Mɔwisi kɑ Aroni bɑ dɑ
Egibiti sunɔn mi
5
1 Yen biru Mɔwisi kɑ Aroni bɑ seewɑ bɑ dɑ Egibiti sunɔn mi bɑ nɛɛ, ɑmɛniwɑ Isirelibɑn Yinni wi bɑ mɔ̀ Wi u rɑ n wɑ̃ɑ, u geruɑ. U nɛɛ, ɑ de win tɔmbu bu dɑ gbɑburɔ bu sɑ̃ɑru ko.
2 Mɑ Egibiti sunɔ u nɛɛ, wɑrɑ bɑ mɔ̀ Wi u rɑ n wɑ̃ɑ, n kɑ sere nùn mɛm nɔɔwɑ, n de bɛɛ Isirelibɑ i doonɑ. Nɑ ǹ nùn yɛ̃. Nɑ ǹ mɑɑ derimɔ i doonɑ.
3 Yerɑ bɑ nɛɛ, bɛsɛ Heberubɑn Yinniwɑ u sun kure u kɑ sun gɑri kuɑ. Yen sɔ̃, ɑ de su dɑ gbɑburɔ nge sɔ̃ɔ itɑn sɑnum sɑkɑ su kɑ nùn yɑ̃kuru kuɑ, kpɑ u ku rɑɑ sun bɑrɑ bɑkɑru kpɛ̃ɛ su gbi, ǹ kun mɛ u de bu sun go tɑbu sɔɔ.
4 Mɑ Egibiti sunɔ u bu sɔ̃ɔwɑ u nɛɛ, wunɛ Mɔwisi kɑ Aroni, mbɑn sɔ̃nɑ i tɔn be sɔmburu yɔ̃rɑsiɑ. I doo i bɛɛn sɔmɑ ko. 5 Wee, ye tɔn be, bɑ mɑrurɑ bɑ dɑbiɑ tɛ̃ tem mɛni sɔɔ, yerɑ i kĩ i ben sɔmburu yɔ̃rɑsiɑ?
Bɑ Isirelibɑ sɔmburu sosiɑ
6 Dɔmɑ teyɑ Egibiti sunɔ u wigii be bɑ tɔn be kpɑre sɔmɑ ye sɔɔ, kɑ Isirelibɑn swɑɑ gbiobu sɔ̃ɔwɑ u nɛɛ, 7 i ku rɑ mɑɑ tɔn be tɑkɑ nɔɔ wɛ̃ nge yellu bu kɑ birikibɑ ko. I de ben tii bu dɑ bu tɑkɑ nɔɔ kɑsu. 8 Kɑ mɛ, i ku ben birikibɑn geeru kɑwɑ mɛ bɑ rɑ rɑɑ ko yellu. Domi yikurɑ tɑ bu mɔ̀. Yen sɔ̃nɑ bɑ weeweenu mɔ̀ bɑ mɔ̀, bu dɑ bu ben Yinni yɑ̃kuru kuɑ. 9 I de tɔn ben sɔmburu tu sɛ̃sɔ sosi, kpɑ bɑ n tu mɔ̀. Sɑnɑm mɛ, bɑ ǹ koo mɑɑ weesu swɑɑ dɑki.
10 Mɑ be bɑ tɔn be kpɑre sɔmɑ ye sɔɔ mi, kɑ Isirelibɑn swɑɑ gbiobu bɑ nɑ bɑ bu sɔ̃ɔwɑ bɑ nɛɛ, ɑmɛniwɑ Egibiti sunɔ u geruɑ. U nɛɛ, u ǹ mɑɑ bɛɛ tɑkɑ nɔɔ wɛ̃ɛmɔ. 11 Ǹ n mɛn nɑ, i doo i bɛɛn tɑkɑ nɔɔ kɑsu mi i ko wɑ. Adɑmɑ kɑ mɛ, sɑ ǹ gɑ̃ɑnu kɑwɑmɔ bɛɛn sɔmɑ sɔɔ.
12 Mɑ tɔn be, bɑ yɑrinɑ bɑɑmɑ Egibitin tem sɔɔ, bɑ yɑkɑsu kɑsu bu kɑ tɑkɑ nɔɔ ko. 13 Be bɑ bu kpɑre sɔmɑ ye sɔɔ, bɑ bu bɑɑsi bɑ mɔ̀, i bɛɛn sɔmɑ yibio tɔ̃ru bɑɑtere nge mɛ i rɑ rɑɑ ko, sɑnɑm mɛ bɑ bɛɛ tɑkɑ nɔɔ wɛ̃ɛmɔ. 14 Mɑ bɑ Isirelibɑn swɑɑ gbio be Egibiti sunɔn tɔmbɑ wunɑ soomɔ bɑ bu bikiɑmɔ, mbɑn sɔ̃nɑ i ǹ bɛɛn birikibɑn geeru yibie gĩɑ kɑ gisɔ nge mɛ i rɑ rɑɑ ko.
15 Sɑnɑm mɛ sɔɔrɑ Isirelibɑn swɑɑ gbio be, bɑ dɑ bɑ Egibiti sunɔ wuri koosimɔ bɑ mɔ̀, mbɑ n kuɑ, yinni, ɑ kɑ sun yenin bweseru kuɑmmɛ. 16 Bɑ ku rɑ mɑɑ sun tɑkɑ nɔɔ wɛ̃. Kpɑ bɑ n mɔ̀ su birikibɑ muro. Yen biru sɑ̀ kun kue, kpɑ bɑ n sun soomɔ. N sere deemɑ, wunɛn tɔmbun tɑɑrɛwɑ.
17 Mɑ Egibiti sunɔ u bu wisɑ u nɛɛ, yikurobu bɛɛ, i ǹ gɑru kobu kĩ. Yen sɔ̃nɑ i gerumɔ, n de i dɑ i Yinni Gusunɔ yɑ̃kuru kuɑ. 18 I doo tɛ̃n tɛ̃ ge i bɛɛn sɔmburu ko. Goo kun mɑɑ bɛɛ tɑkɑ nɔɔ wɛ̃ɛmɔ. Adɑmɑ birikibɑn gee tee terɑ i ko n murɑmɔ mi.
19 Isirelibɑn swɑɑ gbio be, bɑ wɑ mɑ ben wɑhɑlɑ yɑ sosimɔwɑ domi bɑ nɛɛ, bu ku rɑɑ ben birikibɑn geeru kɑwe. Tɔ̃ru bɑɑtere kɑ ten sɔmburɑ. 20 Ye tɔn be, bɑ yɑrimɑ Egibiti sunɔn min di, bɑ Mɔwisi kɑ Aroni deemɑ bɑ yɔ̃ bɑ bu mɑrɑ. 21 Yerɑ bɑ bu sɔ̃ɔwɑ bɑ nɛɛ, Yinni Gusunɔ u bɛɛ wɑɑmɔ. U koo mɑɑ bɛɛ siri. Bɛɛyɑ i sun tusiru kɑsuɑ Egibiti sunɔ kɑ win tɔmbun mi. Wee, i tɑkobi doke ben nɔmuɔ bu kɑ sun go.