Yetoro u Mɔwisi berɑm dɑ
18
1 Sɑɑ ye sɔɔ, Yetoro Mɑdiɑnibɑn yɑ̃ku kowo, wi u sɑ̃ɑ Mɔwisin dokiri, u nuɑ kpuro ye Yinni Gusunɔ u Mɔwisi kɑ win tɔmbu Isirelibɑ kuɑ sɑnɑm mɛ u bu yɑrɑmɑ Egibitin di. 2-3 Mɑ u seewɑ u dɑ Mɔwisin mi kɑ Mɔwisin kurɔ Seforɑ kɑ win bibu yiru be u rɑɑ deri wi, Yetoron mi. N deemɑ, ye Mɔwisi u bii be mɑrɑ, u turo yĩsiru kɑ̃ Gɛɛsɔmu yèn sɔ̃ u wɑ̃ɑ tem tukumɔ u kɑ nùn mɑrɑ. 4 Mɑ u yiruse yĩsiru kɑ̃ Ɛliesɛɛ yèn sɔ̃ Gusunɔ win bɑɑbɑn Yinniwɑ u nùn somi u nùn wɔrɑ Egibiti sunɔn nɔmun di.
5 Mɑ Yetoro kɑ Mɔwisin kurɔ kɑ win bii be, bɑ turɑ mi Isirelibɑ bɑ ben sɑnsɑni gire guu te bɑ mɔ̀ Sinɑiɔ. 6 Sɑɑ yerɑ Yetoro u Mɔwisi gɔriɑ u nɛɛ, bu nùn sɔ̃ wee, u kɑ nùn win kurɔ nɑɑwɑ kɑ win bibu yiru ye. 7 Ye Mɔwisi u nuɑ mɛ, yerɑ u yɑrɑ u win dokiri sennɔ dɑ. Ye u turɑ mi, mɑ u yiirɑ win wuswɑɑɔ. Yen biru u seewɑ bɑ bɔkɑsinɑ bɑ tɔbirinɑ. Mɑ Mɔwisi u kɑ nùn dɑ win dii bekurugirɔ. 8 Mɑ u win dokiri wi sɑɑriɑ kpuro ye Yinni Gusunɔ u Egibitigibu kɑ ben sunɔ kuɑ be Isirelibɑn sɔ̃, kɑ sere nɔni swɑ̃ɑ te bɑ wɑ swɑɑ sɔɔ, kɑ nge mɛ Yinni Gusunɔ u bu yɑrɑ te sɔɔn di. 9 Durom mɛ Yinni Gusunɔ u Isirelibɑ kuɑ mi, sɑnɑm mɛ u bu yɑrɑ Egibitigibun nɔmɑn di, yɑ Yetoro dore. 10 Yerɑ u nɛɛ, nɑ Yinni Gusunɔ siɑrɑ wi u bɛɛ wɔrɑ sɑɑ Egibiti sunɔ kɑ win tɔmbun yorun di. 11 Tɛ̃ nɑ giɑ mɑ wiyɑ u bũnu kpuro kere. Domi u derɑ Egibitigibun nuku kɔ̃surɑ wɔri ben tii sɔɔ.
12 Mɑ u Gusunɔ yɑ̃ku dɔ̃ɔ mwɑɑrɑrugiru kuɑ kɑ yɑ̃kunu gɑnu. Yerɑ Aroni kɑ Isirelibɑn guro gurobu bɑ nɑ bɑ di kɑ Mɔwisin dokiri wi sɑnnu bɑ kɑ Gusunɔ sɑ̃wɑ.
Yetoro u Mɔwisi bwisi kɑ̃
13 Yen sisiru bururu yerɑ Mɔwisi u sinɑ u kɑ Isirelibɑ siriɑ, mɑ tɔn be, bɑ yɔ̃ win wuswɑɑɔ sɑɑ bururun di sere kɑ yokɑɔ. 14 Ye Yetoro u wɑ mɛ, yerɑ u Mɔwisi sɔ̃ɔwɑ u nɛɛ, mbɑ ɑ tɔn be kuɑmmɛ mɛ. Mbɑn sɔ̃nɑ ɑ sɔ̃ wunɛ turo ɑ bu siriɑmmɛ sɑɑ bururun di sere kɑ yokɑɔ.
15 Mɑ Mɔwisi u nùn sɔ̃ɔwɑ u nɛɛ, tɔn be, bɑ nɑɑmɔwɑ nɛn mi, n kɑ bu Gusunɔ bikiɑ ye u kĩ bu ko. 16 Bɑ̀ n mɑɑ gɑri gɛɛ mɔ ben tii tiinɛ sɔɔ kpɑ n bu siriɑ n bu sɔ̃ɔsi ye Yinni Gusunɔ u kĩ.
17 Yerɑ win dokiri wi, u nɛɛ, ye ɑ mɔ̀ mi, yɑ ǹ wɑ̃. 18 Kɑɑ rɑ tii mɛɛrɑ kowɑ mi, kɑ sere mɑɑ tɔn be bɑ nun sikerenɛ mini. Domi sɔmbu te, tɑ kpɑ̃. A ǹ kpɛ̃ ɑ tu ko wunɛ turo. 19 Tɛ̃ ɑ nɛn gɑri nɔɔwɔ, kpɑ Gusunɔ u nun somi. Bwisi yi kon nun kɛ̃ wee. A koowo tɔn ben wirugii Gusunɔn wuswɑɑɔ, kpɑ ɑ n dɑ kɑ ben gɑri de win mi. 20 Kpɑ ɑ bu Gusunɔn woodɑbɑ tubusiɑ kɑ swɑɑ ye bɑ koo swĩi, kɑ sɔmɑ ye bɑ koo ko. 21 Kpɑ ɑ gɑbu gɔsi be sɔɔ, be bɑ koo kpĩ bu bu kpɑrɑ kpɑ yɛ̃robɑ n sɑ̃ɑ be bɑ Gusunɔ nɑsie, bɑ gem swĩi, bɑ ku rɑ nɔm birɑn kɛ̃nu mwɛ. Kpɑ ɑ ben gɑbu ko tɔmbu nɔrɔbun (1.000) wirugibu, gɑbu mɑɑ wunɔbun (100) wirugibu, gɑbu weerɑɑkurun wirugibu, gɑbu mɑɑ wɔkurun wirugibu. 22 Beyɑ bɑ ko n dɑ tɔn be sirie bɑɑdommɑ kpɑ bɑ n dɑ kɑ gɑri yi yi sɛ̃ nɛ wunɛn mi. A de bu nun wunɛn sɔmunu kɑwɑ, kpɑ bu kɑ nun sɔbe. 23 À n kuɑ mɛ, mɑ Gusunɔ u nun kpɑre swɑɑ ye sɔɔ, kɑɑ kurɑ, kpɑ tɔn be, bu mɑɑ turi mi bɑ dɔɔ kɑ bɔri yɛndu.
24 Mɔwisi u win dokirin gere wurɑ u kuɑ kpuro nge mɛ u nùn sɔ̃ɔwɑ. 25 U tɔn be gɔsɑ Isirelibɑ sɔɔ be bɑ koo sɔmbu te kpĩ. Mɑ u ben gɑbu kuɑ tɔmbu nɔrɔbun (1.000) wirugibu, gɑbu mɑɑ wunɔbun (100) wirugibu, gɑbu weerɑɑkurun wirugibu, gɑbu mɑɑ wɔkurun wirugibu. 26 Berɑ bɑ rɑ gɑri yi yi ǹ sɛ̃ siri. Yi yi sɛ̃ kpɑ bu kɑ Mɔwisi dɑɑwɑ.
27 Yen biru win dokiri u nùn nɔɔ kɑnɑ mɑ u doonɑ u dɑ win temɔ.GUSUNƆ U KA ISIRELIBA ARUKAWANI BƆKUA