Kɛkɛ yi Isirelibɑn
guro gurobɑ wɛ̃ sɑ̃ɑ yerun sɔ̃
7
1 Sɑnɑm mɛ Mɔwisi u Yinni Gusunɔn kuu te girɑ u kpɑ, u tu gum yɛ̃kɑ, te kɑ ten dendi yɑ̃nu kpuro, tɑ n kɑ sɑ̃ɑ nɛnɛm Yinni Gusunɔn sɔ̃. Kɑ yɑ̃ku yee te kɑ ten dendi yɑ̃nu ye kpurowɑ u gum yɛ̃kɑ u wunɑ nɛnɛm Yinni Gusunɔn sɔ̃. 2 Yerɑ Isirelibɑn bwese kɛrɑ bɑɑyeren guro guro be bɑ rɑɑ tɔmbu gɑrɑ mi, bɑ susimɑ. 3 Ben bɑɑwure u kɑ win kɛ̃ru nɑ. Kɛ̃ɛ niyɑ nɛɛ wɔkurɑ yiru kɑ kɛkɛ nɔɔbɑ tiɑ ye nɛɛ gɑwe. Bɑ kɛkɛ yi wukiritii kuɑ. Wirugibu yiruwɑ bɑ mɛnnɑ bɑ kɛkɛ tiɑ kɑsu bɑ wɛ̃. Mɑ ben bɑɑwure u nɑɑ tiɑ wɛ̃. Mɑ bɑ kɑ ye nɑ Yinni Gusunɔn sɑ̃ɑ yerɔ. 4 Yinni Gusunɔ u Mɔwisi sɔ̃ɔwɑ u nɛɛ, 5 ɑ ye kpuro mɔɔ nɛn kuu ten sɔmburun sɔ̃, kpɑ ɑ ye Lefibɑ bɔnu kuɑ nge mɛ ben bɑɑwuren sɔmburɑ sɑ̃ɑ yu kɑ nùn somi.
6 Mɑ Mɔwisi u kɛkɛ be kɑ nɛɛ yi mwɑ mɑ u yi Lefibɑ wɛ̃. 7 U Gɛɛsɔnin bwese kɛrɑ kɛkɛ yiru wɛ̃ kɑ nɛɛ nnɛ ben sɔmburun sɔ̃. 8 U Mɛrɑrin bwese kɛrɑ kɛkɛ nnɛ wɛ̃ kɑ nɛɛ nɔɔbɑ itɑ, ben sɔmburun sɔ̃. N deemɑ Itɑmɑɑ yɑ̃ku kowo Aronin biiwɑ u bu kpɑre. 9 U#ǹ Kehɑtibɑ yen gɑɑ wɛ̃. Domi sɑ̃ɑ yerun dendi yɑ̃nun tiiwɑ be, bɑ rɑ sue ben senɔ.
Kɛ̃ɛ ni bɑ kuɑ sɑnɑm mɛ
bɑ yɑ̃ku yeru wukiɑmɔ
10 Dɔmɑ te bɑ yɑ̃ku yee te gum yɛ̃kɑ tɑ n kɑ sɑ̃ɑ nɛnɛm Yinni Gusunɔn sɔ̃, Isirelibɑn bwese kɛrin wirugibu bɑ kɑ ben kɛ̃nu nɑ yɑ̃ku yee ten wuswɑɑɔ. 11 Yinni Gusunɔ u Mɔwisi sɔ̃ɔwɑ u nɛɛ, ɑ de Isirelibɑn guro guro be, bu nɑ tiɑ tiɑ, ben bɑɑwure u n win kɛ̃ru mɔ u kɑ tu sɔ̃ɔsi yɑ̃ku yee ten sɔ̃, ben bɑɑwure u n win tɔ̃ru mɔ.
12-83 Wee nge mɛ bɑ kɑ kɛ̃ɛ ni nɑɑsinɑ.Tɔ̃ɔ gbiikiru Nɑsoni, Aminɑdɑbun bii, Yudɑn bweseru sɔɔ, wiyɑ u kɑ wigiru nɑ.Tɔ̃ru yiruse Nɛtɑnɛɛli, Suɑrin bii, Isɑkɑrin bweseru sɔɔ, u mɑɑ kɑ wigiru nɑ.Tɔ̃ru itɑse Eliɑbu, Helonin bii, Sɑbulonin bweseru sɔɔ, u mɑɑ kɑ wigiru nɑ.Tɔ̃ru nnɛse Elisuri, Sedeurin bii, Rubɛnin bweseru sɔɔ, u mɑɑ kɑ wigiru nɑ.Tɔ̃ru nɔɔbuse Selumiɛli, Surisɑdɑin bii, Simɛɔn bweseru sɔɔ, u mɑɑ kɑ wigiru nɑ.Tɔ̃ru nɔɔbɑ tiɑse Eliɑsɑfu, Dewɛlin bii, Gɑdin bweseru sɔɔ, u mɑɑ kɑ wigiru nɑ.Tɔ̃ru nɔɔbɑ yiruse Elisɑmɑ, Amihudun bii, Efɑrɑimun bweseru sɔɔ, u mɑɑ kɑ wigiru nɑ.Tɔ̃ru nɔɔbɑ itɑse Gɑmuliɛli, Pedɑsurin bii, Mɑnɑsen bweseru sɔɔ, u mɑɑ kɑ wigiru nɑ.Tɔ̃ru nɔɔbɑ nnɛse Abidɑni, Gideonin bii, Bɛnyɑmɛɛn bweseru sɔɔ, u mɑɑ kɑ wigiru nɑ.Tɔ̃ru wɔkuruse Akiesɛɛ, Amisɑdɑin bii, Dɑnun bweseru sɔɔ, u mɑɑ kɑ wigiru nɑ.Tɔ̃ru wɔkurɑ tiɑse Pɑgiɛli, Okirɑnin bii, Asɛɛn bweseru sɔɔ, u mɑɑ kɑ wigiru nɑ.Tɔ̃ru wɔkurɑ yiruse Ahirɑ, Enɑnin bii, Nɛfitɑlin bweseru sɔɔ, u mɑɑ kɑ wigiru nɑ.
Wee ye ben bɑɑwure u kɑ nɑ.Yerɑ gbɛ̃ɛru te bɑ kuɑ kɑ sii geesu, tèn bunum mu sɑ̃ɑ kilo tiɑ kɑ gɑrɑmu goobɑ wunɔbu (300), kɑ mɑɑ gbɛ̃ɛru gɑru te bɑ ko n dɑ kɑ yɛm yɛ̃ke. Bɑ mɑɑ te kuɑwɑ kɑ sii geesu. Ten bunum mu sɑ̃ɑwɑ gɑrɑmu nɑtɑ kɑ wunɔbu (700). Bɑ ni kpuron bunum yĩirɑwɑ kɑ sɑ̃ɑ yerun yĩirutiɑ. Mɑ bɑ gbɛ̃ɛnu yiru ye sɔɔ, som doke mɛ bɑ burinɑ kɑ gum bu kɑ yɑ̃kuru ko.Ben bɑɑwure u kɑ nɔrɑ wurɑgiɑ nɑ ye bɑ turɑre yibie. Nɔrɑ yen bunum mu sɑ̃ɑ gɑrɑmu wunɔbu (100).Bɑ mɑɑ kɑ kɛtɛ kinɛru kɑ yɑ̃ɑ kinɛru kɑ yɑ̃ɑ kpɛndu wɔ̃ɔ tiɑgiru nɑ. Ye itɑ kpurowɑ bɑ koo kɑ yɑ̃ku dɔ̃ɔ mwɑɑrɑrugiru ko,kpɑ bu kɑ boo kinɛru nɑ te bɑ koo kɑ torɑrun yɑ̃kuru ko,kɑ mɑɑ nɑɑ kinɛnu yiru kɑ yɑ̃ɑ kinɛnu nɔɔbu kɑ boo kinɛnu nɔɔbu kɑ yɑ̃ɑ kpɛmminu nɔɔbu wɔ̃ɔ tiɑginu ni bɑ koo kɑ siɑrɑbun yɑ̃kunu ko.
84 Kɛ̃ɛ ni bɑ kuɑ dɔmɑ te, yɑ̃ku yee ten sɔ̃, ni kpuron geerɑ kuɑwɑ gbɛ̃ɛnu wɔkurɑ yiru ni bɑ kuɑ kɑ sii geesu kɑ sere mɑɑ sii geesun gbɛ̃ɛnu gɑnu wɔkurɑ yiru ni bɑ ko n dɑ kɑ yɛm yɛ̃ke, kɑ mɑɑ nɔri wurɑgii wɔkurɑ yiru. 85 Gbɛ̃ɛ nin bɑɑteren bunum mu sɑ̃ɑwɑ kilo tiɑ kɑ gɑrɑmu goobɑ wunɔbu (300). Ni bɑ rɑ kɑ mɑɑ yɛm yɛ̃ke mi, nin teerun bunum mɑɑ sɑ̃ɑwɑ gɑrɑmu nɑtɑ kɑ wunɔbu (700). Gbɛ̃ɛ ni kpuron bunum mu kuɑwɑ kilo yɛndɑ nnɛ, nge mɛ bɑ rɑ yĩire sɑ̃ɑ yerɔ. 86 Nɔri wurɑgii yi, yin bɑɑyeren bunum mu sɑ̃ɑwɑ gɑrɑmu wunɔbu (100). Mɑ nɔri wɔkurɑ yiru ye kpuron bunum mu kuɑ kilo tiɑ kɑ gɑrɑmu goobu (200). Bɑ yin bɑɑyere turɑre yibie ye bɑ koo dɔ̃ɔ doke. 87 Yen biru bɑ yɑɑ sɑbenu wɛ̃. Niyɑ nɑɑ kinɛnu wɔkurɑ yiru kɑ yɑ̃ɑ kinɛnu wɔkurɑ yiru kɑ yɑ̃ɑ kpɛmminu wɔ̃ɔ tiɑginu wɔkurɑ yiru ni bɑ koo kɑ yɑ̃ku dɔ̃ɔ mwɑɑrɑruginu ko kɑ mɑɑ som mɛ bɑ rɑ kɑ yɑ̃ku te ko, kɑ mɑɑ boo kinɛnu wɔkurɑ yiru ni bɑ koo kɑ torɑnun yɑ̃kuru ko, 88 kɑ kɛtɛ kinɛnu yɛndɑ nnɛ, kɑ yɑ̃ɑ kinɛnu wɑtɑ kɑ boo kinɛnu wɑtɑ kɑ yɑ̃ɑ kpɛmminu wɔ̃ɔ tiɑginu wɑtɑ. Ni kpurowɑ bɑ koo kɑ siɑrɑbun yɑ̃kunu ko. Kɛ̃ɛ niniwɑ bɑ kuɑ sɑnɑm mɛ bɑ yɑ̃ku yee te gum yɛ̃kɑ tɑ n kɑ sɑ̃ɑ nɛnɛm Gusunɔn sɔ̃.
89 Sɑnɑm mɛ Mɔwisi u duɑ Yinni Gusunɔn kuu ten mi, u Yinni Gusunɔn nɔɔ nɔɔmɔ. Nɔɔ ge, gɑ weewɑ wɔllun kɔ̃sobun weenɑsibu yiru yen bɑɑ sɔɔn di, ye yɑ wɑ̃ɑ woodɑn kpɑkoro ten wukiritiɑn wɔllɔ. Min diyɑ Gusunɔ u kɑ nùn gɑri mɔ̀.