Gusunɔ u win tɑkɑ koorɑ kpuro bɔ̃rusi
3
1 N deemɑ wɑɑ yɑ bwisi bo gbeeku yɛɛ kpuro sɔɔ yi Yinni Gusunɔ u tɑkɑ kuɑ. Yerɑ yɑ nɑ kurɔ win mi, yɑ nùn bikiɑ yɑ nɛɛ, kɑ gem Gusunɔ u nɛɛ, i ku gbɑɑ tenin dɑ̃ɑ binu kpuro di?
2 Mɑ kurɔ wi, u ye wisɑ u nɛɛ, sɑ rɑ gbɑɑ ten dɑ̃ɑ binu di ni, 3 mɑ n kun mɔ te tɑ wɑ̃ɑ suunu sɔɔ. Terɑ u nɛɛ, su ku mɑm ten binu bɑbɑ su sere di su ku kɑ gbin sɔ̃.
4 Yerɑ wɑɑ ye, yɑ kurɔ wi wisɑ yɑ nɛɛ, i ǹ gbimɔ pɑi! 5 Domi Gusunɔ u yɛ̃ dɔmɑ te i ten binu di, bɛɛn nɔni koo wukiɑrɑwɑ kpɑ i n sɑ̃ɑ nge win tii, i n geɑ kɑ kɔ̃sɑ yɛ̃.
6 Mɑ kurɔ wi, u wɑ dɑ̃ɑ te, tɑ kɑ dii dobu weenɛ tɑ wɑɑbu wɑ̃, tɑ koo mɑɑ kpĩ tu nùn ko bwisigii. Mɑ u ten bii ni sɔrɑ u di. U mɑɑ win durɔ wɛ̃ kɑ wi bɑ wɑ̃ɑsinɛ, mɑ wi, u mɑɑ di. 7 Yerɑ be yiru kpuron nɔni wukiɑrɑ bɑ giɑ mɑ tererɑ bɑ wɑ̃ɑ. Mɑ bɑ dɑ bɑ dɑ̃ɑ te bɑ mɔ̀ figien wuru bɑkɑsu burɑ bɑ swɛɛnɑ bɑ kɑ tii gɑndi.
8 Ye bɑ Yinni Gusunɔn nɔɔ nuɑ u bɔsu gbɑɑ te sɔɔ yokɑ, yerɑ bɑ dɑ bɑ nùn kukue gbɑɑ ten dɑ̃nun suunu sɔɔ. 9 Adɑmɑ Yinni Gusunɔ u durɔ wi sokɑ u nɛɛ, mɑnɑ ɑ wɑ̃ɑ.
10 Durɔ wi, u wisɑ u nɛɛ, ye nɑ wunɛn nɔɔ nuɑ gbɑɑru sɔɔ, bɛrum mɑn mwɑ domi tererɑ nɑ wɑ̃ɑ, mɑ nɑ kukuɑ.
11 Gusunɔ u nɛɛ, wɑrɑ nun sɔ̃ɔwɑ mɑ tererɑ ɑ wɑ̃ɑ. Nge ɑ dɑ̃ɑ ten binu diwɑ te nɑ nɛɛ, ɑ ku di.
12 Durɔ wi, u nɛɛ, kurɔ wi ɑ mɑn wɛ̃ u n kɑ mɑn wɑ̃ɑ wiyɑ mɑn dɑ̃ɑ ten binu wɛ̃ mɑ nɑ di.
13 Mɑ Yinni Gusunɔ u kurɔ wi bikiɑ u nɛɛ, mbɑn sɔ̃nɑ ɑ kuɑ mɛ.
Mɑ u wisɑ u nɛɛ, wɑɑ yɑ mɑn kɔkurɑ nɑ kɑ di.
14 Yinni Gusunɔ u wɑɑ ye sɔ̃ɔwɑ u nɛɛ, yèn sɔ̃ ɑ kuɑ mɛ, ɑ kuɑ bɔ̃rurɑ n yɛɛ kpuro kere.
Wunɛn nukurɑ kɑɑ n dɑ kɑ kɑbiri.
Temɑ kɑɑ n dɑ di
sere kɑ wunɛn wɑ̃ɑrun nɔrɔ.
15 Nɑ kon mɑɑ yibɛrɛ tɛɛru doke
wunɛ kɑ kurɔ win bɑɑ sɔɔ,
kɑ mɑɑ wunɛn bweseru kɑ win bweserun bɑɑ sɔɔ.
Win bweserun goo u koo nun wiru kɔrɑ,
kɑɑ mɑɑ win nɑɑ tokuru mɛɛrɑ ko.
16 Yerɑ u mɑɑ kurɔ wi sɔ̃ɔwɑ u nɛɛ,
kon wunɛn gurɑn wɑhɑlɑ sosi.
Kɑɑ n dɑ mɑwɑ kɑ nɔni swɑ̃ɑru.
Wunɛn kĩru kpuro tɑ ko n wɑ̃ɑwɑ wunɛn durɔ sɔɔ,
wiyɑ ko n mɑɑ sɑ̃ɑ wunɛn wirugii.
17-19 U mɑɑ durɔ wi sɔ̃ɔwɑ u nɛɛ, yèn sɔ̃ ɑ wunɛn kurɔn gɑri wurɑ, mɑ ɑ dɑ̃ɑ ten binu di te nɑ nɛɛ, ɑ ku di,
nɑ tem bɔ̃rusi wunɛn sɔ̃.
Sɑ̃kunu kɑ ɑwĩiyɑ mu koo nun kpiiyɑ,
wunɛn wɑ̃ɑru kpuro sɔɔ,
nɔwiɑwɑ kɑɑ n dɑ ko
kpɑ ɑ wɛnyɑ ɑ sere wunɛn dĩɑnu wɑ gberɔ.
Yen biru kɑɑ gbi
kpɑ bu nun sike temɔ,
domi temɑ nɑ kɑ nun kuɑ.
Kɑɑ mɑɑ wurɑ ɑ ko tem mɛ.
20 Mɑ Adɑmu u win kurɔ yĩsiru kɑ̃ Efɑ, domi wiyɑ u sɑ̃ɑ tɔmbu kpuron mɛro. 21 Mɑ Yinni Gusunɔ u Adɑmu kɑ win kurɔ yɑɑ gɔnɑn yɑbenu kuɑ u bu sebusiɑ.
22 Mɑ Yinni Gusunɔ u nɛɛ, wee tɔnu wi, u kuɑ nge mɛ nɑ sɑ̃ɑ, u geɑ kɑ kɔ̃sɑ giɑ. Tɛ̃ nɑ ǹ kon de u dɑ̃ɑ bii ni nu koo nùn wɑ̃ɑru wɛ̃ sɔri u di u n kɑ wɑ̃ɑ kɑ bɑɑdommɑɔ.
23 Yerɑ u nùn girɑ Edɛnin gbɑɑ ten min di u dɑ u tem wuku mɛ u kɑ nùn mɔmɑ. 24 Nge mɛyɑ u kɑ Adɑmu girɑ mɑ u wɔllun kɔ̃sobu doke Edɛnin gbɑɑ ten kɔnnɔwɔ, ge gɑ wɑ̃ɑ sɔ̃ɔ yɑri yerun berɑ giɑ. Bɑ tɑkobi nɛni bɑ ye fĩɑmɔ mɑ yɑ bɑllimɔ sɔ̃ɔ sɔɔ nge dɔ̃ɔ yɑrɑ, bɑ kɑ dɑ̃ɑ tèn binu nu koo tɔnu wɑ̃ɑru wɛ̃ kɔ̃su.