ISIRELIBAN SANUM GBABURU SƆƆ
ISIRELIBA BA WÃA SINAIN GBABURƆ
Bɑ Isirelibɑ gɑrɑ
1
1 Ye Isirelibɑ bɑ yɑrimɑ Egibitin di, yen wɔ̃ɔ yirusen suru yirusen tɔ̃ɔ gbiikiru sɔɔrɑ Yinni Gusunɔ u kɑ Mɔwisi gɑri kuɑ win kuu bekurugirɔ, gbɑbu te bɑ mɔ̀ Sinɑiɔ. 2 U nɛɛ, i Isirelibɑn tɔn durɔbu kpuro gɑrio, wunɛ kɑ Aroni, yɛnu kɑ yɛnu, bwese kɛrɑ kɑ bwese kɛrɑ, kpɑ i bɑɑwuren yĩsiru yore. 3 I bu gɑrio be bɑ wɑ̃ɑ tɑbu wuunu sɔɔ, sɑɑ be bɑ wɔ̃ɔ yɛndu mɔn di sere kɑ be bɑ kere mɛ, be bɑ koo kpĩ bu tɑbu ko. 4 Bwese kɛrɑ bɑɑyeren guro gurowɑ u koo bɛɛ somi. 5 Be bɑ koo bɛɛ somi mi, beyɑ,Elisuri, Sedeurin bii, Rubɛnin bweseru sɔɔ, 6 kɑ Selumiɛli, Surisɑdɑin bii, Simɛɔn bweseru sɔɔ, 7 kɑ Nɑsoni, Aminɑdɑbun bii, Yudɑn bweseru sɔɔ, 8 kɑ Nɛtɑnɛɛli, Suɑrin bii, Isɑkɑrin bweseru sɔɔ, 9 kɑ Eliɑbu, Helonin bii, Sɑbulonin bweseru sɔɔ, 10 kɑ Elisɑmɑ, Amihudun bii, Efɑrɑimu, Yosɛfun biin bweseru sɔɔ,kɑ Gɑmuliɛli, Pedɑsurin bii, Mɑnɑse, Yosɛfun bii turo goon bweseru sɔɔ, 11 kɑ Abidɑni, Gideonin bii, Bɛnyɑmɛɛn bweseru sɔɔ, 12 kɑ Akiesɛɛ, Amisɑdɑin bii, Dɑnun bweseru sɔɔ, 13 kɑ Pɑgiɛli, Okirɑnin bii, Asɛɛn bweseru sɔɔ, 14 kɑ Eliɑsɑfu, Dewɛlin bii, Gɑdin bweseru sɔɔ, 15 kɑ sere Ahirɑ, Enɑnin bii, Nɛfitɑlin bweseru sɔɔ.
16 Guro guro be bɑ gɔsɑ mi, bɑ sɑ̃ɑwɑ Isirelibɑn tɑbu sinɑmbu. 17 Mɑ Mɔwisi kɑ Aroni bɑ tɔmbu wɔkurɑ yiru ye suɑ bèn yĩsinu bɑ siɑ mi. 18 Mɑ bɑ Isirelibɑ kpuro sokɑ bɑ mɛnnɑ wɔ̃ɔn suru yirusen tɔ̃ɔ gbiikiru sɔɔ, mɑ bɑ bu gɑrɑ bwese kɛrɑ kɑ bwese kɛrɑ, yɛnu kɑ yɛnu, sɑɑ tɔn durɔ be bɑ wɔ̃ɔ yɛndu mɔn di sere kɑ be bɑ kere mɛ, mɑ bɑ ben yĩsɑ yoruɑ. 19 Mɔwisi u bu gɑrɑ Sinɑin gbɑburɔ nge mɛ Yinni Gusunɔ u nùn sɔ̃ɔwɑ.
20-43 Bɑ Isirelibɑn bwese kɛrɑ bɑɑyeren tɔmbu gɑrɑ yɛnu kɑ yɛnu. Mɑ bɑ ben yĩsɑ yoruɑ sɑɑ be bɑ wɔ̃ɔ yɛndu mɔn di, be bɑ koo kpĩ bu tɑbu ko. Bɑ gɑrim toruɑwɑ kɑ Rubɛni, Yɑkɔbun bii gbiikoon bwese kɛrɑ. Tɔn ben geeru wee.Rubɛnin bweseru sɔɔ, bɑ sɑ̃ɑwɑ tɔmbu nɔrɔbun subɑ weeru kɑ nɔɔbɑ tiɑ kɑ nɛɛrɑ wunɔbu (46.500).Simɛɔn bweseru sɔɔ, bɑ sɑ̃ɑwɑ tɔmbu nɔrɔbun subɑ weerɑɑkuru kɑ nɔɔbɑ nnɛ kɑ goobɑ wunɔbu (59.300).Gɑdin bweseru sɔɔ, bɑ sɑ̃ɑwɑ tɔmbu nɔrɔbun subɑ weeru kɑ nɔɔbu kɑ nɑtɑ kɑ weerɑɑkuru (45.650).Yudɑn bweseru sɔɔ, bɑ sɑ̃ɑwɑ tɔmbu nɔrɔbun subɑ wɑtɑ kɑ wɔkurɑ nnɛ kɑ nɑtɑ (74.600).Isɑkɑrin bweseru sɔɔ, bɑ sɑ̃ɑwɑ tɔmbu nɔrɔbun subɑ weerɑɑkuru kɑ nnɛ kɑ nɛɛru (54.400).Sɑbulonin bweseru sɔɔ, bɑ sɑ̃ɑwɑ tɔmbu nɔrɔbun subɑ weerɑɑkuru kɑ nɔɔbɑ yiru kɑ nɛɛru (57.400).Efɑrɑimu, Yosɛfun biin bweseru sɔɔ, bɑ sɑ̃ɑwɑ tɔmbu nɔrɔbun subɑ weeru kɑ nɛɛrɑ wunɔbu (40.500).Mɑnɑse, Yosɛfun biin bweseru sɔɔ, bɑ sɑ̃ɑwɑ tɔmbu nɔrɔbun subɑ tɛnɑ kɑ yiru kɑ goobu (32.200).Bɛnyɑmɛɛn bweseru sɔɔ, bɑ sɑ̃ɑwɑ tɔmbu nɔrɔbun subɑ tɛnɑ kɑ nɔɔbu kɑ nɛɛru (35.400).Dɑnun bweseru sɔɔ, bɑ sɑ̃ɑwɑ tɔmbu nɔrɔbun subɑ wɑtɑ kɑ yiru kɑ nɑtɑ kɑ wunɔbu (62.700).Asɛɛn bweseru sɔɔ, bɑ sɑ̃ɑwɑ tɔmbu nɔrɔbun subɑ weeru kɑ tiɑ kɑ nɛɛrɑ wunɔbu (41.500).Nɛfitɑlin bweseru sɔɔ, bɑ sɑ̃ɑwɑ tɔmbu nɔrɔbun subɑ weerɑɑkuru kɑ itɑ kɑ nɛɛru (53.400).
44 Tɔn be Mɔwisi kɑ Aroni kɑ Isirelibɑn guro gurobu wɔkurɑ yiru ye, bɑ gɑrɑ, ben geerɑ mi. 45 Bɑ bu gɑrɑwɑ sɑɑ be bɑ wɔ̃ɔ yɛndu mɔn di sere kɑ be bɑ kere mɛ, be bɑ koo kpĩ bu tɑbu ko. 46 Be kpuron geerɑ kuɑwɑ tɔmbu nɔrɔbun subɑ nɑtɑ kɑ itɑ kɑ nɛɛrɑ wunɔbu kɑ weerɑɑkuru (603.550).
Lefibɑn bweserun sɔmburu
47 Bɑ#ǹ Lefibɑn bweserɔ tɔmbu gɑrɑ, 48 yèn sɔ̃ Yinni Gusunɔ u rɑɑ Mɔwisi sɔ̃ɔwɑ u nɛɛ, 49 Isirelibɑ sɔɔ, ɑ ku Lefibɑn bweserun tɔmbu gɑri. 50 Kɑɑ de bu nɛ, Yinni Gusunɔn kuu te nɔɔriwɑ kɑ ten dendi yɑ̃nu kɑ ye yɑ wɑ̃ɑ mi kpuro, beyɑ bɑ ko n dɑ ye kpuro sɔbe. Kpɑ bu ben kunu girɑ bu kɑ nɛ, Yinni Gusunɔn kuu te sikerenɑ. 51 Isirelibɑ bɑ̀ n seewɑ, Lefibɑrɑ bɑ ko n dɑ kuu te kure. Bɑ̀ n koo mɑɑ ben sɑnsɑni girɑ, bɑ ko n dɑ Yinni Gusunɔn kuu te girewɑ. Tɔn tuko ù n tu bɛsu, bɑ koo nùn gowɑ. 52 Isireli be bɑ mɑɑ tie, bɑ koo sinɑwɑ ben bwese kɛrɑn wuuru sɔɔ, ben bɑɑwure u yɔ̃rɑ mi ben gidi bɔrɑ yɑ gire nge mɛ bɑ bu bɔnu sɑ̃ɑ. 53 Adɑmɑ Lefibɑ bɑ koo ben sɑnsɑni girɑwɑ bu kɑ kuu te sikerenɑ mi woodɑn kpɑkororɑ wɑ̃ɑ. Nge mɛyɑ bɑ koo kɑ tu kɔ̃su. Sɑɑ ye sɔɔ, Isirelibɑ bɑ#ǹ mɑɑ wɑsi bu tu susi n sere kɑ bu mɔru ko.
54 Mɑ Isirelibɑ bɑ Yinni Gusunɔn woodɑ ye kpuro mɛm nɔɔwɑ mɑm mɑm ye u Mɔwisi wɛ̃ mi.