ISIRELIBAN YARIBU YORUN DI
GUSUNƆ U ISIRELIBA YARA EGIBITIN DI
Isirelibɑ bɑ yoru dimɔ Egibitiɔ
1
1 Yɑkɔbu wi bɑ mɑɑ sokumɔ Isireli, win bibun yĩsɑ wee, be bɑ kɑ nùn nɑ Egibitiɔ, ben bɑɑwure kɑ win kurɔ kɑ bibu. 2 Beyɑ Rubɛni kɑ Simɛɔ kɑ Lefi kɑ Yudɑ 3 kɑ Isɑkɑri kɑ Sɑbuloni kɑ Bɛnyɑmɛɛ 4 kɑ Dɑnu kɑ Nɛfitɑli kɑ Gɑdi kɑ Asɛɛ. 5 Yɑkɔbun bibu kɑ win debumii ni, bɑ sɑ̃ɑwɑ tɔnu wɑtɑ kɑ wɔkuru. N deemɑ Yosɛfu, wi, u wɑ̃ɑ Egibitiɔ sɑnɑm mɛ. 6 Sɑnɑm dɔɔ sɑnɑm wure Yosɛfu kɑ win mɑɑbu kɑ be bɑ wɑ̃ɑ win wɑɑti sɔɔ kpuro bɑ gu. 7 Mɑ Isirelin bii be, bɑ mɑrurɑ bɑ dɑbiɑ bɑ tɛriɑ bɑ yibɑ tem mɛ sɔɔ bɑ kuɑ dɑmgibu.
8 Yen biru sunɔ kpɑo u bɑndu di wi u kun Yosɛfun wɑ̃ɑrun gɑri gɛɛ yɛ̃. 9 Yerɑ u win tɔmbu sɔ̃ɔwɑ u nɛɛ, Isirelibɑ wee, bɑ sun dɑbiru kere bɑ mɑɑ sun dɑm kere. Ǹ n mɛn nɑ, kɑri bɑkɑ sɑ tii derie. 10 Tɑbu bù n dɑ seewɑ bɑ koo bɛsɛn wɛrɔbu somi bu kɑ sun tɑbu ko. Bɑ̀ n kpɑ bu sere sun kisirɑri bu doonɑ. Yen sɔ̃, i de su bu bwisi gɛɛ kɑsuɑ su kɑ ben mɑrubu yɔ̃rɑsiɑ kpɑ bu ku mɑɑ dɑbiru sosi.
11 Mɑ bɑ bu sɔmɑn wirugibu gɔsiɑ be bɑ koo bu yoo sɔm sɛ̃sɔginu koosiɑ. Nge mɛyɑ bɑ kuɑ bɑ kɑ wuu mɑrosu bɑnɑ si bɑ sokumɔ Pitomu kɑ Rɑmusɛsi, si su kuɑ Egibiti sunɔn dukiɑ beru yenu. 12 Adɑmɑ nge mɛ bɑ bu nɔni sɔ̃ɔmɔ, nge mɛyɑ bɑ mɑɑ dɑbiɑmɔ bɑ sosimɔ. Mɑ Egibitigibu bɑ bu tusɑ n bɑndɑ. 13 Mɑ bɑ bu yoo sɔmburu doke. 14 Bɑ birikibɑ murɑmɔ kɑ sɔndu, bɑ mɑɑ gbee sɔmɑ bɑɑyere mɔ̀. Mɑ ben wɑ̃ɑrɑ sɛ̃siɑ domi kɑ nuku kɔ̃surɑ bɑ kɑ bu sɔmɑ ye kpuro koosiɑmɔ.
Egibiti sunɔ u Isirelibɑ
nɔni sɔ̃ɔmɔ
15 Mɑ Egibiti sunɔ u Heberubɑn mɑrusio beni, Sifirɑ kɑ Puɑ sɔ̃ɔwɑ u nɛɛ, 16 ì n Heberubɑn kurɔbu mɑrusiɑmɔ, ì n wɑ bii tɔn durɔwɑ bɑ mɑrɑ, i nùn goowo. Ǹ n tɔn kurɔn nɑ, i nùn derio u n wɑ̃ɑ.
17 Adɑmɑ mɑrusio be, bɑ Gusunɔ nɑsie. Yen sɔ̃nɑ bɑ ǹ kue nge mɛ sunɔ wi, u bu yiire. Bɑ bii be kpuro deriwɑ. 18 Mɑ u bu sokɑ u nɛɛ, mbɑn sɔ̃nɑ i kɑ kuɑ mɛ, i derɑ bii be, bɑ wɑ̃ɑ.
19 Mɑrusio be, bɑ nùn wisɑ bɑ nɛɛ, Heberubɑn kurɔbu bɑ ǹ sɑ̃ɑ nge Egibitigibu. Ben wɑsi yi sɑ̃u. Bɑ rɑ mɑwɑ su sere tunumɑ.