Lefin bweserun sɔmburu
3
1 Tɔn be bɑ wɑ̃ɑ Aroni kɑ Mɔwisin bwese kɛrɑ sɔɔ sɑnɑm mɛ Yinni Gusunɔ u kɑ Mɔwisi gɑri kuɑ Sinɑiɔ, ben yĩsɑ wee. 2 Bibu nnɛwɑ Aroni u mɔ. Gbiikoon yĩsirɑ Nɑdɑbu. Be bɑ mɑɑ tie berɑ, Abihu kɑ Eleɑsɑɑ kɑ Itɑmɑɑ. 3 Be kpurowɑ bɑ gum tɑ̃re bu kɑ ko yɑ̃ku kowobu, mɑ bɑ bu yi nɛnɛm sɔmbu ten sɔ̃. 4 Adɑmɑ Nɑdɑbu kɑ Abihu bɑ gu sɑ̃ɑ yerun kɔnnɔwɔ Sinɑin gbɑburɔ sɑnɑm mɛ bɑ kɑ Yinni Gusunɔ turɑre tukɑ dɑɑwɔ bu kɑ yɑ̃kunu ko. N deemɑ ben goo kun bii mɑrɑ. Mɑ n tiɑ Eleɑsɑɑ kɑ Itɑmɑɑ kɑ sere ben bɑɑbɑ Aroni wi u rɑ n bu kpɑre yɑ̃ku kobun sɔmburu sɔɔ.
5 Yerɑ Yinni Gusunɔ u Mɔwisi sɔ̃ɔwɑ u nɛɛ, 6 ɑ de Lefin bibun bweseru tu nɑ kpɑ ɑ tu Aroni nɔmu sɔndiɑ sɔmbu ten sɔ̃. 7 Bɑ ko n dɑ n wɑ̃ɑwɑ Gusunɔn kurun kɔnnɔwɔ bu kɑ ten sɔmburu ko Aroni kɑ Isirelibɑ kpuron ɑyerɔ. 8 Beyɑ bɑ koo kuu te, kɑ ten dendi yɑ̃nu kpuron sɔmburu ko Isirelibɑn ɑyerɔ. 9 Kɑɑ woodɑ wɛ̃wɑ ɑ nɛɛ, Aroni kɑ win bibɑ bɑ ko n Lefibɑ mɔ bu kɑ sɑ̃ɑ yee ten sɔmburu ko. 10 Adɑmɑ Aroni kɑ win bibu tɔnɑwɑ bɑ koo yɑ̃kuru ko. Goo ù n yɑ̃kuru kuɑ, mɑ n kun be, bɑ koo yɛ̃ro gowɑ.
11 Yinni Gusunɔ u mɑɑ Mɔwisi sɔ̃ɔwɑ u nɛɛ, 12 wee nɑ Lefibɑ wunɑ Isirelibɑn suunu sɔɔn di bɑ n kɑ sɑ̃ɑ Isirelibɑn bii tɔn durɔ gbiikobun kɔsire, kpɑ bu ko nɛgibu. 13 Domi sɑɑ mìn di nɑ Egibitigibun bii gbiikobu go, sɑɑ min diyɑ nɑ Isirelibɑn bii gbiikobu kɑ ben yɑɑ sɑbenun bii gbiikinu tii yiiyɑ. Mɑ bɑ kuɑ nɛgibu. Nɛnɑ Yinni Gusunɔ.
Bɑ gɑri gɑri kuɑ Lefibɑn
bweseru sɔɔ nɔn gbiikiru
14 Yinni Gusunɔ u kpɑm Mɔwisi sɔ̃ɔwɑ Sinɑin gbɑburɔ u nɛɛ, 15 ɑ Lefin bibun bweseru gɑrio yɛnu kɑ yɛnu, bweseru kɑ bweseru. Ben tɔn durɔ bɑɑwurewɑ kɑɑ gɑri sɑɑ be bɑ suru tiɑ mɔn di sere kɑ be bɑ kere mɛ.
16 Mɑ Mɔwisi u bu gɑrɑ nge mɛ Yinni Gusunɔ u geruɑ.
17 Be bɑ sɑ̃ɑ Lefin bibu berɑ, Gɛɛsɔni kɑ Kehɑti kɑ Mɛrɑri. 18 Be bɑ sɑ̃ɑ Gɛɛsɔnin bibu kɑ ben bweseru berɑ, Libini kɑ Simɛi. 19 Be bɑ sɑ̃ɑ Kehɑtin bibun bweseru berɑ, Amurɑmu kɑ Yisehɑri kɑ Heboroni kɑ Usiɛli. 20 Be bɑ mɑɑ sɑ̃ɑ Mɛrɑribɑ kɑ ben bweseru berɑ, Mɑkili kɑ Musi. Beni kpurowɑ bɑ sɑ̃ɑ Lefin bibun bweseru.
21 Gɛɛsɔnin min diyɑ Libinin bweseru kɑ Simɛin bweseru tɑ yɑrɑ. 22 Tɔn durɔ be bɑ gɑrɑ be bɑ suru tiɑ mɔ kɑ be bɑ kere mɛ Gɛɛsɔnin bweseru sɔɔ ben geerɑ kuɑwɑ tɔmbu nɔrɔbun subɑ nɔɔbɑ yiru kɑ nɛɛrɑ wunɔbu (7.500). 23 Gɛɛsɔnibɑ bɑ rɑ ben sɑnsɑni girewɑ Yinni Gusunɔn kurun biruɔ sɔ̃ɔ duu yeru giɑ. 24 Ben kpɑron yĩsirɑ Eliɑsɑfu, Lɑɛlin bii. 25 Ye Gɛɛsɔnin bweseru tɑ ko n dɑ ko kuu bekurugii te sɔɔ yerɑ, kuu ten beku kɑrenu ni bɑ koo doke ten sɔɔwɔ kɑ ten tɔɔwɔ kɑ ten kɔnnɔwɔ 26 kɑ ten yɑɑrɑɔ kɑ yɑɑrɑ yen kɔnnɔwɔ kɑ sere mɑɑ ten wɛ̃ɛ kpuro.
27 Kehɑtin min diyɑ Amurɑmugibu kɑ Yisehɑrigibu kɑ Heboronigibu kɑ Usiɛligibun bwese kɛri mɑɑ yɑrɑ. 28 Tɔn durɔ be bɑ gɑrɑ Kehɑtin bwese te sɔɔ, be bɑ suru tiɑ mɔ kɑ be bɑ kere mɛ, ben geerɑ kuɑwɑ tɔmbu nɔrɔbun subɑ nɔɔbɑ itɑ kɑ nɑtɑ (8.600). 29 Kehɑtibɑ bɑ rɑ ben sɑnsɑni girewɑ kuu ten sɔ̃ɔ yɛ̃sɑn nɔm geu giɑ. 30 Ben kpɑron yĩsirɑ Elisɑfɑni, Usiɛlin bii. 31 Kehɑti berɑ bɑ ko n dɑ woodɑn kpɑkoro ten sɔmburu ko kɑ tɑbulu ye, kɑ dɑbu ge, kɑ yɑ̃ku yenu kɑ kuu ten dendi yɑ̃nu kpuro kɑ dii dɛɛrɑrun beku kɑre te. Beyɑ bɑ ko n dɑ ye kpuron sɔmburu ko.
32 Wi u sɑ̃ɑ Lefibɑ kpuron guro guro wiyɑ, Eleɑsɑɑ, Aroni yɑ̃ku kowon bii. Wiyɑ u tɔn be kpuro kpɑre be bɑ sɑ̃ɑ yee ten sɔmɑ mɔ̀.
33 Mɛrɑrin min diyɑ Mɑkiligibu kɑ Musigibun bweserɑ yɑrɑ. 34 Tɔn durɔ be bɑ gɑrɑ be bɑ suru tiɑ mɔ kɑ be bɑ kere mɛ, ben geerɑ kuɑwɑ tɔmbu nɔrɔbun subɑ nɔɔbɑ tiɑ kɑ goobu (6.200). 35 Ben kpɑron yĩsirɑ Suriɛli, Abihɑilin bii. Bɑ rɑ ben sɑnsɑni girewɑ sɔ̃ɔ yɛ̃sɑn nɔm geu giɑ. 36 Beyɑ bɑ Yinni Gusunɔn kuu ten dɑ̃ɑ bɛsi kɑ ten dɑ̃ɑ pɔɔsi kɑ ten gberebɑ kɑ ten yɔ̃rɑtii kɑ ten sɔm yɑ̃nu kpuro nɔmu sɔndiɑ, 37 kɑ sere ten kɑrɑ dɑ̃nu kɑ ten yɔ̃rɑtii kɑ ten kurumbɑ kɑ ten wɛ̃ɛ.
38 Mɔwisi kɑ Aroni kɑ win bibu bɑ rɑ ben sɑnsɑni girewɑ kuu ten kɔnnɔwɔ sɔ̃ɔ yɑri yeru giɑ. Domi beyɑ bɑ ko n dɑ sɔmburu ko kuu te sɔɔ Isirelibɑn sɔ̃ kpɑ bɑ n tu kɔ̃su tɔn tuko goo u ku rɑɑ kɑ tu susin sɔ̃, kpɑ u ku rɑɑ gbi.
39 Lefi tɔn durɔ be Mɔwisi kɑ Aroni bɑ gɑrɑ be bɑ suru tiɑ mɔ kɑ be bɑ kere mɛ, nge mɛ Yinni Gusunɔ u geruɑ, ben geerɑ sɑ̃ɑwɑ tɔmbu nɔrɔbun subɑ yɛndɑ yiru (22.000).
Bii gbiikobun yɑkiɑbu
40 Yinni Gusunɔ u kpɑm Mɔwisi sɔ̃ɔwɑ u nɛɛ, ɑ Isirelibɑn bii tɔn durɔ gbiikobu gɑrio sɑɑ be bɑ suru tiɑ mɔn di sere kɑ be bɑ kere mɛ, kpɑ ɑ bu gɑri bɑɑwure kɑ win yĩsiru. 41 Yen biru, kpɑ ɑ Lefibɑ wunɑ ɑ yi nɛnɛm bɑ n sɑ̃ɑ nɛ Yinni Gusunɔgibu Isirelibɑn bii gbiikobun ɑyerɔ. Mɛyɑ kɑɑ mɑɑ mɑn ben yɑɑ sɑbenu yiiyɑ Isirelibɑn yɑɑ sɑbenun bii gbiikinun ɑyerɔ.
42 Mɑ Mɔwisi u Isirelibɑn bii gbiikoo be gɑrɑ nge mɛ Yinni Gusunɔ u nùn sɔ̃ɔwɑ u ko. 43 Mɑ be kpuron geerɑ kuɑ tɔnu nɔrɔbun subɑ yɛndɑ yiru kɑ goobu kɑ wɑtɑ kɑ wɔkurɑ itɑ (22.273).
44 Yinni Gusunɔ u kpɑm Mɔwisi sɔ̃ɔwɑ u nɛɛ, 45 ɑ Lefibɑ wunɔ nɛnɛm kpɑ bu ko bii gbiikoo be kpuron kɔsire. Mɛyɑ kɑɑ mɑɑ ko kɑ ben yɑɑ sɑbenu kpuro, nu ko Isirelibɑn yɑɑ sɑbenun buu gbiikuu bɑɑgeren kɔsire. Bɑ ko n wɑ̃ɑwɑ nɛn sɔ̃. Nɛnɑ Yinni Gusunɔ. 46 Bɑ̀ n kĩ bu Isirelibɑn bii gbiikobu goobu kɑ wɑtɑ kɑ wɔkurɑ itɑ (273) be bɑ Lefibɑ dɑbiru kere mi yɑkiɑ, 47 sii geesun gobi nɔɔbuwɑ kɑɑ mwɑ ben bɑɑwuren wɔllɔ. Gobi yin tiɑn bunum mu sɑ̃ɑwɑ gɑrɑmu wɔkuru nge mɛ bɑ kɑ yi dimɔ sɑ̃ɑ yerɔ. 48 Aroni kɑ win bibɑ kɑɑ yi nɔmu bɛriɑ bu kɑ Isirelibɑn bii gbiikobu yɑkiɑ be bɑ Lefibɑ dɑbiru kere.