Nge mɛ Isirelibɑ
bɑ koo kɑ sinɑsinɑ ben sɑnsɑniɔ
2
1 Yinni Gusunɔ u Mɔwisi kɑ Aroni sɔ̃ɔwɑ u nɛɛ, 2 Isirelibɑ bɑ̀ n ben sɑnsɑni girɑmɔ, ben bɑɑwure u koo win kuru girɑwɑ win bweserun gidi bɔrɑn bɔkuɔ. Bɑ koo ben kuu ni girɑwɑ bu kɑ nɛ, Yinni Gusunɔn kuu te sikerenɑ, kpɑ begii ni, nu n kɑ tu dɛsire fiiko.
3 Sɔ̃ɔ yɑri yeru giɑrɑ Yudɑbɑ bɑ koo ben sɑnsɑni girɑ ben gidi bɔrɑn bɔkuɔ be, kɑ ben tɑbu kowobu.Ben tɑbu sunɔn yĩsirɑ Nɑsoni, Aminɑdɑbun bii. 4 Win tɑbu kowobun geerɑ sɑ̃ɑwɑ nɔrɔbun subɑ wɑtɑ kɑ wɔkurɑ nnɛ kɑ nɑtɑ (74.600). 5-7 Be bɑ ko n wɑ̃ɑ ben wuuru sɔɔ berɑ, Isɑkɑrin bwese kɛrɑ kɑ Sɑbulonin bwese kɛrɑ.Isɑkɑrin tɑbu sunɔn yĩsirɑ Nɛtɑnɛɛli, Suɑrin bii. Win tɑbu kowobun geerɑ sɑ̃ɑwɑ nɔrɔbun subɑ weerɑɑkuru kɑ nnɛ kɑ nɛɛru (54.400).Sɑbulonibɑn tɑbu sunɔn yĩsirɑ Eliɑbu, Helonin bii. 8 Win tɑbu kowobun geerɑ sɑ̃ɑwɑ nɔrɔbun subɑ weerɑɑkuru kɑ nɔɔbɑ yiru kɑ nɛɛru (57.400). 9 Be kpurowɑ bɑ sɑ̃ɑ Yudɑbɑn tɑbu kowobu mɑ ben geerɑ kuɑ nɔrɔbun subɑ wunɔbu kɑ wɛnɛ kɑ nɔɔbɑ tiɑ kɑ nɛɛru (186.400).Isirelibɑ bɑ̀ n sɑnum seewɑ, berɑ bɑ ko n dɑ gbi.
10 Sɔ̃ɔ yɛ̃sɑn nɔm dwɑru giɑrɑ Rubɛnibɑ bɑ koo ben sɑnsɑni girɑ ben gidi bɔrɑn bɔkuɔ be, kɑ ben tɑbu kowobu.Ben tɑbu sunɔn yĩsirɑ Elisuri, Sedeurin bii. 11 Ben tɑbu kowobun geerɑ sɑ̃ɑwɑ tɔmbu nɔrɔbun subɑ weeru kɑ nɔɔbɑ tiɑ kɑ nɛɛrɑ wunɔbu (46.500). 12-14 Be bɑ ko n wɑ̃ɑ ben wuuru sɔɔ, berɑ Simɛɔn bwese kɛrɑ kɑ Gɑdin bwese kɛrɑ.Simɛɔbɑn tɑbu sunɔn yĩsirɑ Selumiɛli, Surisɑdɑin bii. Ben tɑbu kowobu bɑ sɑ̃ɑwɑ tɔmbu nɔrɔbun subɑ weerɑɑkuru kɑ nɔɔbɑ nnɛ kɑ goobɑ wunɔbu (59.300).Gɑdigibun tɑbu sunɔn yĩsirɑ Eliɑsɑfu, Dewɛlin bii. 15 Ben tɑbu kowobɑ sɑ̃ɑwɑ tɔmbu nɔrɔbun subɑ weeru kɑ nɔɔbu kɑ nɑtɑ kɑ weerɑɑkuru (45.650). 16 Be kɑ Rubɛnin tɑbu kowobu kpuro bɑ sɑ̃ɑwɑ tɔmbu nɔrɔbun subɑ wunɔbu kɑ weerɑɑkuru kɑ tiɑ kɑ nɛɛru kɑ weerɑɑkuru (151.450).Beyɑ bɑ koo ko yiruse bɑ̀ n swɑɑ wɔriɔ.
17 Yen biru, Lefibɑ bɑ koo Yinni Gusunɔn kuru suɑ kpɑ bɑ n wɑ̃ɑ tɑbu kowo wuunu yiru ye yɑ gbiɑ kɑ wuunu yiru ye yɑ wɑ̃ɑ biruɔn suunu sɔɔ. Ben tii bɑ ko n swĩinɛwɑ nge mɛ bɑ rɑ kɑ sinɛ sinɛ bɑ̀ n sɑnsɑni girɑmɔ. Ben bɑɑwure u koo yɔ̃rɑwɑ win gidi bɔrɑn bɔkuɔ.
18 Sɔ̃ɔ duu yeru giɑrɑ Efɑrɑimubɑ bɑ koo ben sɑnsɑni girɑ ben gidi bɔrɑn bɔkuɔ be, kɑ ben tɑbu kowobu.Ben tɑbu sunɔn yĩsirɑ Elisɑmɑ, Amihudun bii. 19 Win tɑbu kowobun geerɑ sɑ̃ɑwɑ tɔmbu nɔrɔbun subɑ weeru kɑ nɛɛrɑ wunɔbu (40.500). 20-23 Ben wuuru sɔɔrɑ Mɑnɑsebɑ kɑ Bɛnyɑmɛɛbɑ bɑ koo ben sɑnsɑni girɑ.Mɑnɑsebɑn tɑbu sunɔn yĩsirɑ Gɑmuliɛli, Pedɑsurin bii.Win tɑbu kowobun geerɑ sɑ̃ɑwɑ tɔmbu nɔrɔbun subɑ tɛnɑ kɑ yiru kɑ goobu (32.200).Bɛnyɑmɛɛbɑn tɑbu sunɔwɑ Abidɑni, Gideonin bii. Win tɑbu kowobun geerɑ sɑ̃ɑwɑ tɔmbu nɔrɔbun subɑ tɛnɑ kɑ nɔɔbu kɑ nɛɛru (35.400). 24 Be kpuro kɑ Efɑrɑimun tɑbu kowobun geerɑ kuɑwɑ tɔmbu nɔrɔbun subɑ wunɔbu kɑ nɔɔbɑ itɑ kɑ wunɔbu (108.100).Berɑ bɑ ko n sɑ̃ɑ itɑse bɑ̀ n swɑɑ wɔriɔ.
25 Sɔ̃ɔ yɛ̃sɑn nɔm geu giɑrɑ Dɑnubɑ bɑ koo mɑɑ ben sɑnsɑni girɑ ben gidi bɔrɑn bɔkuɔ be, kɑ ben tɑbu kowobu.Ben tɑbu sunɔn yĩsirɑ Akiesɛɛ, Amisɑdɑin bii. 26 Win tɑbu kowobun geerɑ sɑ̃ɑwɑ tɔmbu nɔrɔbun subɑ wɑtɑ kɑ yiru kɑ nɑtɑ kɑ wunɔbu (62.700). 27-30 Ben wuuru sɔɔrɑ Asɛɛbɑ kɑ Nɛfitɑlibɑ bɑ koo du.Asɛɛbɑn tɑbu sunɔn yĩsirɑ Pɑgiɛli, Okirɑnin bii.Ben tɑbu kowobun geerɑ sɑ̃ɑwɑ tɔmbu nɔrɔbun subɑ weeru kɑ tiɑ kɑ nɛɛrɑ wunɔbu (41.500).Nɛfitɑlibɑn tɑbu sunɔn yĩsirɑ Ahirɑ, Enɑnin bii.Win tɑbu kowobun geerɑ sɑ̃ɑwɑ tɔmbu nɔrɔbun subɑ weerɑɑkuru kɑ itɑ kɑ nɛɛru (53.400). 31 Be kpuro kɑ Dɑnubɑ ben geerɑ kuɑwɑ tɔmbu nɔrɔbun subɑ wunɑɑ wɑtɑ itɑ sɑri kɑ nɑtɑ (157.600).
Isirelibɑ bɑ̀ n swɑɑ wɔri, kpɑ ben bɑɑwuren gidi bɔrɑ yɑ n bu gbiiye, berɑ bɑ koo be bɑ tie swĩi biruɔ.
32 Isireli be bɑ koo kpĩ bu tɑbu ko, ben geerɑ kuɑwɑ nɔrɔbun subɑ nɑtɑ kɑ itɑ kɑ nɛɛrɑ wunɔbu kɑ weerɑɑkuru (603.550). Bɑ bu gɑrɑwɑ bwese kɛrɑ kɑ bwese kɛrɑ, yɛnu kɑ yɛnu. 33 Bɑ#ǹ Lefibɑn bweseru gɑrɑ yèn sɔ̃ Yinni Gusunɔ u Mɔwisi sɔ̃ɔwɑ u ku bu gɑri.
34 Mɑ Isirelibɑ bɑ kuɑ mɑm mɑm ye Yinni Gusunɔ u Mɔwisi sɔ̃ɔwɑ. Ben bɑɑwure u win sɑnsɑni girɑwɑ mi ben gidi bɔrɑ yɑ gire. Yen biru, bɑ̀ n seewɑ bɑ swɑɑ wɔriɔ, bɑ rɑ n swĩinɛwɑ bwese kɛrɑ kɑ bwese kɛrɑ, yɛnu kɑ yɛnu.