सावापोरिओ रुइचि
९
खोन्किना पाच्कातात्ओतात निनाम्हाङ काफाआ अ़थुथुरि मुत्तु,
खोन्कि अ़ङ्का अ़क्तात साङ्केन्मा खाङ,
मो निनाम्मादुङ्का हेन्खामादा धालावा।
मो साङ्केन्मा अ़थेन मात्द़ङ्ओ हुतaओ अ़होत्खा पुवा।
२ मो साङ्केन्माआ अ़थेन मात्द़ङ्ओ हुत होरु,
खोन्कि मो अ़थेन मात्द़ङ्ओ हुत्दाङ्का अ़धिवो मिराक्लाम्पा तुङ्ऱक लोन्तिन्वा तुङ्ऱक लोन्ता,
मो तुङ्ऱक्आ नाम्साम खोन्कि नाम्छ़ऱ कुन्यामा मु।
३ मो तुङ्ऱक्लाम्पा हेन्खामादा रुइचि म़लोन्ता,
खोन्कि हेन्खामादाओ लुङ्छुमित्चिवात्नि मोचि सावा म़प़चि।
४ मोचि म़लोचि,
हेन्खामादाओ घासा,
स़ङ्ताङ्चि माङ्लो खाक्कोछाङ ल़क्ल़क्ल़क्वाओ अ़चुबाक्वा याक्याङ्ओचि देत्छाङ मान्मुदानुम्च़म।
मोचि म़लोचि म़नाचि ओन्ङा दन्दा पुवानुम्च़म,
साङ्कोओ अ़त़ऱबुप्दा निनाम्हाङ्ओ अ़चुसेप्मा मात्द़ङ।
५ रुइचिआ मो म़नाचि सेत्मा ना मान्सेत्दानुम्नि म़लोचि,
मेन पाच्कादोङ्वात्तारि दुखा प़मा पाङ म़प़चि।
खोन्किना म़ना लुङ्छुमित्आ केप्तुहिदा देत्नि योक्तु मोचिआ प़माय़ङ दुखाछाङ मोवात्निङा मु।
६ मो पाच्कादोङ्वात्तारि स़खालाम म़लाम,
मेन मो ऩधिरुन।
मोचि स़मा म़स़,
मेन स़मा मोचिएदाङ्का फुङ।
७ मो रुइचि ङेन मुमाओ निम्पाङ म़चुम्साओ युक्वाचिवात्नि म़काराङा।
मोचिओ अ़चुताङ्दु हाराक्वाओ ताङ्बोप्खावाको दाराङा,
खोन्कि मोचिओ अ़चुङाइवा म़नाचिओ अ़चुङाइवाचिवात्नि काराङा।
८ मोचिओ अ़चुताङ्मुवा मेत्छामाचिओ अ़चुताङ्मुवावात्नि कियाङा,
खोन्कि मोचिओ अ़चुक़ङ धिनाराचिओ अ़चुक़ङ्चिवा चारुओ म़मुवाङा।
९ मोचिओ अ़चुकोङ्कोम काकारावाकोसाआ दिप्ताङा,
खोन्कि मोचिओ अ़चुलाप्दाङ्का लोन्ताओ य़ङ ब़द्धे युक्वाचिआ ङेन्दा सात्याङ्सा म़लोराङाओ रथाचिओवा ऱङाङा।
१० मोचिओ अ़चुमिरिचि खोन्कि अ़चुलिफुचि लुङ्छुमिओवा मुवाङा।
मोचिओ अ़चुमिरिदा पाच्कादोङ्वात्तारि म़नाचि चाअ़त्लो दुखा प़मा सावा याआङा।
११ अ़थेन मात्द़ङ्ओ हुत्दाओ हुत्दाङ्काओ य़ङ्काखुन मो रुइचिएदा हाङ्काचि मु।
हिब्रु य़ङ्दा मोसोओ अ़ऩङ ‘एबाद्दोन’ खोन्कि ग्रिक य़ङ्दा मोसोओ अ़ऩङ ‘अप्पोल्लियन’ ओ।
ओसोओ अ़तुप्य़ङ ‘कालुक’।
१२ बुयाओ अ़चाअ़त्मा खारालावा।
खानुम,
हान्छाङ ह्वातात अ़चाअ़त्माचि ताचिङ्चि।
युक्वा कायुक्चि
१३ खोन्किना छकातात्ओ निनाम्हाङ काफाआ अ़थुथुरि मुत्तु,
खोन्कि निनाम्हाङ्ओ अ़चुबुदा याआङाओ हाराक्वाओ ब़क्खाओ चारकाचोम्दाओ चारकातात खुक्खाचिदाङ्का लोन्ताओ अ़क्तात य़ङ एनुङ।
१४ थुथुरि काक़क्क छकातात्ओतात निनाम्हाङ काफा ओवात्नि अ़लोवाङाओ अ़ङ्का एनुङ,
“अ़धिवा याङ्वामा युफ्रेतिस्दा म़छुम्सायुङ्साओ चारकापाङ निनाम्हाङ काफाचि लेरानुम्च़म!”
१५ खोन्कि मो चारकापाङ निनाम्हाङ काफाचि म़लेरुचि।
मोचि म़ना रावाओ सुम्कालोक्ओ अ़क लोक सेत्सि मोन्ग़रि,
मो लेन,
मो दोङ्वात खोन्कि मो दोङ्ओ निम्पाङ म़चुम्सायुङ्सा।
१६ मो युक्वा कायुक रात्खामिचिओ अ़चुखिप बिस करोरा याआङाओ अ़ङ्का एनुङ।
१७ अ़ङ्सेन्चिदा खाङ्ओ युक्वाचि खोन्कि युक्वा कायुक्चि ओवाको म़मुवाङा।
मोचिओ अ़चुकोङ्कोम्ओ अ़दिप्खा हालापाक्पाक्ओ,
माक़ल़ङ्ल़ङ्ओ खोन्कि हारादिदिओ मुवाङा।
मो युक्वाचिओ अ़चुताङ्चि धिनाराचिओ अ़चुताङ्चिवा म़काराङा।
मोचिओ अ़चुदोचिदाङ्का मि,
तुङ्ऱक,
खोन्कि गन्दक लोन्ताङा।
१८ मोचिओ अ़चुदोदाङ्का लोन्ताओ मि,
तुङ्ऱक खोन्कि गन्दक सुम्कातात अ़चाअ़त्माचिआ सुम्कालोक्ओ अ़क लोक म़नाचि म़सेरुचि।
१९ मो युक्वाचिओ अ़चुसावा अ़चुदो खोन्कि अ़चुमिरिचिदाछाङ याआङा।
मोचिओ अ़चुमिरिचि प़चिवा म़मुवाङा।
मो मिरिचिओ अ़चुताङ याआङा,
मोलाम्पा मोचिआ म़नाचि खेन म़वाइसुङुचि।
२० ओ अ़चाअ़त्मादाङ्का काह़ङ म़नाचिआ चाकावालावाचि खोन्कि आप्पि अ़चुछुक्आ म़मुचिओ सेम्पोक्चि ब़त्मा मान्छित्अ़दा।
खोन्कि खामान्खाङ्कादा,
खामान्एन्कादा खोन्कि कोन्मा मान्ऱकादा,
हाराक्वा,
रुपा,
कासा,
लुङ खोन्कि स़ङ्ओ सेम्पोक्चिएदा बोम्मान्चिदाङ्का अ़चुमिन्मा मान्लाअ़दा।
२१ मोचिओ अ़चुसेत्मा काचि,
अ़चुम़क्फेङ मुमा,
अ़चुताङ्लान खोन्कि अ़चुख़मादाङ्का अ़चुमिन्मा मान्लाअ़दा।