2
1 Nge mɛyɑ Gusunɔ u kɑ wɔllu kɑ tem kɑ kpuro ye yɑ wɑ̃ɑ sɔɔ tɑkɑ kuɑ u wiru go. 2 Tɔ̃ru nɔɔbɑ tiɑse sɔɔrɑ u win sɔmɑ ye u kuɑ kpuro wiru go mɑ u wɛ̃rɑ tɔ̃ru nɔɔbɑ yiruse. 3 Mɑ u nɔɔbɑ yiruse te yi nɛnɛm win sɔ̃, u tu domɑru kuɑ yèn sɔ̃ te sɔɔrɑ u wɛ̃rɑ ye u kpuro tɑkɑ kuɑ u kpɑ.
Gusunɔ u tɔnu doke
gbɑɑ te bɑ sokumɔ Edɛniɔ
4 Sɑnɑm mɛ Yinni Gusunɔ u wɔllu kɑ tem tɑkɑ kuɑ, 5 dɑ̃ru gɑrɑ kun ginɑ kpiɑ tem sɔɔ, yɑkɑsu gɑsu kun mɑɑ kpiɑ domi Yinni Gusunɔ kun ginɑ gurɑ nɛɛsie sɑnɑm mɛ. Tɔnu mɑɑ sɑri wi u koo tem mɛ wuku. 6 Adɑmɑ kɑkoru gɑru tɑ rɑ se tem di tu tem mɛ nikererɑsiɑ kpuro.
7 Yen biruwɑ Yinni Gusunɔ u tɔnu mɔmɑ kɑ tem u nùn wɑ̃ɑrun wom wɛ̃sie win wɛ̃rɔ, mɑ tɔnu kuɑ wɑso. 8 Mɑ Yinni Gusunɔ u gbɑɑru kuɑ Edɛniɔ sɔ̃ɔ yɑri yerun berɑ, mɑ u tɔnu wi u kuɑ mi suɑ u doke sɔɔ. 9 Mɑ u dɑ̃ɑ bwese bwesekɑ kpiisiɑ te sɔɔ, ni nu wɑɑbu wɑ̃ kɑ ni nu dim do, kɑ sere dɑ̃ɑ tèn binu nu koo tɔnu wɑ̃ɑru wɛ̃, kɑ mɑɑ tèn binu nu koo tɔnu geɑ kɑ kɔ̃sɑ giɑsiɑ. Dɑ̃nu yiru ye, nu wɑ̃ɑwɑ gbɑɑ ten suunu sɔɔ.
10 Dɑɑru gɑrɑ wɑ̃ɑ gbɑɑ te sɔɔ, te tɑ tu nike nikeru sɑ̃ɑ. Min diyɑ tɑ yɑrɑ mɑ tɑ kɛri kuɑ nnɛ. 11 Gbiikɑɑn yĩsirɑ Pisoni. Yeyɑ yɑ tem mɛ bɑ mɔ̀ Hɑfilɑ sikerenɛ. 12 Tem mɛ sɔɔrɑ wurɑ geɑ wɑ̃ɑ. Turɑre nubu durorugiɑ mɑɑ wɑ̃ɑ mi, kɑ kpee gobiginu. 13 Kɛrɑ yirusen yĩsirɑ mɑɑ Gihoni. Yeyɑ yɑ tem mɛ bɑ mɔ̀ Kusi sikerenɛ. 14 Kɛrɑ itɑsewɑ mɑɑ Tigiri. Yeyɑ yɑ kokumɔ tem mɛ bɑ mɔ̀ Asirin sɔ̃ɔ yɑri yeru giɑ. Kɛrɑ nnɛsewɑ mɑɑ Efɑrɑti.
15 Ye Yinni Gusunɔ u gbɑɑ te sɔɔru kuɑ u kpɑ Edɛniɔ, yerɑ u tɔnu wi suɑ u doke sɔɔ u kɑ tu wuku kpɑ u n tu kɔ̃su. 16 Mɑ u nùn woodɑ yeni wɛ̃ u nɛɛ, kɑɑ kpĩ ɑ gbɑɑ ten dɑ̃nu kpuron binu di. 17 Adɑmɑ dɑ̃ɑ tèn binu nu koo tɔnu geɑ kɑ kɔ̃sɑ giɑsiɑ, ɑ ku rɑ ten binu di, domi dɔmɑ te ɑ nu di, kɑɑ gbiwɑ.
18-20 Kɑ temɑ Yinni Gusunɔ u gbeeku yɛɛ kpuro kuɑ kɑ gunɔsu kpuro, mɑ u kɑ ye kpuro nɑ tɔnu win mi, u kɑ wɑ mɛ u koo ye yĩsiru kɛ̃. Mɑ tɔnu wi, u yɑɑ sɑbenu kpuro kɑ gunɔsu kɑ gbeeku yɛɛ kpuro yĩsɑ kɑ̃. Yĩsi te tɔnu wi, u mɑɑ yɑɑ bɑɑyere kɑ̃ teyɑ bɑ kɑ ye sokumɔ. Adɑmɑ ye kpuro sɔɔ, sɑri ye yɑ kɑ nùn weenɛ ye yɑ koo nùn somi. Yen sɔ̃nɑ Yinni Gusunɔ u nɛɛ, n ǹ wɑ̃ tɔnu u n wɑ̃ɑ wi turo. Kon nùn goo kuɑ u n sɑ̃ɑ nge wi, wi u koo nùn somi.
21 Yerɑ Yinni Gusunɔ u tɔnu wi dom mɔn bɑkɑru kpɛ̃ɛ u dweeyɑ. Mɑ u win yɛ̃sɑn kuku teeru wunɑ mɑ u yɛ̃sɑ ye kɔruɑ kɑ yɑɑ bɑɑsi. 22 Mɑ u tɔn kurɔ tɑkɑ kuɑ kɑ tɔn durɔn kuku te, te u wunɑ. Mɑ u kɑ nùn nɑ tɔn durɔ win mi. 23 Yerɑ durɔ wi, u nɛɛ,
wee tɛ̃, wini u wɑsi mɔ nge nɛgii mɑm mɑm.
Bɑ koo nùn sokuwɑ tɔn kurɔ,
domi tɔn durɔn min diyɑ u yɑrɑ.
24 Yen sɔ̃nɑ durɔ u koo win tundo kɑ win mɛro deri kpɑ wi kɑ win kurɔ bɑ n mɑninɛ, kpɑ be yiru kpuro bu ko wɑsi tee.
25 Sɑɑ ye sɔɔ, durɔ wi kɑ win kurɔ tererɑ bɑ wɑ̃ɑ. Sekurɑ kun mɑɑ ben goo mɔ̀.