Agɑɑ u Aburɑmu
Isimɛɛli mɑruɑ
16
1 Aburɑmu kɑ win kurɔ Sɑɑrɑi bɑ ǹ bii mɑrɑ. Wee Sɑɑrɑi wi, u yoo tɔn kurɔ goo mɔ wi u sɑ̃ɑ Egibitigii. Win yĩsirɑ Agɑɑ. 2 Mɑ Sɑɑrɑi u win durɔ sɔ̃ɔwɑ u nɛɛ, wee, Yinni Gusunɔ u mɑn kuɑ wĩro. Nɑ nun kɑnɑmɔ, ɑ kɑ nɛn yoo duo. Sɔrɔkudo kon bibu wɑ sɑɑ win min di.
Mɑ Aburɑmu u win kurɔn gɑri wurɑ. 3 Sɑɑ ye sɔɔrɑ Sɑɑrɑi u win yoo Agɑɑ wi suɑ u win durɔ kɑ̃ kurɔ. N deemɑ bɑ wɔ̃ɔ wɔkuru kuɑ kɔ Kɑnɑnin temɔ. 4 Mɑ Aburɑmu u kɑ Agɑɑ mɛnnɑ mɑ Agɑɑ u gurɑ suɑ. Ye u wɑ u gurɑ mɔ, yerɑ u win yinni Sɑɑrɑi gɛndu wɔri. 5 Mɑ Sɑɑrɑi u Aburɑmu sɔ̃ɔwɑ u nɛɛ, nɛn wɔmburu tu wɔri wunɛ sɔɔ. Nɑ nun nɛn yoo kɑ̃ kurɔ, ɑdɑmɑ ye u wɑ mɑ u gurɑ mɔ, yerɑ u mɑn gɛndu wɔri. Yinni Gusunɔwɑ koo sun siriɑ nɛ kɑ wunɛ.
6 Aburɑmu u Sɑɑrɑi wisɑ u nɛɛ, wunɑ ɑ wunɛn yoo mɔ, ɑ kɑ nùn koowo nge mɛ ɑ kĩ.
Sɑɑ yerɑ u Agɑɑ nɔni mɛni mɑ Agɑɑ u dukɑ suɑ win min di. 7 Yinni Gusunɔn gɔrɑdo\f |b16:7 Yinni Gusunɔn gɔrɑdo|d - Isirelibɑ bɑ ku rɑ kɑ̃ bu Gusunɔn yĩsiru siɑ. Yen sɔ̃nɑ ù n bu kuremɑ bɑ rɑ nɛɛ, Gusunɔn gɔrɑdowɑ.\F u nùn wɑ gbɑburɔ bwiɑ gɑɑn bɔkuɔ Surin swɑɑɔ. 8 U nɛɛ, Agɑɑ, Sɑɑrɑin yoo, mɑn diyɑ ɑ wee. Mɑnɑ ɑ dɔɔ.
Agɑɑ u nɛɛ, nɑ dukɑ suɔwɑ nɛn yinni Sɑɑrɑin min di.
9 Mɑ gɔrɑdo wi, u nùn sɔ̃ɔwɑ u nɛɛ, ɑ gɔsiro wunɛn yinnin mi, kpɑ ɑ nùn wiru kpĩiyɑ. 10 Kon wunɛn bweseru dɑbiɑsiɑ sere goo kun kpɛ̃ u tu gɑri. 11 Wee ɑ gurɑ mɔ, kɑɑ bii tɔn durɔ mɑ kpɑ ɑ nùn yĩsiru kɛ̃ Isimɛɛli. Domi Yinni Gusunɔ u wunɛn nɔɔ nuɑ nɔni swɑ̃ɑ te sɔɔ. 12 Bii wi, u ko n sɑ̃ɑwɑ nge kɛtɛku gbeeku. U ko n kɑ tɔmbu kpuro nɔɔ gɔmunu mɔ̀. Tɔmbu kpuro bɑ koo mɑɑ kɑ nùn nɔɔ gɔmunu ko. U ko n kɑ win dusibu tondinɛ.
13 Ye Yinni Gusunɔ u kɑ Agɑɑ gɑri yi kuɑ u kpɑ, mɑ Agɑɑ u nùn yĩsiru kɑ̃ u nɛɛ, wunɑ Yinni wi u wɑɑmɔ. Domi u tii bikiɑ u nɛɛ, kɑ gem nɑ Gusunɔ wɑ kɑ nɔni, mɑ nɑ wɑ̃ɑ nɑ ǹ gu? 14 Yen sɔ̃nɑ bɑ dɔkɔ ye sokɑ Gusunɔ u mɑn wɑɑmɔ. Dɔkɔ ye, yɑ wɑ̃ɑwɑ Kɑdɛsi kɑ Bɑrɛdin bɑɑ sɔɔ.