Esɑu u sinɑ Edɔmun temɔ
36
1 Esɑu wi bɑ mɑɑ sokumɔ Edɔmu win bibun bweseru wee. 2 U kurɔbu suɑ Kɑnɑnibɑn bweseru sɔɔ. Kurɔ ben yĩsɑ wee, Adɑ, Eloni Hɛtin bii, kɑ Oholibɑmɑ, Anɑn bii, Sibeoni Hefin debubu, 3 kɑ Bɑsimɑti, Isimɛɛlin bii, Nɛbɑyɔtun sesu. 4 Adɑ u Esɑu Elifɑsi mɑruɑ. Mɑ Bɑsimɑti u Rewɛli mɑrɑ. 5 Mɑ Oholibɑmɑ u Yeusi mɑrɑ kɑ Yɑlɑmu kɑ Kore. Bii be Esɑu u mɑrɑ Kɑnɑnin temɔ, berɑ mi.
6 Mɑ u win kurɔbu suɑ kɑ bii be kpuro kɑ win tɔn be u mɔ kpuro, kɑ win yɑɑ sɑbenu kɑ win dukiɑ ye u wɑ Kɑnɑnin tem mi kpuro, mɑ u seewɑ u dɑ tem gɑm u kɑ win wɔnɔ Yɑkɔbu tondɑ. 7 Domi ben yɑɑ sɑbenu dɑbi sere ɑyerɑ kun bu turi bu kɑ nu kpɑrɑ. Yen sɔ̃, bɑ ǹ kpɛ̃ bɑ n wɑ̃ɑ yɑm tem. 8 Mɑ Esɑu u dɑ u wɑ̃ɑ Seirin guunun berɑ giɑ. Esɑu wiyɑ bɑ rɑ mɑɑ soku Edɔmu.
Esɑun bibun bweseru
9 Bii be u mɑrɑ, berɑ bɑ kuɑ Edɔmubɑ. Mɑ bɑ sinɑ Seirin guunu giɑ. Ben bweseru wee. 10-13 Elifɑsi, Adɑn bii u seewɑ u Temɑni mɑrɑ kɑ Omɑɑ kɑ Sefo kɑ Gɑtɑmu kɑ Kenɑsi.
Mɑ win kurɔ wi bɑ mɔ̀ Tinnɑ u nùn Amɑlɛki mɑruɑ.
Rewɛli, Bɑsimɑtin bii u mɑɑ seewɑ u Nɑhɑti kɑ Serɑki kɑ Sɑmɑ kɑ Misɑ mɑrɑ. Berɑ bɑ kuɑ Rewɛlin bweseru.
14 Be bɑ mɑɑ sɑ̃ɑ Oholibɑmɑn bibu, berɑ Yeusi kɑ Yɑlɑmu kɑ Kore.
15 Be bɑ sɑ̃ɑ Esɑun bibun bweserun tore, berɑ mini. Esɑun bii gbiikoo Elifɑsi wiyɑ u sɑ̃ɑ bwese ninin sikɑdo, Temɑnigibu kɑ Omɑɑgibu kɑ Sefogibu kɑ Kenɑsigibu 16 kɑ Korebɑ kɑ Gɑtɑmugibu kɑ Amɑlɛkibɑ. Berɑ bɑ sɑ̃ɑ Adɑn bibu.
17 Rewɛliwɑ u mɑɑ sɑ̃ɑ benin sikɑdo, Nɑhɑtigibu kɑ Serɑkibɑ kɑ Sɑmɑgibu kɑ Misɑgibu. Be kpurowɑ bɑ sɑ̃ɑ Bɑsimɑtin bibun bweseru.
18 Be bɑ mɑɑ sɑ̃ɑ Oholibɑmɑn bibun bweserun nuuru, berɑ Yeusi kɑ Yɑlɑmu kɑ Kore.
19 Sɑɑ Esɑun min diyɑ bwese ni kpuro nu mɑrurɑ.
20 Seiri Horin bweserun diyɑ tɔn beni bɑ yɑrɑ. Mɑ bɑ kuɑ win bwese ten kɛrin nuuru. Beyɑ Lotɑni kɑ Sobɑli kɑ Sibeoni kɑ Anɑ 21 kɑ Disoni kɑ Esɛɛ kɑ Disɑni. Berɑ bɑ kuɑ Horibɑn sikɑdobɑ be bɑ wɑ̃ɑ Edɔmun temɔ sɑɑ yellun di. 22 Ye Lotɑni u seewɑ mɑ u Hori mɑrɑ kɑ Hemɑmu. N deemɑ Lotɑni wi, u sesu goo mɔ wi bɑ mɔ̀ Tinnɑ. 23 Mɑ Sobɑli u mɑɑ seewɑ u Alifɑni mɑrɑ kɑ Mɑnɑhɑti kɑ Ebɑli kɑ Sefo kɑ Onɑmu. 24 Mɑ Sibeoni u mɑɑ bibu yiru mɑrɑ, Ayɑ kɑ Anɑ. Anɑ wiyɑ u bwii wɑ yìn min di nim sum mu yɑrimɔ sɑɑ ye u win tundon kɛtɛkunu kpɑrɑmɔ gbɑburɔ. 25 Wiyɑ u Disoni kɑ win sesu Oholibɑmɑ mɑrɑ. 26 Be bɑ mɑɑ sɑ̃ɑ Disonigibu, berɑ Hɛmudɑni kɑ Ɛsibɑni kɑ Yitirɑni kɑ Kerɑni. 27 Be bɑ mɑɑ sɑ̃ɑ Esɛɛgibu, berɑ Bilɑni kɑ Sɑfɑni kɑ Akɑni. 28 Mɑ Disɑni u mɑɑ Usi kɑ Arɑni mɑrɑ.
29-30 Beniwɑ bɑ kuɑ Horibɑn bwese kɛrin wirugibu Edɔmun temɔ, Lotɑni kɑ Sobɑli kɑ Sibeoni kɑ Anɑ kɑ Disoni kɑ Esɛɛ kɑ Disɑni.
31 Sinɑm be bɑ bɑndu di di Edɔmuɔ Isirelibɑ bu sere mɑɑ bɑndu swĩi ben temɔ, be wee. 32 Belɑ, Beorin bii, win wuun yĩsirɑ Dinɑbɑ. 33 Ye Belɑ u gu mɑ Yobɑbu, Serɑkin bii, Botisirɑgii u gɔnɑ kɔsire kuɑ. 34 Ye Yobɑbu u gu mɑ Husɑmu Temɑnigii u gɔnɑ kɔsire kuɑ. 35 Ye Husɑmu u gu mɑ Hɑdɑdi, Bedɑdin bii u gɔnɑ kɔsire kuɑ. Wiyɑ u Mɑdiɑnibɑ go Mɔɑbun bɑru kpɑɑnɔ. Win wuuwɑ Afiti. 36 Ye Hɑdɑdi u gu mɑ Sɑmulɑ Mɑsirekɑgii u gɔnɑ kɔsire kuɑ. 37 Ye Sɑmulɑ u gu mɑ Sɔɔlu u gɔnɑ kɔsire kuɑ. Sɔɔlu wi, u sɑ̃ɑwɑ Rehobɔtugii. Wuu ge, gɑ wɑ̃ɑwɑ dɑɑ te bɑ mɔ̀ Efɑrɑtin goorɔ. 38 Ye Sɔɔlu u gu mɑ Bɑɑli Hɑnɑni, Akɑborin bii, u gɔnɑ kɔsire kuɑ. 39 Ye Bɑɑli Hɑnɑni u gu mɑ Hɑdɑri Pɑugii u gɔnɑ kɔsire kuɑ. Win kurɔn yĩsirɑ Mɛhetɑbɛli, Mɑtiredin bii, Mɛsɑɑbun debubu.
40 Be bɑ mɑɑ sɑ̃ɑ Esɑun bweserun sikɑdobɑ bɑ kɑ wɑ̃ɑ Edɔmuɔ, be wee, Tinnɑ kɑ Alifɑ kɑ Yetɛti 41 kɑ Oholibɑmɑ kɑ Elɑ kɑ Pinɔni 42 kɑ Kenɑsi kɑ Temɑni kɑ Mibisɑɑ 43 kɑ Mɑdiɛli kɑ Irɑmu. Tem mi ben bɑɑwure u sinɑ, win yĩsirɑ bɑ rɑ kɑ mu soku.
Be kpuro bɑ mɑrurɑwɑ sɑɑ Esɑun min di.YOSƐFU