Isirelibɑ bɑ wɑ̃ɑ
Sinɑin guurun nuurɔ
19
1-2 Yen biru Isirelibɑ bɑ doonɑ Refidimun di. Ye n kuɑ suru itɑsen tɔ̃ɔ gbiikiru sɑɑ mìn di bɑ yɑrɑ Egibitin di, yerɑ bɑ turɑ Sinɑin gbɑburɔ. Mɑ bɑ ben sɑnsɑni girɑ guu te bɑ mɔ̀ Sinɑin nuurɔ. 3 Yerɑ Yinni Gusunɔ u Mɔwisi sokɑ guu ten wɔllɔ u kɑ nùn gɑri ko.
Ye u yɔɔwɑ mi, yerɑ Yinni Gusunɔ u nɛɛ, ɑmɛniwɑ kɑɑ Yɑkɔbun bibu Isirelibɑn bwese kɛri sɔ̃ ɑ nɛɛ, 4 i wɑ ye nɑ Egibitigibu kuɑ kɑ nge mɛ nɑ bɛɛ tii gɑwe nɑ suɑ kɑ nɛn nɔm dɑmguu nge mɛ gunɔ bɑkeru tɑ rɑ ten binu sue. 5 Tɛ̃, ì n nɛn gere nuɑ, ì kun nɛn ɑrukɑwɑni kusie, i ko ko nɛn tiin tɔmbu n tɔmbu kpuro kere. Hɑnduniɑ kpuro sɑ̃ɑwɑ nɛgiɑ, 6 ɑdɑmɑ bɛɛ i ko n sɑ̃ɑwɑ nɛn tɔn be nɑ gɔsɑ nɑ tii yiiye, kpɑ i n sɑ̃ɑ nɛn yɑ̃ku kowobu tɔn be bɑ tien sɔ̃. Gɑri yi kɑɑ Isirelibɑ sɔ̃wɑ mi.
7 Yen biru Mɔwisi u sɑrɑmɑ u tɔn ben guro gurobu sokusiɑ u bu sɔ̃ɔwɑ kpuro ye Yinni Gusunɔ u nɛɛ u bu sɔ̃. 8 Mɑ tɔn be kpuro bɑ wurɑ bɑ nɛɛ, ye Yinni Gusunɔ u geruɑ kpuro, yeyɑ sɑ ko ko.
Mɑ Mɔwisi u mɑɑ kɑ tɔn ben gere wurɑ Yinni Gusunɔn mi. 9 Mɑ Yinni Gusunɔ u Mɔwisi sɔ̃ɔwɑ u nɛɛ, wee, kon nɑ wunɛn mi guru wii wuro te tɑ sinum mɔ sɔɔ, kpɑ tɔn be, bu nɔ sɑnɑm mɛ nɑ kɑ nun gɑri mɔ̀, kpɑ bɑ n dɑ n nun nɑɑnɛ sɑ̃ɑ.
Sɑɑ ye sɔɔrɑ Mɔwisi u den Yinni Gusunɔ tɔn ben gɑri yi tusiɑ.
Gusunɔ u kɑ Mɔwisi yinnɑ
Sinɑin guuru wɔllɔ
10 Yerɑ Yinni Gusunɔ u kpɑm nùn sɔ̃ɔwɑ u nɛɛ, ɑ doo ɑ tɔn be deemɑ ɑ bu sɔ̃ bu ben bekɑ teo bu tii dɛɛrɑsiɑ gisɔ kɑ siɑ, 11 kpɑ bɑ n sɔɔru sɑ̃ɑ bɑ n kɑ sɔ̃ɔ itɑse mɑrɑ. Domi sɔ̃ɔ itɑse te sɔɔrɑ nɛ, Yinni Gusunɔ kon sɑrɑmɑ Sinɑin guurɔ be kpuro bu kɑ mɑn wɑ. 12 Kɑɑ tɔn be yĩreru kuɑ mi bɑ koo yɔ̃rɑ guu ten bɔkuɔ, kpɑ ɑ bu sɔ̃ bɑ n tii sɛ bu ku rɑɑ guu te yɔ, bu ku mɑm susi ten gɑ̃ɑrɔ bu tu bɛsu. Ben wi u tu bɛsu, yɛ̃ro koo gbiwɑ. 13 Bɑ ǹ nùn sɛ̃remɔ kɑ nɔmɑ, kpenɑ bɑ koo nùn kɑsuku, ǹ kun mɛ bu nùn sɛ̃ɛnu twee bu kɑ go. Bɑɑ ǹ n yɑɑ sɑberun nɑ, mɛyɑ bɑ koo kɑ tu go. Kɔbɑ yɑ̀ n swĩwɑ bɑ koo susi guu ten bɔkuɔ.
14 Mɑ Mɔwisi u sɑrɑmɑ guu ten min di, u tɔn be sɔ̃ɔwɑ u nɛɛ, bu tii dɛɛrɑsio bu kɑ Gusunɔ sɑ̃. Mɑ bɑ ben bekɑ teɑ. 15 U kpɑm bu sɔ̃ɔwɑ u nɛɛ, i ku rɑ kɑ bɛɛn kurɔbu bɑkunɑ i n sɔɔru sɑ̃ɑ i n kɑ sɔ̃ɔ itɑse te mɑrɑ.
16 Sɔ̃ɔ itɑse ten bururu bɑ guru kukiribu nuɑ, mɑ bɑ guru mɑɑkinu kɑ guru wii wuro te tɑ sinum mɔ wɑ guu ten wɔllɔ. Mɑ kɔbɑ yɑ sumɔ tɑ̃ɑ tɑ̃ɑ sere tɔn be bɑ wɑ̃ɑ sɑnsɑni ye sɔɔ kpuro bɛrum bu mwɑ bɑ diirɑ. 17 Yerɑ Mɔwisi u tɔn be yɑrɑmɑ ben sɑnsɑnin di bu dɑ bu kɑ Gusunɔ yinnɑ, mɑ bɑ yɔ̃rɑ guu ten nuurɔ.
18 Wiisu Sinɑin guu te wukiri, domi Yinni Gusunɔ u sɑrɑmɑ kɑ dɔ̃ɔ u wɑ̃ɑ ten wɔllɔ. Wii si, su yɔɔmɔ nge dɔ̃ɔ bokon wiisu. Mɑ guu te, tɑ yĩirumɔ kɑ dɑm. 19 Kɔbɑ yen swĩi mɑɑ sosimɔ. Yerɑ Mɔwisi u gɑri geruɑ, mɑ Gusunɔ u nùn wisɑ kɑ nɔɔgii te tɑ sɑ̃ɑ nge guru kukiribu.
20 Nge mɛyɑ Yinni Gusunɔ u kɑ sɑrɑmɑ guu ten wɔllɔ, mɑ u Mɔwisi sokɑ. Yerɑ Mɔwisi u yɔɔwɑ u dɑ mi. 21 Mɑ Yinni Gusunɔ u nùn sɔ̃ɔwɑ u nɛɛ, ɑ sɑro ɑ tɔn be kirɔ ko gem gem bu ku rɑɑ susimɑ bu yĩre te sɑrɑ bu mɑn mɛɛri, kpɑ ben dɑbiru tu ku rɑɑ kɑm ko. 22 Mɛyɑ yɑ̃ku kowobun tii, be bɑ rɑ mɑn susi, bu de bu tii dɛɛrɑsiɑ kpɑ n ku rɑ ben gɑbu go.
23 Mɑ Mɔwisi u Yinni Gusunɔ sɔ̃ɔwɑ u nɛɛ, tɔn be, bɑ ǹ yɔɔmɔ guuru wɔllu mi. Domi ɑ sun kirɔ kuɑ gem gem ɑ nɛɛ n bu yĩreru kuo guu ten bɔkuɔ mi bɑ koo yɔ̃rɑ. Kpɑ su tu gɑrisi guu te ɑ tii yiiye.
24 Yinni Gusunɔ u nɛɛ, ɑ sɑro ɑ dɑ kpɑ wunɛ kɑ Aroni i yɔɔmɑ, ɑdɑmɑ yɑ̃ku kowobu kɑ tɔn be bɑ tie, bu ku rɑɑ yĩre te sɑrɑ bu mɑn mɛɛri, kpɑ n ku rɑ ben gɑbu go.
25 Mɑ Mɔwisi u sɑrɑ u dɑ u tɔn be gɑri yi sɔ̃ɔwɑ.