geɑ sɑ̃ɑ, mù kun mɑɑ geɑ sɑ̃ɑ. Kpɑ i mɛɛri mɛn wusu sù n gbɑ̃rɑnu mɔ, sù kun mɑɑ mɔ. 20 Kpɑ i mɑɑ mɛɛri mù n koo dĩɑnu ko, mù kun mɑɑ mɔ̀, mù n dɑ̃nu mɔ, mù kun mɑɑ mɔ. I wɔrugɔru koowo. Kpɑ i kɑ mɛn dɑ̃ɑ mɑrum wɔmɑ.
N deemɑ sɑɑ ye sɔɔrɑ resɛm gbiikɑɑ yɑ rɑ ye.
21 Yen biruwɑ tɔn be, bɑ seewɑ bɑ tem mɛn sɑriɑ mɛɛrim dɑ sɑɑ gbɑburu te bɑ mɔ̀ Sinin di n kɑ dɑ Rehɔbuɔ, Hɑmɑtin swɑɑɔ. 22 Bɑ duɑ tem mɛ sɔɔ sɑɑ sɔ̃ɔ yɛ̃sɑn nɔm dwɑru giɑn di mɑ bɑ kɑ dɑ sere Heboroniɔ mi Ahimɑni kɑ Sesɑi kɑ Tɑlimɑi, Anɑkin bibun bweserɑ wɑ̃ɑ. Heboroni ye, yɑ Egibitin wuu ge bɑ mɔ̀ Soɑni tɔkɔru kere kɑ wɔ̃ɔ nɔɔbɑ yiru. 23 Mɑ bɑ tunumɑ wɔwɑ ye bɑ mɔ̀ Ɛsikoliɔ. Miyɑ bɑ resɛm kɑ̃ɑsɑ burɑ kɑ sere yen swɑɑru. Mɑ bɑ ye sɔɔwɑ be yiru bɑ sɑ̃ɑrusie kɑ dɛkɑ. Bɑ mɑɑ dɑ̃ɑ mɑrum gɑm suɑ mɛ bɑ mɔ̀ gerenɑdi kɑ figi. 24 Bɑ wɔwɑ ye yĩsiru kɑ̃ Ɛsikoli, yèn sɔ̃ miyɑ Isirelibɑ bɑ resɛm swɑɑru burɑ.
Mɔwisin gɔrobu bɑ gɔrɑ tusiɑ
25 Sɔ̃ɔ weerun biru gɔro be, bɑ wurɑmɑ. 26 Ye bɑ tunumɑ, bɑ wurɑ Kɑdɛsiɔ, Pɑrɑnin gbɑburɔ, mi Mɔwisi kɑ Aroni kɑ Isirelibɑ kpuro bɑ wɑ̃ɑ. Mɑ bɑ geruɑ ye bɑ wɑ kpuro. 27 Bɑ nɛɛ, too, sɑ dɑ tem mi ɑ sun gɔrɑ mi. Kɑ gem tem mɛ, mu tim kɑ bom kokumɔwɑ. Mɛn dɑ̃ɑ mɑrum gɑm wee sɑ kɑ nɑ. 28 Adɑmɑ tɔn be bɑ wɑ̃ɑ mi, bɑ dɑm mɔ. Ben wusu su kpɑ̃ su mɑɑ gbɑ̃rɑnu mɔ. Sɑ mɑɑ Anɑkin bibun bweseru wɑ mi, be bɑ rɑ n gunu. 29 Mɑ Amɑlɛkibɑ bɑ wɑ̃ɑ mɛn sɔ̃ɔ yɛ̃sɑn nɔm dwɑru giɑ. Mɑ Hɛtibɑ kɑ Yebusibɑ kɑ Amɔrebɑ bɑ wɑ̃ɑ guunun berɑ giɑ. Kɑnɑnibɑ bɑ mɑɑ wɑ̃ɑ nim wɔ̃ku ge bɑ mɔ̀ Mɛditerɑnɛn bɔkuɔ, kɑ sere Yuudɛnin dɑɑrun goorɔ.
30 Yerɑ tɔmbɑ Mɔwisi wɔkisim seewɑ. Mɑ Kɑlɛbu u bu mɑrisiɑ u nɛɛ, su dɑ su tem mɛ mwɑ mu ko bɛsɛgim. Sɑ ko nɑsɑrɑ wɑ.
31 Adɑmɑ tɔn be bɑ kɑ nùn tem mɛ mɛɛrim dɑ mi, bɑ nùn siki bɑ nɛɛ, sɑ#ǹ kpɛ̃ su kɑ tem mɛn tɔmbu sɑnnɑ. Domi bɑ sun dɑm kere.