Kehɑtin bwese kɛrɑn sɔmburu
4
1 Yinni Gusunɔ u Mɔwisi kɑ Aroni sɔ̃ɔwɑ u nɛɛ, 2 i Kehɑtin bweserun tɔmbu gɑrio Lefin bibun bweseru sɔɔ, yɛnu kɑ yɛnu, 3 sɑɑ be bɑ wɔ̃ɔ tɛnɑ mɔn di n kɑ girɑri be bɑ mɔ wɔ̃ɔ weerɑɑkurɔ, be bɑ koo kpĩ bu Yinni Gusunɔn kuu ten sɔmburu ko. 4 Sɑ̃ɑ yerun dii te tɑ dɛɛre gem gem sɔɔrɑ bɑ koo sɔmburu ko. Sɔmbu te bɑ koo ko wee. 5 Bɑ̀ n seewɑ bɑ doonɔ, Aroni kɑ win bibɑ bɑ koo beku kɑre te sɔsiɑ te tɑ wɑ̃ɑ dii te tɑ dɛɛre gem gem kɔnnɔwɔ, kpɑ bu tu woodɑn kpɑkoro te wukiri. 6 Ten wɔllɔwɑ bɑ koo gɔni dɑmgii tɛriɑ kpɑ bu mɑɑ yin wɔllɔ beku boogugiru sɔndi kpɑ bu sere kpɑkoro ten nɛnutii wɑsi. 7 Bɑ koo beku boogugiru tɛriɑwɑ tɑbulu yen wɔllɔ mi bɑ rɑ pɛ̃ɛ sɔndi kpɑ bu yen wɔllɔ gbɛ̃ɛnu sɔndi kɑ nɔri kɑ pɛrɛntibɑ kɑ tɑm kpɑrɑbɑnu, kpɑ bu ku de pɛ̃ɛ yu biɑrɑ mi bɑɑdommɑ. 8 Yen biruwɑ bɑ koo ye kpuron wɔllɔ beku wunɔmgiru wukiri kpɑ bu gɔni dɑmgii sɔndi. Bɑ̀ n kpɑ, kpɑ bu tɑbulu yen nɛnutii wɑsi. 9 Yen biru, bɑ koo mɑɑ beku boogugiru suɑ bu dɑbu ge wukiri kɑ gen fitilɑnu kɑ gen bɑkusu kɑ gen torom gurɑtii kɑ gum kpɑrɑbɑnu, gen dendi yɑ̃nu kpuro gesi. 10 Bɑ koo dɑbu ge, kɑ gen dendi yɑ̃ɑ ni kpuro dokewɑ bɔɔru sɔɔ te bɑ kuɑ kɑ gɔni dɑmgiɑ. Yen biru, kpɑ bu tu sɑ̃ɑrusiɑ dɑ̃ɑ pɔturɑ sɔɔ ye bɑ koo kɑ tu suɑ. 11 Kpɑ bu mɑɑ beku boogugiru suɑ bu wukiri kpɑkoro ten wɔllɔ mi bɑ rɑ turɑre dɔ̃ɔ doke kpɑ bu mɑɑ tu gɔni dɑmgii wukiri. Yen biru, kpɑ bu ten nɛnutii wɑsi. 12 Kpɑ bu kuu ten dendi yɑ̃nu kpuro suɑ bu nu kure kɑ beku boogugiru. Yen biru, kpɑ bu nu doke bɔɔru sɔɔ te bɑ kuɑ kɑ gɔni dɑmgii kpɑ bu bɔɔ te sɑ̃ɑrusiɑ dɑ̃ɑ pɔturɑ sɔɔ ye bɑ koo kɑ tu suɑ. 13 Kpɑ bu mɑɑ torom gurɑ yɑ̃ku yerun di. Yen biru, kpɑ bu tu beku wunɔmgiru wukiri. 14 Ten wɔllɔwɑ bɑ koo ten dendi yɑ̃ɑ ni kpuro doke. Niyɑ, dɔ̃ɔ gurɑtii kɑ kɑɑto donnuginu kɑ kɑɑto ni nu tie kɑ gbɛ̃ɛ ni bɑ rɑ kɑ yɛm yɛ̃ke, kpɑ bu ye gɔni dɑmgii wukiri. Yen biru, kpɑ bu yen nɛnutii wɑsi. 15 Aroni kɑ win bibu bɑ̀ n dendi yɑ̃ɑ ni kpuro wukiri bɑ kpɑ, Kehɑtin bweserɑ tɑ koo nɑ tu nu suɑ tu sɔbe. Adɑmɑ tu ku rɑɑ dendi yɑ̃ɑ nin tii bɑbɑ bɑ̀ kun nu bekuru wukiri kpɑ tu ku rɑɑ gbi. Isirelibɑ bɑ̀ n seewɑ bɑ swɑɑ wɔri, Kehɑtin bwese terɑ tɑ ko n dɑ sɑ̃ɑ yɑ̃ɑ ni sɔbe. 16 Eleɑsɑɑ, Aroni yɑ̃ku kowon biiwɑ u ko n dɑ mɑɑ dɑbu gen gum gɑri yɛ̃, kɑ sere turɑre nubu durorugiɑ ye, kɑ bururu kɑ yokɑn yɑ̃ku te bɑ rɑ ko tɔ̃ɔ bɑɑtere kɑ gum mɛ bɑ rɑ gɑ̃ɑnu tɑ̃re bu kɑ nu gɔsi bu yi nɛnɛm nɛ, Yinni Gusunɔn sɔ̃. Wiyɑ u koo nɛ, Yinni Gusunɔn kuu te nɔni doke kɑ ye yɑ wɑ̃ɑ te sɔɔ.
17 Yinni Gusunɔ u mɑɑ Mɔwisi kɑ Aroni sɔ̃ɔwɑ u nɛɛ, 18-19 i de i Kehɑtin bweseru nɔni doke kpɑ tu ku rɑɑ gbi tɑ̀ n sɑ̃ɑ yɑ̃ɑ nin sɔmburu mɔ̀. Wee mɛ kɑɑ ko. Wunɛ Aroni kɑ wunɛn bibu, i ko i kɑ bɑɑwure dɑwɑ win ɑyerɔ kpɑ i nùn sɔ̃ɔsi yɑ̃ɑ nìn sɔmburu u koo ko. 20 Bu ku rɑɑ du mi, bu kɑ sɑ̃ɑ yee ten dendi yɑ̃nu kpuro mɛɛri kpɑ nɛ, Yinni Gusunɔ n ku rɑ bu go.
Gɛɛsɔnin bwese kɛrɑn
sɔmburu
21 Yinni Gusunɔ u Mɔwisi sɔ̃ɔwɑ u nɛɛ, 22 ɑ Gɛɛsɔnin bwese kɛrɑn tɔmbu gɑrio yɛnu kɑ yɛnu. 23 Kɑɑ bu gɑriwɑ sɑɑ be bɑ wɔ̃ɔ tɛnɑ mɔn di sere n kɑ girɑri be bɑ mɔ wɔ̃ɔ weerɑɑkurɔ, be bɑ koo kpĩ bu gesi sɑ̃ɑ yee ten sɔmburu ko. 24 Wee sɔmbu te Gɛɛsɔnin bweseru tɑ koo ko. 25 Tɑ ko n dɑ kuu ten bekɑ sɔbewɑ kɑ ten gɔni dɑmgii yi bɑ rɑ wukiri wɔllɔ kɑ sere ten kɔnnɔn beku kɑre te, 26 kɑ ten yɑɑrɑn bekɑ kɑ yen kɔnnɔn beku kɑreru kɑ ten wɛ̃ɛ kɑ ten sɔm yɑ̃ɑ ni nu tie. Ye kpuron sɔmburɑ bɑ koo ko. 27 Gɛɛsɔnin bweseru tɑ̀ n sɔmburu mɔ̀, Aroni kɑ win bibɑ bɑ koo tu nɔni doke, beyɑ bɑ koo tu sɔ̃ yè tɑ koo ko. 28 Sɔmɑ ye kpurowɑ Gɛɛsɔnin bweseru tɑ koo ko. Itɑmɑɑ, yɑ̃ku kowo, Aronin biiwɑ u koo bu kpɑrɑ.
Mɛrɑrin bwese kɛrɑn sɔmburu
29 Yinni Gusunɔ u mɑɑ Mɔwisi sɔ̃ɔwɑ u nɛɛ, ɑ Mɛrɑrin bwese kɛrɑn tɔmbu gɑrio yɛnu kɑ yɛnu. 30 Kɑɑ ben tɔn durɔbu gɑriwɑ sɑɑ be bɑ wɔ̃ɔ tɛnɑ mɔn di n kɑ dɑ be bɑ mɔ wɔ̃ɔ weerɑɑkurɔ, be bɑ koo kpĩ bu gesi kuu ten sɔmburu ko. 31 Wee sɔmbu te bɑ koo bu nɔmu bɛriɑ. Beyɑ bɑ ko n dɑ kuu ten dɑ̃ɑ bɛsi sɔbe kɑ ten dɑ̃ɑ pɔɔsi kɑ ten gberebɑ kɑ ten yɔ̃rɑtii, 32 kɑ mɑɑ ten yɑɑrɑn kɑrɑ dɑ̃nu kɑ ten yɔ̃rɑtii kɑ ten kurumbɑ kɑ ten wɛ̃ɛ kɑ sere ten dendi yɑ̃ɑ ni nu tie. Bɑ koo bɑɑwure wɛ̃wɑ ye u koo sɔbe. 33 Sɔmɑ yeniwɑ Mɛrɑrin bwese kɛrɑ yɑ ko n dɑ ko kuu te sɔɔ. Itɑmɑɑ yɑ̃ku kowo Aronin biiwɑ u koo bu nɔni doke.
Bɑ Lefibɑ gɑrɑ be bɑ koo kpĩ
bu kuu ten sɔmburu ko
34-49 Mɔwisi kɑ Aroni kɑ Isirelibɑn yɛnu yɛ̃robu bɑ Lefibɑn bwese kɛri yinin tɔmbu gɑrɑ, yiyɑ, Kehɑti kɑ Gɛɛsɔni kɑ Mɛrɑri. Bɑ bu gɑrɑwɑ yɛnu kɑ yɛnu sɑɑ be bɑ wɔ̃ɔ tɛnɑ mɔn di sere n kɑ dɑ be bɑ mɔ wɔ̃ɔ weerɑɑkurɔ, be bɑ koo kpĩ bu sɔmburu ko kuu te sɔɔ gesi nge mɛ Yinni Gusunɔ u Mɔwisi sɔ̃ɔwɑ.Be bɑ gɑrɑ Kehɑtin bweseru sɔɔ, ben geerɑ kuɑwɑ tɔmbu nɔrɔbun subɑ yiru kɑ nɑtɑ kɑ wunɔbu kɑ weerɑɑkuru (2.750).Gɛɛsɔnin bweseru sɔɔ mɑɑ, ben geerɑ kuɑwɑ tɔmbu nɔrɔbun subɑ yiru kɑ nɑtɑ kɑ tɛnɑ (2.630).Mɛrɑrin bweseru sɔɔ, ben geerɑ mɑɑ kuɑ tɔmbu nɔrɔbun subɑ itɑ kɑ goobu (3.200). Mɑ Lefibɑ kpuron geerɑ kuɑ tɔmbu nɔrɔbun subɑ nɔɔbɑ itɑ kɑ nɛɛrɑ wunɔbu kɑ wɛnɛ (8.580).
Bɑ ben bɑɑwure sɔ̃ɔwɑ ye u koo ko kɑ ye u koo sɔbe nge mɛ Yinni Gusunɔ u Mɔwisi sɔ̃ɔwɑ.