Yinni Gusunɔ u derɑ
bɑrɑ disigirɑ Mɑriɑmu wɔri
12
1 Mɔwisi u kurɔ goo suɑ wi u sɑ̃ɑ Etiopigii. Yerɑ Mɑriɑmu kɑ Aroni bɑ Mɔwisi wĩimɔ. 2 Bɑ nɛɛ, Mɔwisi tɔnɑn min diyɑ Yinni Gusunɔ u rɑ kɑ Isirelibɑ gɑri ko? Aɑwo! U rɑ mɑɑ kɑ bu gɑri ko sɑɑ bɛsɛn min di.
Yerɑ Yinni Gusunɔ u gɑri yi nuɑ. 3 N deemɑ Mɔwisi u suuru mɔ too. Goo sɑri wi u nùn suuru kere hɑnduniɑ ye sɔɔ. 4 Mɑ Yinni Gusunɔ u Mɔwisi kɑ Aroni kɑ Mɑriɑmu sɔ̃ɔwɑ u nɛɛ, bɛɛ kpuro i doo nɛn kuu bekurugirɔ.
Mɑ bɑ dɑ mi. 5 Mɑ Yinni Gusunɔn tii u sɑrɑmɑ guru wii wuro te sɔɔ, u nɑ u yɔ̃rɑ win kuu ten kɔnnɔwɔ. Mɑ u Aroni kɑ Mɑriɑmu sokɑ. Mɑ be yiru ye, bɑ nɑ. 6 Mɑ u bu sɔ̃ɔwɑ u nɛɛ, i nɛn gɑri swɑɑ dɑkio. Nɛn sɔmɔ be bɑ wɑ̃ɑ bɛɛn suunu sɔɔ, kɑ̃siru sɔɔrɑ nɑ rɑ bu tii sɔ̃ɔsi, kpɑ n kɑ bu gɑri ko dosu sɔɔ. 7 Adɑmɑ n ǹ mɛ nɑ rɑ kɑ Mɔwisi nɛn sɔm kowo gɑri ko. Domi u sɑ̃ɑwɑ nɑɑnɛgii nɛn tɔmbu sɔɔ. 8 Nɔɔ kɑ nɔɔwɑ nɑ rɑ kɑ nùn gɑri ko, n ǹ mɑɑ mɔ kɑ̃siru sɔɔ nɑ rɑ nùn tii sɔ̃ɔsi. U rɑ mɑn wɑwɑ sɑ̃ɑ sɑ̃ɑ nge mɛ nɑ sɑ̃ɑ. Ǹ n mɛn nɑ, mbɑn sɔ̃nɑ i#ǹ bɛrum kue i kɑ nɛn sɔm kowo Mɔwisi wĩi.
9 Mɑ Yinni Gusunɔ u kɑ bu mɔru kuɑ. Yen biru u doonɑ. 10 Yerɑ guru wii wuro te, tɑ doonɑ. Mɑ Gusunɔ u derɑ bɑrɑ disigirɑ Mɑriɑmu wɔri u bɑu kpikisu yɑrɑ nge wɛ̃su. Mɑ Aroni u Mɑriɑmu mɛɛrɑ u deemɑ bɑrɑ disigirɑ tɑ nùn mwɑ. 11 Yerɑ Aroni u Mɔwisi sɔ̃ɔwɑ u nɛɛ, ɑ mɑn suuru kuo. A ku de su bɛsɛn torɑrun ɑre wɑ te sɑ kuɑ nge gɑri bɑkɑsu. 12 A ku de Mɑriɑmu u n sɑ̃ɑ nge bii wi bɑ mɑrɑ goru mɑ win wɑsin bee tiɑ yɑ kɔ̃sɑ.
13 Yerɑ Mɔwisi u Yinni Gusunɔ nɔɔgiru sue u nɛɛ, ɑ nùn bɛkio.
14 Mɑ Yinni Gusunɔ u nɛɛ, Mɑriɑmun tundo ù n nùn yɑ̃ɑtɑm sie wuswɑɑɔ bɑ#ǹ koo nùn kɛnusi ginɑ sɔ̃ɔ nɔɔbɑ yiru sekurun sɔ̃? Ǹ n mɛn nɑ, bu nùn yɑro sɑnsɑnin di sɔ̃ɔ nɔɔbɑ yiru, yen biru kpɑ bu kɑ nùn wurɑmɑ yɛnuɔ.