Yosɛfu kɑ win mɑɑbu
37
1 Yɑkɔbu u sinɑ Kɑnɑnin temɔ mi win tundo u rɑɑ sinɑ. 2 Win bibun gɑri wee. Ye Yosɛfu u kuɑ wɔ̃ɔ wɔkurɑ nɔɔbu kɑ yiru, u yɑɑ sɑbenu kpɑrɑmɔ kɑ win mɑɑbu. U rɑ n wɑ̃ɑwɑ kɑ win tundo turosibu, Bilihɑ kɑ Silipɑn bibu sɑnnu. Yerɑ u rɑ ben tundo dɔmɛyɛ dɑɑ kɔ̃sɑ ye win mɑɑ be, bɑ mɔ̀.
3 N deemɑ Yɑkɔbu wi bɑ mɑɑ mɔ̀ Isireli u Yosɛfu kĩ n win bii be bɑ tie kpuro kere, yèn sɔ̃ tɔkɔru sɔɔrɑ u nùn mɑrɑ. Mɑ u nùn tɑko\f |b37:3 tɑko|d - Yɑbe te bɑ kɑ yɑ̃ mini tɑ sɑ̃ɑwɑ te sinɑ bokon bibu bɑ rɑ doke.\F nɔni bwese bwesekɑgiɑ kuɑ. 4 Ye win mɑɑbɑ wɑ ben tundo u nùn kĩ n be kpuro kere, yerɑ bɑ nùn tusiru seewɑ. Bɑ ku rɑ kpĩ bu kɑ nùn kĩru gɑri sɔ̃.
5-7 Sɔ̃ɔ teeru Yosɛfu u dosɑ. Yerɑ u win mɑɑbu dosu ge sɑɑriɑ. U bu sɔ̃ɔwɑ u nɛɛ, i swɑɑ dɑkio n bɛɛ nɛn dosu sɔ̃. Doo bɔkɑ sɑ bɔkumɔ gberɔ, yerɑ nɛn doo bɔkuru tɑ seewɑ tɑ yɔ̃rɑ, mɑ bɛɛginu nɑ nu tu sikerenɑ nu tu kpunɑmmɛ.
Ye bɑ win gɑri nuɑ yerɑ bɑ nùn tusiru sosi 8 bɑ nɛɛ, wunɑ ɑ tɑmɑɑ kɑɑ ko bɛsɛn sunɔ kpɑ ɑ n sun kpɑre?
Mɑ bɑ kpɑm nùn tusɑ bɑ sosi win dosu kɑ win gɑrin sɔ̃.
9 Yen biru u kpɑm dosu gɑgu kuɑ u gu win mɑɑbu sɑɑriɑ u nɛɛ, wee nɑ kpɑm dosɑ nɑ wɑ sɔ̃ɔ kɑ suru kɑ kperi wɔkurɑ tiɑ mɑn kpunɑmmɛ.
10 U mɑɑ gu win tundo sɔ̃ɔwɑ. Mɑ win tundo u nùn gerusi u nɛɛ, mbɑ wunɛn dosu genin tubusiɑnu. Nɛ kɑ wunɛn mɛro kɑ wunɛn mɑɑbu sɑ ko nɑ su nun kpunɑwɑ?
11 Win mɑɑbɑ kɑ nùn nisinu nɛni, ɑdɑmɑ win tundo u ye kpuro lɑsɑbu mɔ̀ win gɔ̃ruɔ.
Bɑ Yosɛfu dwɑ
bɑ kɑ doonɑ Egibitiɔ
12 Sɔ̃ɔ teeru Yosɛfun mɑɑbɑ kɑ ben tundon sɑbenu kɔsɔru dɑ Sikɛmuɔ. 13 Mɑ Isireli u Yosɛfu sɔ̃ɔwɑ u nɛɛ, n ǹ Sikɛmu giɑ wunɛn mɑɑbɑ kɔsɔru dɑ? A nɑ n nun gɔri ben mi.
Yosɛfu u nɛɛ, too.
14 Mɑ Isireli u nɛɛ, ɑ doo ɑ mɛɛri bɑ̀ n bwɑ̃ɑ do kpɑ ɑ wɑ sɑbenu nù n mɑɑ ɑlɑfiɑ mɔ, kpɑ ɑ wurɑmɑ ɑ mɑn sɔ̃.
Nge mɛyɑ u kɑ Yosɛfu gɔrɑ Sikɛmuɔ sɑɑ Heboronin di. 15 Sɑnɑm mɛ u sirenɛ gbɑbu te sɔɔ, yerɑ durɔ goo u kɑ nùn yinnɑ u nùn bikiɑ u nɛɛ, mbɑ ɑ kɑsu.
16 Yosɛfu u nɛɛ, nɛn mɑɑbɑ nɑ kɑsu. A gem mɔ ɑ mɑn sɔ̃ɔwɔ mi bɑ ben sɑbenu kpɑrɑmɔ.
17 Durɔ wi, u nɛɛ, bɑ doonɑ minin di. Domi nɑ nuɑ bɑ nɛɛ, bu doonɑ Dotɑni giɑ.
Mɑ Yosɛfu u win mɑɑbu nɑɑ girɑ u bu deemɑ Dotɑniɔ. 18 Ye bɑ nùn wɑ sɑrun di, u sere turi ben mi, bɑ wesiɑnɑ kɔ bu kɑ nùn go. 19 Bɑ sɔ̃ɔnɑ bɑ nɛɛ, bɛsɛn dosusugii wee u sisi. 20 I de su nùn go tɛ̃ su kpɛ̃ɛ dɔkɔ kpiri ninin teeru sɔɔ, kpɑ su nɛɛ, yɑɑ kɔ̃sɑ gɑɑ yɑ nùn temɑ, kpɑ su wɑ mɛ win dosu si, su koo kɑ koorɑ.
21 Ye Rubɛni u nuɑ mɛ, u kɑsu u nùn fɑɑbɑ ko. Mɑ u nɛɛ, i ku de su nùn go. 22 I nùn kpɛ̃ɛyɔ dɔkɔ kpiri teni sɔɔ gbɑburu mi. Adɑmɑ i ku nùn nɔmɑ doke.
N deemɑ Rubɛni u bwisikumɔ u nùn wɔrɑ ben nɔmɑn di kpɑ u nùn gɔsiɑ ben tundon mi.
23 Sɑɑ ye Yosɛfu u tunumɑ ben mi, bɑ nùn win tɑko nɔni bwese bwesekɑgiɑ ye potɑri. 24 Mɑ bɑ nùn suɑ bɑ kpɛ̃ɛ dɔkɔ kpiri te sɔɔ, te tɑ ǹ nim mɔ. 25 Yen biru bɑ sinɑ bɑ dimɔ. Ye bɑ nɔni seeyɑ bɑ tenku wuuru gɑru wɑ be bɑ sɑ̃ɑ Isimɛɛlibɑ bɑ swĩinɛ bɑ wee Gɑlɑdin di bɑ ben yooyoosu turɑre kɑ gum sɑwɑrɑm kɑ tim mɛ bɑ rɑ soku miru sɔbi bɑ kɑ dɔɔ Egibiti giɑ. 26 Mɑ Yudɑ u win mɑɑbu kɑ wɔnɔbu sɔ̃ɔwɑ u nɛɛ, ɑrufɑɑni yerɑ̀ sɑ ko wɑ sɑ̀ n bɛsɛn wɔnɔ go sɑ tii mɑrisi. 27 I nɑ su dɑ su nùn Isimɛɛlibɑ dɔre, su ku nùn nɔmɑ doke. U sɑ̃ɑwɑ bɛsɛn yɛm domi bɛsɛn wɔnɔwɑ.
Mɑ bɑ win gɑri wurɑ. 28 Ye Isimɛɛli be, be bɑ sɑ̃ɑ Mɑdiɑnin temgibu, bɑ sɑrɔ, yerɑ Yosɛfun mɑɑbɑ nùn gɑwɑ bɑ yɑrɑ dɔkɔ kpiri ten min di bɑ nùn Isimɛɛli be dɔre kɑ sii geesun gobi yɛndu, mɑ bɑ kɑ nùn doonɑ Egibitiɔ.
29 Mɑ Rubɛni u wurɑmɑ dɔkɔ kpiri ten mi, u deemɑ wee, Yosɛfu kun mɑɑ wɑ̃ɑ mi. Yerɑ u win tiin yɑberu nɛnuɑ u kɑrɑnɑ nuku sɑnkirɑnun sɔ̃. 30 Mɑ u gɔsirɑ u wigibu deemɑ u nɛɛ, bii wi kun mɑɑ wɑ̃ɑ mi ni! Nɛn wɑ̃ɑru! Mɑnɑ kon du!
31 Sɑnɑm mɛyɑ bɑ boo kinɛru go mɑ bɑ Yosɛfun yɑberu suɑ bɑ kɑ tu boo gen yɛm tɛɛrɑ. 32 Yerɑ bɑ goo gɔrɑ ben tundon mi kɑ tɑko nɔni bwese bwesekɑgiɑ ye, u nùn sɔ̃ u nɛɛ, u mɛɛrio ye bɑ wɑ. Win biin yɑberɑ mi? Nge n ǹ te.
33 Ye u turɑ mi, Yɑkɔbu u yɑbe te tubɑ. Mɑ u nɛɛ, nɛn biin yɑberɑ mi. Gbeeku yɑɑ yɑ nùn kɑsukɑ yɑ temɑ.
34 Yerɑ u win tiin yɑberu nɛnuɑ u kɑrɑnɑ mɑ u sɑɑki suɑ u deewɑ nuku sɑnkirɑnun sɔ̃. U win biin gɔɔ wooru sinɑ sɔ̃ɔ dɑbi dɑbinu. 35 Win bii tɔn durɔbu kɑ tɔn kurɔbu kpuro bɑ nɑ bu kɑ nùn nukuru yɛmiɑsiɑ, ɑdɑmɑ u yinɑ u ben goon gɑri nɔ. U nɛɛ, u koo win biin gɔɔ swĩwɑ sere u kɑ nùn nɑɑmwɛ gɔriɔ. Mɑ u gɔɔ wi swĩ n kɑ tɛ.
36 Sɑɑ ye sɔɔ, Mɑdiɑni be, bɑ turɑ Egibitiɔ, mɑ bɑ Yosɛfu Potifɑɑ dore wi u sɑ̃ɑ Egibiti sunɔn sinɑ kpɑɑ kɔ̃sobun wirugii.