Yɑkɔbun gɑri dɑ̃ɑki
49
1 Yen biru Yɑkɔbu u win bibu sokɑ u nɛɛ,
i mɛnnɑmɑ kpɑ n bɛɛ sɔ̃
ye n koo bɛɛ deemɑ ɑmɛn biru.
2 I nɑ i nɔ nɛn bibu, i mɑn swɑɑ dɑkio.
3 Rubɛni, wunɛ nɛn bii yerumɑ, ɑ sɑ̃ɑwɑ nɛn dɑm.
Wunɑ nɑ mɑrɑ nɛn ɑluwɑɑsiru sɔɔ.
Wunɑ ɑ yiiko kɑ dɑm bo nɛn bibu sɔɔ.
4 Adɑmɑ ɑ sɑ̃ɑwɑ nge nim torɑ, ɑ ǹ gɑyɑ mɔ.
Yen sɔ̃nɑ ɑ ǹ kɑɑ ko wunɛn wɔnɔbun wirugii.
Domi ɑ kɑ nɛn kurɔ Bilihɑ kpunɑ,
ɑ nɛn kpin yeru disi doke.
5 Wunɛ Simɛɔ kɑ Lefi, dɑɑ tiɑ i mɔ.
I rɑ bɛɛn tɑkobi suewɑ kɑ gbɑnɑ i kɑ kɔ̃sɑ ko.
6 Bɛɛn mɔrun sɔ̃ i tɔmbu go.
Bɛɛn nuku kɔ̃surun sɔ̃
i kɛtɛ kinɛnun nɑɑ sĩinu bɔɔrɑ.
Yen sɔ̃, nɛn gɔ̃ru gu ku rɑɑ du
bɛɛn kɑnkɑm wesiɑnɔ sɔɔ.
Nɛn bwɛ̃rɑ yu ku rɑɑ kɑ bɛɛ mɛnnɛ.
7 Bɛɛn mɔru yu ko bɔ̃rurɑ yèn sɔ̃ yɑ sɑ̃ɑ gbɑnɑgiɑ.
Mɛyɑ mɑɑ kɑ bɛɛn nuku gbisibu yèn sɔ̃ bu ǹ wɔnwɔndu mɔ.
I ko n yɑrinɛwɑ bɛɛn tem kpuro sɔɔ.
8 Wunɛ mɑɑ Yudɑ, wunɛn mɑɑbu kɑ wɔnɔbu bɑ koo nun siɑrɑ.
Kɑɑ wunɛn yibɛrɛbɑn wĩinu tɑɑre.
Wunɛn tundo bisibu bɑ koo nun yiirɑwɑ.
9 Yudɑ nɛn bii, ɑ sɑ̃ɑwɑ nge gbee sunɔ kpɛmbu,
ge gɑ yɑɑ goomɑ gɑ wee,
kpɑ gu kpɑm wurɑ gu yɑɑ sɑ̃kiriɑ.
A sɛ̃ nge gbee sunɔ mɛro.
Wɑrɑ koo kɑ̃ku u nun bɛsu.
10 Bɑndɑ kun doonɔ wunɛn bweserun di.
Sinɑ bɔrɑ kun kisirɑmɔ wunɛn nɔmun di,
sere Silo ù n tunumɑ,
kpɑ bwesenu kpuro nu nùn mɛm nɔɔwɑ.
11 Wunɛn resɛm yɑ koo kuurɑ
sere ɑ wunɛn kɛtɛku kɑ gen buu sɔri mi.
Yen mɑrum mu koo nun tɑm wɛ̃ mu n kpɑ̃
sere ɑ kɑ mu wunɛn yɑ̃nu teɑ nge nim.
12 Kpɑ wunɛn nɔni yi n sɔ̃ri tɑm mɛn sɔ̃.
Kpɑ wunɛn donnu nu n buriri bom bekum sɔ̃.
13 Wunɛ mɑɑ Sɑbuloni, kɑɑ n wɑ̃ɑwɑ nim wɔ̃kun goorɔ mi goo nimkusu rɑ yɔ̃re.
Wunɛn tem mu ko n tɛriewɑ sere Sidoni giɑ.
14 Isɑkɑri, wunɛ ɑ sɑ̃ɑwɑ nge kɛtɛku dɑmguu.
A rɑ kɑ̃ ɑ n wɑ̃ɑ tem nɔɔ burɑ yenun bɑɑbɑ sɔɔ.
15 A wɑ mɑ mi ɑ wɛ̃re n wɑ̃.
Tem mɛ, mu mɑɑ geɑ sɑ̃ɑ.
Yen sɔ̃nɑ ɑ wurɑ ɑ sɔmunu suɑ kpɑ ɑ yoo sɔmburu ko.
16 Wunɛ mɑɑ Dɑnu, wunɑ kɑɑ n dɑ wunɛn bweserun gɑri wunɑnɛ Isirelibɑn suunu sɔɔ.
17 Kɑɑ n sɑ̃ɑwɑ nge surɔkɔru swɑɑ sɔɔ,
te tɑ dumin nɑɑ sĩinu dwɛ̃ɛmɔ,
mɑɑsɔbu bu kɑ fukurɑ yin wɔllun di.
18 Yinni Gusunɔ, nɑ wunɛn fɑɑbɑ yĩiyɔ.
19 Wunɛ mɑɑ Gɑdi, wɛrɔ dɑbirɑ tɑ koo nun wɔri,
ɑdɑmɑ kɑɑ bu kɑmiɑ ɑ girɑ.
20 Asɛɛ, wunɛ mɑɑ, wunɛn tem mu ko n dĩɑ geenu mɔ.
Sinɑ dimɑ kɑɑ n dɑ di.
21 Wunɛ mɑɑ Nɛfitɑli, ɑ sɑ̃ɑwɑ nge ginɑ ye yɑ tii mɔru kĩ,
yɑ mɑɑ bii burɑnu mɑrumɔ.
22 Wunɛ Yosɛfu, ɑ sɑ̃ɑwɑ nge kɛtɛku gbeeku ge gɑ wɑ̃ɑ bwiɑn bɔkuɔ.
A sɑ̃ɑwɑ nge kɛtɛku buu ge gɑ wɑ̃ɑ guurun gɑ̃ɑrɔ.
23 Yibɛrɛbɑ bɑ nun nɔɔ kuurɑ,
bɑ nun wɔri kɑ mɔru,
bɑ nun sɛ̃ɛnu twee.
24 Adɑmɑ wunɛn tɛndɑ kun wurure
yèn sɔ̃ nɛn Yinni, Gusunɔ Dɑm kpurogii, u wunɛn nɔmɑ dɑm kɑ̃ɑ.
Wi, wi u Isirelibɑ kpɑre,
u bu gɑnuɑ nge kpee bɑkɑru,
25 wiyɑ u koo nun somi u nun domɑru kuɑ,
kpɑ gurɑ yu nun nɛɛyɑ,
kpɑ nim mu n yibɑ bwiiyɔ yi ɑ mɔ wunɛn tem sɔɔ.
U koo mɑɑ wunɛn kurɔbu ko bii mɛrobu,
kpɑ wunɛn sɑbenu nu mɑ.
26 Wunɛn domɑru tɑ koo wunɛn bɑɑbɑbɑgiru kerɑ.
Tɑ kpɑ̃ tɑ guunu kpuro kere.
Domɑ te, tɑ ko n nun wɑ̃ɑsiwɑ, Yosɛfu,
wunɛ wi ɑ sɑ̃ɑ nɛnɛm wunɛn mɑɑbu sɔɔ.
27 Wunɛ mɑɑ Bɛnyɑmɛɛ, ɑ sɑ̃ɑwɑ nge dɛmɑku
ge gɑ rɑ n yɑɑ goomɔ bururu kɑ yokɑ gɑ n temmɔ.
28 Nge mɛyɑ Isireli u kɑ win bibu domɑru kuɑ nɛnnɛnkɑ. Ye u mɑɑ bu sɔ̃ɔwɑ, yerɑ mi. Bii beyɑ bɑ kuɑ win bwese kɛri wɔkurɑ yiru ye.
Yɑkɔbun gɔɔ
29 Yen biru Yɑkɔbu u win bibu yiire u nɛɛ, nɑ dɔɔ n nɛn tɔmbu deemɑ gɔriɔ. I mɑn sikuo nɛn bɑɑbɑbɑn sikirɔ, kpee wɔru sɔɔ ge gɑ wɑ̃ɑ Eforoni Hɛtin gberɔ. 30 Kpee wɔru gerɑ gɑ wɑ̃ɑ Mɑkpelɑn gberɔ, Mɑnden deedeeru Kɑnɑnin temɔ. Gbee terɑ Aburɑhɑmu u dwɑ Eforoni Hɛtin mi, tu kɑ ko win tɔmbun siku yeru. 31 Miyɑ bɑ Aburɑhɑmu sikuɑ kɑ win kurɔ Sɑɑrɑɑ, kɑ mɑɑ Isɑki kɑ win kurɔ Rebekɑ. Miyɑ nɑ mɑɑ Leɑ sikuɑ. 32 Bɑ gbee te kɑ ten kpee wɔru ge dwɑwɑ Hɛtibɑn mi.
33 Sɑnɑm mɛ Yɑkɔbu u win bibu gɑri yi sɔ̃ɔwɑ u kpɑ, yerɑ u win nɑɑsu suɑ u sɔndi kpin yeru wɔllɔ mɑ u gu u dɑ u win bɑɑbɑbɑ deemɑ.