Arukɑwɑni ye Gusunɔ
u kɑ Aburɑmu bɔkuɑ
15
1 Yenibɑ kpuron biru Yinni Gusunɔ u kɑ Aburɑmu gɑri kuɑ kɑ̃siru sɔɔ u nɛɛ, Aburɑmu, ɑ ku bɛrum ko, nɛnɑ nɑ wunɛn tɛrɛru, wunɛn ɑre ko n kpɑ̃ gem gem.
2 Aburɑmu nùn wisɑ u nɛɛ, Yinni Gusunɔ, mbɑ kɑɑ mɑɑ mɑn wɛ̃. Wee nɑ gɔɔ dɔɔ bii sɑri kpɑ Ɛliesɛɛ Dɑmɑsigii u ko nɛn tubi dio. 3 Yèn sɔ̃ ɑ ǹ mɑn bii kɑ̃, nɛn yoo Ɛliesɛɛ wi bɑ mɑrɑ nɛn yɛnuɔ wiyɑ koo nɛn tubi di.
4 Yerɑ Yinni Gusunɔ u Aburɑmu sɔ̃ɔwɑ u nɛɛ, n ǹ wi, u koo ko wunɛn tubi dio. Wunɛn tii tiin biiwɑ u koo wunɛn tubi di.
5 Mɑ Gusunɔ u kɑ nùn dɑ tɔɔwɔ u nɛɛ, ɑ wɔllu mɛɛrio kpɑ ɑ kperi gɑri, ɑ̀ n kɑɑ kpĩ. Nge mɛyɑ wunɛn bweserɑ koo dɑbiru nɛrɑ.
6 Mɑ Aburɑmu u Yinni Gusunɔ nɑɑnɛ kuɑ. Yen sɔ̃nɑ Gusunɔ u nùn gɑrisi gemgii. 7 Mɑ u kpɑm nùn sɔ̃ɔwɑ u nɛɛ, nɛnɑ nɑ Yinni Gusunɔ, nɛ wi nɑ nun yɑrɑmɑ sɑɑ Urun di Kɑlɑden temɔ kpɑ n kɑ nun tem mɛni wɛ̃.
8 Adɑmɑ u wisɑ u nɛɛ, Yinni Gusunɔ, ɑmɔnɑ ko nɑ n kɑ yɛ̃ mɑ tem mɛni mu koo ko nɛgim.
9 Mɑ Yinni Gusunɔ u nɛɛ, ɑ nɑɑ gbiibɑ wɔ̃ɔ itɑgiɑ tɑmɑ kɑ boo niu wɔ̃ɔ itɑguu, kɑ yɑ̃ɑ kinɛru wɔ̃ɔ itɑgiru kɑ kpɑruko kɑ totobɛrɛ buu kpɑ ɑ mɑn ye goowɑ ɑ yi.
10 Yerɑ Aburɑmu u yɛɛ yi kpuro mɛnnɑ u yi go u bɛrɑnɑ yiru u yin bɛsi yi u kɑrinɑsiɑ, ɑdɑmɑ u ǹ gunɔsu bɛre si. 11 Yɑberekunu nu sɑrɑmɑ yɑɑ goo ni sɔɔ, mɑ Aburɑmu u nu girɑ.
12 Ye sɔ̃ɔ duɔ, dom mɔn bɑkɑrɑ Aburɑmu wɔri mɑ bɛrum nùn mwɑ yɑm wɔ̃ku te sɔɔ. 13 Yerɑ Yinni Gusunɔ u nùn sɔ̃ɔwɑ u nɛɛ, ɑ n yɛ̃ mɑ wunɛn bibun bweserɑ tɑ koo tem tukumɔ sinɑ mi bɑ koo bu yoru diisiɑ kpɑ bu bu nɔni sɔ̃ sere wɔ̃ɔ nɛɛru (400). 14-16 Adɑmɑ kon tem mɛn tɔmbu siri be bɑ koo bu yoo te diisiɑ. Wɔ̃ɔ dɑbirun biru bɑ koo yɑri tem min di kɑ dukiɑ bɑkɑ kpɑ bu kpɑm gɔsirɑmɑ mini, domi Amɔrebɑn durum kun ginɑ yibɑ n kɑ bu kpeerɑsiɑ. Adɑmɑ wunɛ kɑɑ tɔkɔ kowɑ kɔ̃ɔ kɔ̃ɔ kpɑ ɑ dɑ ɑ wunɛn bɑɑbɑbɑ deemɑ kɑ ɑlɑfiɑ.
17 Ye sɔ̃ɔ kpɑ yɑm tĩrɑ niki niki, yerɑ Gusunɔ u kurɑmɑ yɑɑ bɛsi yin kpoo kpookɑ sɔɔ. U sɑ̃ɑ nge dɔ̃ɔ bokon wiisu kɑ dɔ̃ɔ yɑri. 18 Nge mɛyɑ u kɑ Aburɑmu ɑrukɑwɑni bɔkuɑ tɔ̃ɔ te sɔɔ u nɛɛ, wunɛn bweserɑ kon tem mɛni wɛ̃ sɑɑ dɑɑ piibu ge gɑ wɑ̃ɑ Egibitin tem nɔɔ burɑ yerun di sere dɑɑ bɑkɑ ten mi, te bɑ mɔ̀ Efɑrɑti. 19 Tem mɛ, mu sɑ̃ɑwɑ Kenibɑn tem kɑ Kenisibɑgim kɑ Kɑdimɔnibɑgim 20 kɑ Hɛtibɑgim kɑ Feresibɑgim kɑ Refɑbɑn tem, 21 kɑ Amɔrebɑn tem kɑ Kɑnɑnibɑn tem kɑ Girigɑsibɑn tem kɑ Yebusibɑn tem.