Nge mɛ bɑ koo fitilɑnu yiisinɑ
8
1 Yinni Gusunɔ u Mɔwisi sɔ̃ɔwɑ u nɛɛ, ɑ Aroni sɔ̃ɔwɔ ɑ nɛɛ, 2 ù n fitilɑnu nɔɔbɑ yiru ye doke dɑbu ge sɔɔ, u de nu n yɑm bururɑsie wuswɑɑɔ.
3 Mɑ Aroni u kuɑ mɛ. U nu doke doke dɑbu gen wuswɑɑɔ nge mɛ Yinni Gusunɔ u nùn sɔ̃ɔwɑ. 4 Bɑ dɑbu ge kuɑwɑ kɑ wurɑ bɔri tiɑ sɑɑ gen wɔllun di sere n kɑ dɑ temɔ, kɑ sere burɑ ni bɑ gu kuɑ. Mɔwisi u derɑ bɑ gu kuɑwɑ nge mɛ Yinni Gusunɔ u nùn sɔ̃ɔsi.
Bɑ Lefibɑ wunɑ nɛnɛm
Yinni Gusunɔn sɔmburun sɔ̃
5 Yinni Gusunɔ u Mɔwisi sɔ̃ɔwɑ u nɛɛ, 6 ɑ Lefibɑ wunɔ Isirelibɑn suunu sɔɔn di kpɑ ɑ bu dɛɛrɑsiɑ. 7 Wee nge mɛ kɑɑ ko ɑ kɑ bu dɛɛrɑsiɑ. Kɑɑ bu nim yɛ̃kɑwɑ mɛ mu koo ben torɑnu wukiri. Kpɑ ɑ de bu ben wɑsin sɑnsu kɔni. Kpɑ bu ben yɑ̃nu teɑ kpɑ bu tii dɛɛrɑsiɑ. 8 Yen biru bɑ koo kɛtɛ kinɛ kpɛmbu suɑ kɑ som mɛ bɑ kɑ gum burinɑ kɑ kɛtɛ kinɛ kpɛmbu gɑgu bu kɑ torɑrun yɑ̃kuru ko. 9 Kpɑ ɑ Isirelibɑ kpuro mɛnnɑ kuu ten kɔnnɔwɔ, kpɑ ɑ de Lefibɑ bu susimɑ 10 nɛ, Yinni Gusunɔn wuswɑɑɔ, kpɑ Isirelibɑ bu ben nɔmɑ sɔndi Lefi ben wiru wɔllɔ. 11 Kpɑ Aroni u Lefi be sɔ̃ɔsi beri berikɑ nɛ, Yinni Gusunɔn wuswɑɑɔ nge yɑ̃kuru te Isirelibɑ bɑ kɑ nɑ. Sɑɑ ye sɔɔ, bɑ bu wunɑwɑ mi nɛnɛm nɛn sɔmburun sɔ̃. 12 Lefibɑ bɑ koo mɑɑ ben nɔmɑ sɔndi kɛtɛ kinɛ nin wiru wɔllɔ. Yen biru kpɑ Aroni u teeru go ben torɑrun suurun sɔ̃ kpɑ u kɑ teeru yɑ̃ku dɔ̃ɔ mwɑɑrɑrugiru ko u sere bu dɛɛrɑsiɑbun woronu koosi. 13 Kɑɑ de Lefibɑ kpuro bu se bu yɔ̃rɑ Aroni kɑ win bibun wuswɑɑɔ, kpɑ ɑ bu sɔ̃ɔsi beri berikɑ nge yɑ̃kuru nɛ, Yinni Gusunɔn wuswɑɑɔ. 14 Kɑɑ Lefibɑ wunɑwɑ nɛnɛm Isirelibɑn suunu sɔɔn di, kpɑ bɑ n wɑ̃ɑ nɛn sɔmburun sɔ̃. 15 Yenibɑn biru bɑ koo sɔmburu ko nɛn sɑ̃ɑ yerɔ. Kɑɑ bu dɛɛrɑsiɑwɑ kpɑ ɑ bu sɔ̃ɔsi beri berikɑ nge yɑ̃kuru. 16 Domi bɑ mɑn bu wɛ̃wɑ mɑm mɑm bɑ kuɑ Isirelibɑn bii gbiikobu kpuron kɔsire. 17 Ben bii gbiikobu kpuro bɑ sɑ̃ɑwɑ nɛgibu sɑɑ tɔmbun bii gbiikobun di n kɑ dɑ yɑɑ sɑbenun binɔ. Nɑ bu wunɑwɑ nɛnɛm bɑ kuɑ nɛgibu, sɑɑ mìn di nɑ bii gbiikobu go Egibitiɔ. 18 Nɑ Lefibɑ mwɑ Isirelibɑn bii gbiikobun ɑyerɔ. 19 Nɑ bu wunɑwɑ nɑ Aroni kɑ win bibu wɛ̃, bu kɑ sɔmburu ko Isirelibɑn sɔ̃ sɑ̃ɑ yerɔ, kpɑ bɑ n sɑ̃ɑ nge yɑ̃kuru te Isirelibɑ bɑ wɛ̃ ben torɑnun sɔ̃. Sɑɑ ye sɔɔ, Isireli be, bɑ#ǹ susimɔ nɛn kuu ten bɔkuɔ n sere bu go.
20 Mɔwisi kɑ Aroni kɑ Isirelibɑ kpuro bɑ kuɑ mɑm mɑm ye Yinni Gusunɔ u geruɑ Lefibɑn sɔ̃. 21 Lefibɑ bɑ tii dɛɛrɑsiɑ bɑ ben yɑ̃nu teɑ, mɑ Aroni u bu sɔ̃ɔsi beri berikɑ nge yɑ̃kuru. Mɑ u bu torɑrun suuru kɑ dɛɛrɑsiɑbun woronu koosi. 22 Yen biruwɑ Lefi be, bɑ nɑ Yinni Gusunɔn kuu ten mi, bɑ ben sɔmburu toruɑ Aroni kɑ win bibun nɔni biru, nge mɛ Yinni Gusunɔ u Mɔwisi sɔ̃ɔwɑ u ko ben sɔ̃.
23 Yinni Gusunɔ u mɑɑ Mɔwisi sɔ̃ɔwɑ u nɛɛ, 24 Lefi be bɑ wɔ̃ɔ yɛndɑ nɔɔbu mɔ kɑ be bɑ kere mɛ, beyɑ bɑ koo sɔmburu ko nɛn kuu te sɔɔ. 25 Be bɑ wɔ̃ɔ weerɑɑkuru turɑ, bɑ koo yɑriwɑ ben sɔmburun di mɑm mɑm. Bɑ#ǹ mɑɑ mɑn sɔmburu kuɑmmɛ. 26 Bɑ ko n dɑ ben Lefisibu somi bɑ̀ n sɔmburu mɔ̀. Adɑmɑ ben tii bɑ#ǹ ko n mɑɑ sɔmburu mɔ mi. Nge mɛyɑ kɑɑ Lefibɑ kuɑ ben sɔmburun swɑɑ sɔɔ.