Sɑɑrɑɑ u gu. Aburɑhɑmu
u tem dwɑ mi u koo nùn sike
23
1 Sɑɑrɑɑ u kuɑwɑ wɔ̃ɔ wunɑɑ teeru kɑ nɔɔbɑ yiru (127) u sere gu. 2 Heboroniɔwɑ u gu Kɑnɑnin temɔ mɑ Aburɑhɑmu u nɑ u win gɔɔ swĩ. 3 N deemɑ u ǹ win goo te sikum kpɑ. Yerɑ u seewɑ u dɑ Hɛtibɑn mi, u bu sɔ̃ɔwɑ u nɛɛ, 4 bɛɛn tii i yɛ̃ mɑ nɛ sɔɔwɑ bɛɛn tem mi. Yen sɔ̃, i mɑn tem dɔreo mi ko nɑ n dɑ nɛn tɔmbu sike kpɑ n dɑ n nɛn kurɔ sike mi tɛ̃, nɑ kun win goru mɛɛrɑ mɛ.
5 Mɑ Hɛti be, bɑ Aburɑhɑmu wisɑ bɑ nɛɛ, 6 yinni, ɑ bɛsɛn gɑri swɑɑ dɑkio. Gusunɔ u nun kuɑwɑ sinɑ bii bɛsɛn suunu sɔɔ. A wunɛn kurɔ sikuo bɛsɛn wìn siki wɔru gɑ nun wɛ̃re sɔɔ. Goo kun kɑ nun gu yinɑrimɔ.
7 Yerɑ Aburɑhɑmu u tɔn be yiirɑ u bu bɛɛrɛ wɛ̃. 8 U nɛɛ, ì n kĩ n nɛn kurɔ sike kpɑ nɑ kun win goru mɛɛrɑ, i Eforoni Sokɑɑn bii sɔ̃ɔwɔ yèn bukɑtɑ nɑ mɔ, 9 kpɑ u mɑn Mɑkpelɑn kpee wɔru ge gɑ wɑ̃ɑ win gbee goorɔ deriɑ kpɑ n nùn gobi kɔsiɑ nge mɛ̀n nɔɔ u geruɑ, kpɑ gu ko nɛn siku yeru bɛɛn suunu sɔɔ.
10 N deemɑ Eforoni Hɛti wi, u sɔ̃ kɑ wuun wirugibu gbɑ̃rɑ kɔnnɔwɔ mi bɑ rɑ sinɛ. Mɑ u Aburɑhɑmu wisɑ Hɛti be kɑ be bɑ dumɔ min nɔni biru u nɛɛ, 11 ɑɑwo, nɛn yinni, nɑ nun gbee te kɑ̃wɑ kɑ kpee wɔru ge gɑ wɑ̃ɑ mi. A gu mɔɔ nɛn tɔmbu kpuron nɔni birɔ. A doo ɑ wunɛn kurɔ sike mi.
12 Mɑ Aburɑhɑmu u yiirɑ tɔn ben wuswɑɑɔ 13 u Eforoni sɔ̃ɔwɑ u nɛɛ, ɑ mɑɑ nɛgii swɑɑ dɑkio. Kon nun gbee ten gobi kɔsiɑwɑ. A yi mɔɔ kpɑ n nɛn kurɔ sike mi.
14 Adɑmɑ Eforoni u Aburɑhɑmu sɔ̃ɔwɑ u nɛɛ, 15 nɛn yinni, ɑ swɑɑ dɑkio ɑ nɔ. Mbɑ sii geesun gobi nɛɛru (400) yɑ turɑ nɛ kɑ wunɛn bɑɑ sɔɔ. A wunɛn kurɔ sikuo kperu mi.
16 Aburɑhɑmu u Eforonin gɑri yi wurɑ, mɑ u sii geesun gobi nɛɛ te suɑ u Eforoni wɛ̃ Hɛtibɑ kpuron nɔni biru. Sii geesun gobi yirɑ tenkubɑ bɑ rɑ kɑ kiɑru dwe sɑɑ ye sɔɔ. 17 Nge mɛyɑ Eforonin gbee te kɑ ten kpee wɔru ge kɑ ten dɑ̃ɑ ni nu wɑ̃ɑ mi kpuro 18 yɑ kuɑ Aburɑhɑmugiɑ Hɛtibɑ kpuron nɔni biru kɑ sere be bɑ mɑɑ dumɔ gbɑ̃rɑ kɔnnɔn min di.