Isirelibɑ bɑ yinɑ
bu du Kɑnɑnin temɔ
14
1 Ye Isirelibɑ bɑ gɑri yi nuɑ bɑ kpɑ, yerɑ bɑ nɔɔgiru suɑ bɑ swĩ wɔ̃ku giriru. 2 Mɑ bɑ Mɔwisi kɑ Aroni wɔkisim wɔri bɑ nɛɛ, mbɑn sɔ̃nɑ sɑ#ǹ dɑɑ yɑnde gu Egibitiɔ, ǹ kun mɛ gbɑburu mini. 3 Mbɑn sɔ̃nɑ Yinni Gusunɔ u kɑ sun nɑ tem mini bu sun go kɑ tɑkobi kpɑ bɛsɛn kurɔbu kɑ bɛsɛn bibu bu ko yibɛrɛbɑgibu. N burɑm bo su wurɑ Egibitiɔ.
4 Mɑ bɑ wesiɑnɑ bɑ nɛɛ, su bɛsɛn tii kpɑro kuɑ, kpɑ su wurɑ Egibitiɔ.
5 Ye Mɔwisi kɑ Aroni bɑ nuɑ mɛ, yerɑ bɑ kibɑri bɑ wuswɑɑ tem girɑri Isirelibɑ kpuron wuswɑɑɔ. 6 Yerɑ be sɔɔ, be bɑ tem mɛn sɑriɑ mɛɛrim dɑ mi, Yosue, Nunin bii kɑ Kɑlɛbu, Yɛfunɛn bii bɑ ben tiin yɑ̃nu gɛ̃ɛkɑ nuku sɑnkirɑnun sɔ̃. 7 Bɑ geruɑ bɑ nɛɛ, tem mɛ sɑ mɛɛrim dɑ mi, mu wɑ̃ gem gem. 8 Tim kɑ bomɑ mu kokumɔ mi. Gusunɔ ù n kɑ sun nɔnu geu mɛɛrɑ, u koo kɑ sun dɑ mi, kpɑ u sun mu wɛ̃. 9 Yen sɔ̃, i ku nùn seesi, kpɑ i ku tɔn ben bɛrum ko. Domi bɑ koo kowɑ nge bɛsɛn dĩɑnu. Ben bũnu kun bu kɔ̃sumɔ. Adɑmɑ Yinni Gusunɔ u ko n kɑ sun wɑ̃ɑ. I ku ben bɛrum ko.
10 Sɑɑ ye Isirelibɑ bɑ gerunɑmɔ bu Kɑlɛbu kɑ Yosue kpenu kɑsuku, sɑɑ yerɑ Yinni Gusunɔn yiiko yɑ sɔ̃ɔsirɑ win kuu ten wɔllɔ Isirelibɑ kpuron wuswɑɑɔ.
Mɔwisi u Isirelibɑ
suuru kɑnɑmmɛ Gusunɔn mi
11 Mɑ Yinni Gusunɔ u Mɔwisi sɔ̃ɔwɑ u nɛɛ, sere sɑɑ yerɑ̀ Isirelibɑ bɑ ko n mɑn gɛmɑ. Sere sɑɑ yerɑ̀ bɑ koo den mɑn nɑɑnɛ ko, bɑɑ mɛ nɑ mɑɑmɑɑki dɑbinu kuɑ ben suunu sɔɔ. 12 Kon bu bɑrɑnu kpɛ̃ɛwɑ, kpɑ n bu go. Adɑmɑ wunɛ kon de wunɛn bweseru tu kpɛ̃ɑ tu dɑm ko n kere Isireli be bɑ tie.
13 Yerɑ Mɔwisi u Yinni Gusunɔ sɔ̃ɔwɑ u nɛɛ, wunɑ ɑ Isirelibɑ yɑrɑmɑ Egibitin di kɑ wunɛn dɑm. Egibitigibu bɑ̀ n nuɑ ye ɑ Isirelibɑ kuɑ, 14 bɑ koo ye Kɑnɑnibɑ sɔ̃. N deemɑ ben tii bɑ nuɑ mɑ wunɑ ɑ Isirelibɑ kpɑre, ɑ rɑ tii bu sɔ̃ɔsi nɔni kɑ nɔni. Bɑ mɑɑ nuɑ mɑ wunɑ ɑ bu kɔ̃su. Domi ɑ rɑ n bu swɑɑ gbiiye sɔ̃ɔ sɔɔ kɑ guru wii wuroru, wɔ̃kuru kpɑ ɑ n wɑ̃ɑ dɔ̃ɔ yɑrɑ sɔɔ. 15 Wee tɛ̃, ɑ̀ n wunɛn tɔn be kpeerɑsiɑ nɔn teeru, bwese tuku ni nu wunɛn gɑri nuɑ, nu koo gere nu nɛɛ, 16 wunɛ Yinni Gusunɔ ɑ#ǹ dɑm mɔ ɑ kɑ wunɛn tɔn be kpɑrɑ ɑ kɑ dɑ tem mi ɑ bu nɔɔ mwɛɛru kuɑ. Yen sɔ̃nɑ ɑ nɑ ɑ bu go gbɑburɔ. 17 Yen sɔ̃ tɛ̃, nɑ nun kɑnɑmɔ ɑ de ɑ wunɛn dɑm bɑkɑm sɔ̃ɔsi nge mɛ ɑ geruɑ ɑ nɛɛ, 18 ɑ sɑ̃ɑwɑ suurugii. Wunɛn durom mu kpɑ̃. A rɑ tɔmbu ben torɑnu suuru kue. A ku rɑ toro deri ɑ kun nùn sɛɛyɑsie. Mɛyɑ ɑ rɑ bɑɑbɑbɑn torɑnun mɔɔru mwɛ ben bibun mi, sere kɑ ben sikɑdominɔ. 19 Yen sɔ̃, Yinni, ɑ tɔn be, ben torɑnu suuru kuo. A wunɛn wɔnwɔndu yɑɑyo. A yɑɑyo nge mɛ ɑ rɑ n bu suuru kuɑmmɛ sɑɑ mìn di ɑ bu yɑrimɑ Egibitin di.
20 Mɑ Yinni Gusunɔ u nɛɛ, kon bu suuru kuɑ nge mɛ ɑ kɑnɑ. 21 Adɑmɑ sere kɑ nɛn wɑ̃ɑru kɑ sere mɑɑ nɛn yiiko ye yɑ tem kpuro yibɑ, 22-23 Isireli be, bɑ#ǹ duɔ tem mɛ sɔɔ, bu sere mu wɑ, mɛ nɑ bɔ̃ruɑ nɑ nɛɛ, kon ben bɑɑbɑbɑ wɛ̃. Domi bɑ nɛn yiiko ye wɑ kɑ sɔm mɑɑmɑɑkigii ni nɑ kuɑ Egibitiɔ kɑ gbɑburɔ. Bɑ mɑɑ nɛn lɑɑkɑri mɛɛrɑ gbɑburɔ nɔn dɑbinu, mɑ bɑ#ǹ nɛn gere mɛm nɔɔwɛ, bɑ mɑn gɛmɑ. 24 Adɑmɑ yèn sɔ̃ Kɑlɛbu, nɛn sɔm kowo u#ǹ bwisikɑ nge be, mɑ u nɛn gere swĩi mɑm mɑm, kon de u du tem mɛ sɔɔ, mɛ u berɑm dɑ kpɑ win bibun bweseru tɑ n mu mɔ. 25 Adɑmɑ Amɑlɛkibɑ kɑ Kɑnɑnibɑrɑ bɑ wɑ̃ɑ tem mi, wɔwɑ sɔɔ. Yen sɔ̃, siɑ i gɔsiro i dɑ gbɑburɔ nim wɔ̃ku ge bɑ mɔ̀ Nɑɑ yɑri giɑ.
Yinni Gusunɔ
u win tɔmbu sɛɛyɑsiɑ
26 Yinni Gusunɔ u Mɔwisi kɑ Aroni sɔ̃ɔwɑ u nɛɛ, 27 nɑ nuɑ Isirelibɑ bɑ mɑn wɔkisimɔ. Sere sɑɑ yerɑ̀ bɑ koo mɑn wɔkisim mɑri. 28 I bu sɔ̃ɔwɔ i nɛɛ, sere kɑ nɛn wɑ̃ɑru kon bu kuɑwɑ nge mɛ bɑ gerumɔ. 29 Gbɑburu miniwɑ bɑ koo dɛllɑ bu gbi, be, be bɑ gesi gɑrɑ be bɑ wɔ̃ɔ yɛndu mɔ kɑ be bɑ kere mɛ, bɑ kɑ mɑn wɔkisi. 30 Ben goo kun duɔ tem mi, mɛ nɑ bɛɛ nɔɔ mwɛɛru kuɑ, i kɑ sinɑ, mɑ n kun mɔ Kɑlɛbu, Yɛfunɛn bii, kɑ Yosue, Nunin bii. 31 Adɑmɑ ben bii be bɑ nɛɛ, bɑ koo ko yibɛrɛbɑn yobu mi, beyɑ kon de bu du tem mɛ sɔɔ, kpɑ bɑ n wɑ̃ɑ mi, mɛ be, bɑ gɔburu wɑ mi, 32 kpɑ be, bu dɛllɑ gbɑburu mini bu gbi. 33 Ben bii be, bɑ koo sirenɑ wɔ̃ɔ weeru gbɑburu mi, ben bɑɑbɑbɑn mɛm nɔɔbu sɑrirun sɔ̃ sere bu kɑ gbisuku bu kpe. 34 Nge mɛ bɑ kuɑ sɔ̃ɔ weeru bɑ kɑ tem mɛn sɑriɑ mɛɛrɑ, nge mɛyɑ kon mɑɑ de bu ko wɔ̃ɔ weeru gbɑburɔ ben torɑnun sɔ̃. Sɔ̃ɔ wee ten tɔ̃ɔ bɑɑtere tɑ ko n sɑ̃ɑwɑ nge wɔ̃ɔ tiɑ. Sɑɑ ye sɔɔrɑ bɑ koo giɑ mɑ gɑ̃ɑ girinɑ nɑ̀ kun kɑ bu wɑ̃ɑ. 35 Nɛ, Yinni Gusunɔwɑ nɑ yeni geruɑ. Mɛyɑ kon bu kuɑ domi bɑ mɑn seesi ben nuku kɔ̃surun sɔ̃. Bɑ koo gbisukuwɑ gbɑburu mi, kpɑ ben gonu nu kɑm ko mi.
36 Be Mɔwisi u rɑɑ gɔsɑ bɑ kɑ tem mɛn sɑriɑ mɛɛrim dɑ, ye bɑ wurɑmɑ bɑ wɔki, mɑ bɑ tem mɛ nɑnum doke, 37 beyɑ Yinni Gusunɔ u so u go, 38 mɑ n kun mɔ Yosue, Nunin bii kɑ Kɑlɛbu, Yɛfunɛn bii.
Isirelibɑ bɑ mɑɑ torɑ
39 Mɑ Mɔwisi u dɑ u Yinni Gusunɔn gɑri yi Isirelibɑ kpuro sɔ̃ɔwɑ. Mɑ ben nuki sɑnkirɑ gem gem. 40 Mɑ bɑ seewɑ buru buru yellu bɑ yɔɔwɑ guuru wɔllɔ bɑ mɔ̀, Yinni, bɛsɛ wee sɑ ko dɑ mi ɑ nɛɛ, su dɑ mi. Sɑ torɑwɑ.
41 Yerɑ Mɔwisi u nɛɛ, mbɑn sɔ̃nɑ i Yinni Gusunɔn woodɑ sɑrɑ kpɑm. Ye i mɔ̀ mi, yɑ#ǹ kɑ bɛɛ gɑm dɔɔ. 42 I ku dɑ, domi Yinni Gusunɔ u#ǹ kɑ bɛɛ wɑ̃ɑ. I ku de bɛɛn yibɛrɛbɑ bu bɛɛ kɑmiɑ. 43 Amɑlɛkibɑ kɑ Kɑnɑnibɑ bɑ wɑ̃ɑ bɛɛn wuswɑɑɔ. Bɑ koo mɑɑ bɛɛ go kɑ tɑkobi, domi i Yinni Gusunɔ biru kisi. U#ǹ ko n mɑɑ wɑ̃ɑ kɑ bɛɛ.