Mɔwisi u kĩ
u Gusunɔn sokuru yinɑ
4
1 Mɑ Mɔwisi u wisɑ u nɛɛ, nɑ tɔn be yɛ̃. Bɑ ǹ koo mɑn nɑɑnɛ ko. Bɑ ǹ gɑri yi swɑɑ dɑkimɔ. Bɑ koo nɛɛ, wunɛ Yinni Gusunɔ ɑ ǹ mɑn kure ɑ kɑ mɑn gɑri kue.
2 Yinni Gusunɔ u nùn bikiɑ u nɛɛ, mbɑ ɑ nɛni wunɛn nɔmuɔ mi.
Mɔwisi u nɛɛ, dɛkɑ.
3 Mɑ Yinni Gusunɔ u nɛɛ, ɑ ye kɔ̃ɔwɔ temɔ. Mɑ u ye kɔ̃ temɔ, mɑ yɑ gɔsiɑ wɑɑ. Yerɑ Mɔwisi u dukɑ suɑ yen min di. 4 Yinni Gusunɔ u kpɑm nùn sɔ̃ɔwɑ u nɛɛ, ɑ wunɛn nɔmu dɛmiɔ kpɑ ɑ yen siru nɛnɛ ɑ suɑ.
Mɑ u win nɔmu dɛmiɑ u yen sii te nɛnuɑ u suɑ, mɑ yɑ kpɑm gɔsiɑ dɛkɑ win nɔmuɔ. 5 Yinni Gusunɔ u mɑɑ nɛɛ, yeniwɑ kɑɑ ko, kpɑ bu giɑ mɑ nɛ wi nɑ rɑ n wɑ̃ɑ nɑ kɑ nun gɑri kuɑ, nɛ wi nɑ sɑ̃ɑ ben bɑɑbɑbɑ Aburɑhɑmu kɑ Isɑki kɑ Yɑkɔbun Yinni.
6 Mɑ Yinni Gusunɔ u kpɑm nɛɛ, ɑ wunɛn nɔmu dokeo wunɛn yɑberun sɔɔwɔ tororɔ.
Mɑ u doke, yen biru u wunɑ. Wee gɑ bururɑ nge wɛ̃su, gɑ bɑrɑ disigiru wɑ. 7 Yinni Gusunɔ u kpɑm nɛɛ, ɑ mɑɑ wunɛn nɔmu ge wesio mi.
U wesiɑ, mɑ u ge wunɑ. Mɑ gɑ kpɑm kuɑ nge mɛ gɑ rɑɑ sɑ̃ɑ. 8 Yinni Gusunɔ u nɛɛ, bɑ̀ kun nun nɑɑnɛ kue, bɑ̀ kun yĩre gbiikiru wure, bɑ koo yiruseru wurɑ. 9 Bɑ̀ kun mɑɑ wure bɑɑ mɛ bɑ yĩrenu yiru ye wɑ, bɑ̀ n wunɛn gɑri yinɑ, ɑ dɑɑ bɑkɑ ten nim sɔko ɑ yɑri temɔ. Nim mɛ ɑ sɔkɑ mi, mu koo gɔsiɑwɑ yɛm temɔ.
Gusunɔ u Aroni gɔsɑ
u kɑ Mɔwisi somi
10 Yerɑ Mɔwisi u Yinni Gusunɔ wisɑ u nɛɛ, Yinni, gɑri gerubu bu rɑ n kɑ mɑn sɛ̃ yellun di, bɑɑ kɑ tɛ̃ ye ɑ kɑ mɑn gɑri mɔ̀, domi nɛn yɑrɑ bunu.
11 Mɑ Yinni Gusunɔ u nùn sɔ̃ɔwɑ u nɛɛ, wɑrɑ tɔnun nɔɔ kuɑ. Wɑrɑ rɑ tɔnu ko soso. Wɑrɑ rɑ yɑm wɑɑsie. Wɑrɑ rɑ tɔnu ko wɔ̃ko. N ǹ nɛ, Yinni Gusunɔ wi ro? 12 Ǹ n mɛn nɑ, ɑ doo tɛ̃. Kon nun somi. Kon nun sɔ̃ɔsi ye kɑɑ gere.
13 Adɑmɑ Mɔwisi u nɛɛ, ɑɑwo, ɑ goo gɔsio ɑ gɔri.
14 Sɑɑ yerɑ Yinni Gusunɔ u kɑ Mɔwisi mɔru kuɑ. Mɑ u nɛɛ, n ǹ Aroni Lefi u sɑ̃ɑ wunɛn mɔɔ? Nɑ yɛ̃ mɑ gɑri gerubu kun kɑ nùn sɛ̃. Win tii wee, u nun sennɔ sisi. Ù n nun wɑ, win nukurɑ koo dorɑ. 15 A kɑ nùn gɑri koowo, kpɑ ɑ nùn sɔ̃ ye u koo gere. Nɛnɑ kon wunɛn nɔɔ kɑ win nɔɔ dendi, kpɑ n bɛɛ sɔ̃ɔsi ye i ko ko. 16 Wiyɑ u koo tɔmbu wunɛn gɑri tusiɑ. U ko n sɑ̃ɑ nge wunɛn nɔɔ, kpɑ ɑ n sɑ̃ɑ nɛn kɔsire win sɔ̃. 17 Tɛ̃, ɑ dɛkɑ ye suo ye kɑɑ kɑ yĩreru ko, kpɑ ɑ n ye nɛni wunɛn nɔmuɔ.
Mɔwisi u gɔsirɑ Egibitiɔ
18 Yen biru Mɔwisi u doonɑ min di. U gɔsirɑ u dɑ win dokiri Yetoron mi. Ye u turɑ mi, u nùn sɔ̃ɔwɑ u nɛɛ, ɑ de n dɑ n nɛn dusibu wɑ mɛ bɑ kɑ wɑ̃ɑ Egibitiɔ.
Mɑ Yetoro u nùn sɔ̃ɔwɑ u nɛɛ, ɑ doo kɑ bɔri yɛndu.
19-20 Mɑ Mɔwisi u win kurɔ kɑ win bibu suɑ u bu kɛtɛkunu yɔɔsiɑ bɑ dɑ Egibitin temɔ. U mɑɑ dɛkɑ ye suɑ ye Gusunɔ u nùn sɔ̃ɔwɑ u n nɛni mi. Domi Yinni Gusunɔ u rɑɑ nùn sɔ̃ɔwɑ u nɛɛ, be bɑ rɑɑ kɑsu bu nùn go, be kpuro bɑ gu. Yen sɔ̃, u gɔsiro u dɑ Egibitiɔ.
21 Yinni Gusunɔ u kpɑm Mɔwisi sɔ̃ɔwɑ u nɛɛ, tɛ̃, ɑ doo Egibiti mi, kpɑ ɑ n yɑɑye yĩre ni nɑ nun nɔmu bɛriɑ, ɑ kɑ nu ko Egibiti sunɔn wuswɑɑɔ. Adɑmɑ kon win gɔ̃ru bɔbiɑsiɑ. U ǹ wurɑmɔ u tɔn be deri bu doonɑ. 22 Kpɑ ɑ nùn sɔ̃ ɑ nɛɛ, ɑmɛniwɑ nɛ, Yinni Gusunɔ nɑ geruɑ, Isirelin bweseru tɑ sɑ̃ɑwɑ nge nɛn bii yerumɑ. 23 Yen sɔ̃, u de nɛn bii wi, u doonɑ u kɑ mɑn sɑ̃. Ù n mɑɑ yinɑ, kon win bii yerumɑ go.
24 Swɑɑ sɔɔ mi Mɔwisi u yɔ̃rɑ u kpunɑ, miyɑ Yinni Gusunɔ u nùn sɛ̃re, u kĩ u nùn go. 25 Mɑ Seforɑ u kpee nɔɔ durorugiru suɑ u win bii bɑngo kuɑ, mɑ u win sen sɑrusu suɑ u kɑ Mɔwisin tiin tɔn durɔru bɑbɑ u nɛɛ, wee, nɑ wunɛn woro yɛmgiru kuɑ. 26 Bɑngo yen sɔ̃nɑ u geruɑ mɛ. Sɑnɑm mɛ sɔɔrɑ Yinni Gusunɔ u Mɔwisi deri.
27 N deemɑ Yinni Gusunɔ u rɑɑ Aroni sɔ̃ɔwɑ u nɛɛ, ɑ seewo ɑ Mɔwisi sennɔ dɑ gbɑburɔ.
Aroni u seewɑ u dɑ mɑ u kɑ Mɔwisi yinnɑ guu ten mi, te Gusunɔ u tii gɔsiɑ. Mɑ bɑ gɑbɑnɑ bɑ bɔkɑsinɑ nuku dobun sɔ̃. 28 Yen biru Mɔwisi u Aroni sɑɑriɑ kpuro ye Yinni Gusunɔ u kɑ nùn gɔrimɑ, kɑ yĩre ni u nùn sɔ̃ɔwɑ u ko. 29 Mɑ Mɔwisi kɑ Aroni bɑ gurenɑ bɑ dɑ Egibitiɔ, bɑ Isirelibɑn guro gurobu mɛnnɑ. 30 Mɑ Aroni u bu gɑri yi kpuro sɑɑriɑ yi Yinni Gusunɔ u Mɔwisi sɔ̃ɔwɑ mi. Mɑ Mɔwisi u tɔn be yĩre ni kuɑ. 31 Yerɑ, bɑ nɑɑnɛ doke. Bɑ giɑ mɑ Yinni Gusunɔ u wɑ nge mɛ bɑ bu nɔni sɔ̃ɔmɔ. Tɛ̃ u kĩ u bu fɑɑbɑ ko. Mɑ bɑ yiirɑ bɑ nùn sɑ̃wɑ.