Yɑkɔbun sikubu
50
1 Yerɑ Yosɛfu u dɑ u win tundo sɛ̃re u swĩisimɔ. 2 Mɑ u win tiin dokotorobɑ yiire bu win tundon goru tim sɑwɑ tu ku kɑ kɔ̃si. Mɑ bɑ tu tim mɛ sɑwɑmɔ 3 n kɑ kuɑ sɔ̃ɔ weeru. Egibitigibɑ gɔɔ wooru sinɑ sere sɔ̃ɔ wɑtɑ kɑ wɔkuru.
4 Sɑnɑm mɛ bɑ gɔɔ woo ten bɑɑ kpɑ, Yosɛfu u Egibiti sunɔn yɛnugibu sɔ̃ɔwɑ u nɛɛ, i suuru koowo, nɑ̀ n kĩi geeru wɑ bɛɛn mi, nɑ kĩ i mɑn sunɔ sɔ̃ɔwɑ i nɛɛ, 5 nɛn tundo u kɑ mɑn ɑrukɑwɑni bɔkuɑ u nɛɛ, wee, u koo gbi. Mɑ u mɑn bɔ̃rusiɑ u nɛɛ, ù n gu, n kɑ nùn doo n sike siki te u gbɑ sɔɔ Kɑnɑnin temɔ. Yen sɔ̃nɑ nɑ kĩ n dɑ mi, n nùn sike, kpɑ n gɔsirɑmɑ.
6 Yerɑ sunɔ u nùn wisɑ u nɛɛ, ɑ seewo ɑ dɑ ɑ wunɛn tundo sike nge mɛ u nun bɔ̃rusiɑ. 7 Yosɛfu u seewɑ u dɑ u kɑ win tundo sike. Egibiti sunɔn sɔm kowobu kpuro bɑ nùn swĩi kɑ win yɛnun wirugibu kɑ Egibitin wirugibu 8 kɑ Yosɛfun yɛnugibu kɑ win mɑɑbu kɑ wɔnɔ, win tundon yɛnugibu kpuro gesi. Bibu kɑ yɑ̃ɑnu kɑ kɛtɛbɑ tɔnɑwɑ bɑ deri Gosɛniɔ. 9 Kɛkɛ be dumi gɑwe kɑ mɑɑsɔbu bɑ mɑɑ Yosɛfu swĩi sere tɔn wɔru ge, gɑ kpɛ̃ɑ n bɑndɑ.
10 Ye bɑ turɑ doo soo yerɔ te bɑ rɑ soku Atɑdi, Yuudɛnin dɑɑrun guruɔ, miyɑ bɑ nɔɔgiru suɑ tɑ̃ɑ tɑ̃ɑ bɑ gɔɔ wuri mɔ̀. Mɑ Yosɛfu u win tundon gɔɔ wooru sinɑ mi, sɔ̃ɔ nɔɔbɑ yiru. 11 Kɑnɑnin temgibu bɑ gɔɔ woo te wɑ Atɑdin doo soo yeru mi, mɑ bɑ nɛɛ, wee, Egibitigibu bɑ ko n dɑmgii goon gɔɔ mɔ̀.
Yen sɔ̃nɑ bɑ doo soo yee te sokɑ Abɛli Misirɑimu kɑ ben bɑrum. Tɑ wɑ̃ɑwɑ Yuudɛnin dɑɑrun guruɔ.
12 Nge mɛyɑ Yɑkɔbun bibɑ kuɑ ye u bu yiire. 13 Bɑ win goru suɑ bɑ kɑ dɑ Kɑnɑnin temɔ bɑ sikuɑ kpee wɔru sɔɔ Mɑkpelɑɔ. Kpee wɔru ge, gɑ wɑ̃ɑ gberu gɑru sɔɔ Mɑnden deedeeru te Aburɑhɑmu u dwɑ Eforoni Hɛtin mi, tu kɑ ko win tɔmbun siku yeru.
14 Ye Yosɛfu u win tundo sikuɑ u kpɑ, u gɔsirɑmɑ Egibitiɔ kɑ win mɑɑbu kɑ be bɑ kɑ nùn dɑ kpuro.
Yosɛfu kɑ win mɑɑbu
Yɑkɔbun gɔɔn biru
15 Ye Yosɛfun mɑɑbɑ wɑ ben tundo u gu, yerɑ bɑ nɛɛ, sɔrɔkudo Yosɛfu koo sun tusi kpɑ u sun kɔ̃sɑ kpuro kɔsie ye sɑ rɑɑ nùn kuɑ. 16 Mɑ bɑ nùn gɔriɑ bɑ nɛɛ, bɛsɛn tundo u sere gbi u sun woodɑ yeni wɛ̃ 17 u nɛɛ, su nun gɑri yini sɔ̃, ɑ be gem mɔ, ɑ kɑ sun suuru koowo ɑ bɛsɛn durum ye kpuron gɑri wunɔ wunɛn gɔ̃run di, domi sɑ nun torɑri. Yen sɔ̃, ɑ sun suuru kuo bɛsɛ be sɑ Gusunɔ, wunɛn bɑɑbɑn Yinni sɑ̃ɑmɔ.
Sɑnɑm mɛ Yosɛfu u gɑri yini nuɑ u swĩ. 18 Yerɑ win mɑɑ ben tii bɑ dɑ bɑ yiirɑ win wuswɑɑɔ bɑ nɛɛ, ɑ sun gɑrisio wunɛn yobu.
19 Mɑ Yosɛfu u bu sɔ̃ɔwɑ u nɛɛ, i ku bɛrum ko, nɑ ǹ Gusunɔ. 20 Kɔ̃sɑ i rɑɑ bwisikɑ i mɑn kuɑ, ɑdɑmɑ Gusunɔ u kɔ̃sɑ ye gɔsiɑ geɑ u kɑ tɔn dɑbinu fɑɑbɑ kuɑ nge mɛ sɑ wɑɑmɔ gisɔ. 21 Ǹ n mɛn nɑ, i ku bɛrum ko, kon bɛɛ kɑ bɛɛn bibu nɔɔri.
Mɑ u bu nukuru yɛmiɑsiɑ kɑ gɑri dori.
22 Yosɛfu u sinɑ Egibitiɔ wi kɑ win tundon yɛnugibu. Win wɑ̃ɑrun sɑnɑm kpuro kuɑwɑ wɔ̃ɔ wunɔbu kɑ wɔkuru (110). 23 U Efɑrɑimun bibu wɑ sere kɑ win debuminɔ. Mɛyɑ u mɑɑ Mɑnɑsen bii Mɑkirin bibu wɑ u sɔndi win tɑɑrɔ.
24 Yen biru u win mɑɑbu sɔ̃ɔwɑ u nɛɛ, nɑ kon gbi ɑdɑmɑ Gusunɔ u koo nɑ u bɛɛ yɑrɑ tem mɛn di, kpɑ u kɑ bɛɛ dɑ tem mɛ sɔɔ, mɛ̀n nɔɔ mwɛɛru u Aburɑhɑmu kɑ Isɑki kɑ Yɑkɔbu kuɑ. 25 Mɑ u bu sɔ̃ɔwɑ u nɛɛ, i bɔ̃ruo mɑ Gusunɔ ù n nɑ u bɛɛ yɑrɑ mi n tomɑ minin di, i ko nɛn kukunu suɑ i kɑ doonɑ.
26 Yosɛfu u kuɑwɑ wɔ̃ɔ wunɔbu kɑ wɔkuru u kɑ kpunɑ u gu. Yerɑ bɑ win goru tim sɑwɑ bɑ doke kpɑkororu sɔɔ Egibitiɔ._