पावल्आ फिलेमोन छाप्तुओ छाप्लावा
१
१-२ येसु ख्रिस्तओ निकि छेक्ङाङाओ अ़ङ्का पावल खोन्कि तिमोथि निछाएदाङ्का ओ छाप्लावा आन्कान सोमातुक्तुम्ओ अ़क्निओ आन्यावा फिलेमोन,
आन्कान निछा अप्फिया,
आन्कान काफा रात्खामि अर्खिप्पस खोन्कि आम्को आम्खिम्दा कातुप साम्भुङ्ओ निकिना ओ।
३ आन्पापा निनाम्हाङ खोन्कि हाङ्पा येसु ख्रिस्तआ खानानिन सोमातुक्मा खोन्कि सेवाङ्नि ऩप़न्ने।
फिलेमोन्ओ अ़सोम्तुक्मा खोन्कि अ़साकोङ्छ़ङ
४ फिलेमोन निछा,
अ़ङ्का देम्खा यामात्ङा,
मोन्हिदा खाना मित्नाकिना अ़ङ्का अ़ङ्निनाम्हाङ अ़धुन आलाङ प़ङ।
५ देकिनालो निनाम्हाङ्ओ अ़म़नाचिएदा आम्सोम्तुक्मा खोन्कि हाङ्पा येसुएदा आम्साकोङ्छ़ङ याक्याङ्ओ एनुङ्योङ।
६ साकोङ्छ़ङ कामुचिएनान यावायोक त़मुकि आन्कान येसु ख्रिस्तदाङ्का तोक्तुम्ओ झारा अ़नुवाक य़ङ्चि खाना नुलोक तुप्मा त़ऱने निकिना यामात्ङा।
७ निछा ओ,
खानाआ सोमात़तुक्तुचिओसा ब़द्धे अ़ङ्ऩङानुवायुङ्सा खोन्कि ब़द्धे अ़ङ्सोम सुवायुङ्सा,
देकिनालो खानाआ निनाम्हाङ्ओ अ़म़नाचिओ अ़चुसाकोङ्वा चानुलो त़मेत्तुप़युङ्सुचि।
ओनेसिमस्ओ निकि छुक फाङ्मा
८ खोवात्निओसा ख्रिस्तआ अ़ङ्का ऩपुवाङ्ओ अ़धिवा राक्आ खाना दि मुमादोत्नि लोमाछाङ ऱनाओ,
९-१० मेन सोमातुक्नाओसा मोवात्नि मान्लोमाङ खानाएदा छुक फाङ्ङाङा।
हान अ़ङ्का पावल खोक्पा म़ना खोन्कि आइमित येसु ख्रिस्तओ निकि छेक्ताङ्ओ म़ना लिसाङ्कि ओनेसिमस्ओ निकि खानाएदा छुक फाङ्ङाङा।
अ़ङ्का छेक्खाखिम्दा युङाङ्याङ्हिदा खो येसुएदा साकोङ्छ़ङ मुमेत्तुङ्कि अ़ङ्छावात्नि मुङ्युङ्सुङ।
११ खोक्को बुया आम्को निकि काचि मात्द़ङ्ओ लिसाओ,
मेन आइमित खाना खोन्कि अ़ङ्का ह़वाङ्माङ्सोओ निकि काचि मुमा काऱ लिसायुङ्सा।
१२ अ़ङ्का खोक्को खानाएदा लासुङ्बाइसुङ्योङ।
खोक्को अ़ङ्चोवाओ अ़धाङ्ङा ओ।
१३ नुय़ङ्खान खालुवाङ्ओसा अ़ङ्का छेक्खाखिम्दा छेक्ङाङाहिदा ओन आम्फान्दा खोक्कोङा अ़ङ्काएनान युङ्माकि अ़ङ्का काफा मुमानि मिनाङ।
१४ मेन खाना मान्काङ्माङ ओवात्नि च़मा नुलोक मान्लुङा,
देकिनालो खाना अ़नुवाक काचि मुमा राकाङ्थेत्नि अ़लिनिन्ने,
मेन आम्ताकावा लिने।
१५ खो अ़क्चित्तारिओ निकि खानादाङ्का फेआन्चिन्ओ मेन मोवात्निओसा खो अ़धुन आम्म़ना मुमा निकि निनाम्हाङ्ओ अ़चुमित्चिऩङ याआङा हे?
१६ खाना खोक्को आम्सोमात़तुक्तुङुओ आम्निछावा त़मित्तुओसा हान खोक्को हारुक ना माआङ मेन हारुक्दाङ्का अ़नुवाक म़ना ओ।
खोक्को अ़ङ्को निकि ओन ब़द्धे अ़ङ्सोम्तुक्लो मुयाङ्नालो खो आम्म़नानि त़मित्तुङुहिदा खोन्कि येसुएदा अ़क्नि साकोङ्छ़ङ कामु निछानि त़मित्तुङुहिदा देम ब़द्धे खाना सोमात़तुक्तुङु हे?
१७ खोत्निओसा अ़ङ्का आम्यावानि त़मित्ङानालो अ़ङ्का त़लोक्ङावात्नि ओनेसिमस्छाङ लोउ।
१८ खोसाआ फिसुयुङ्सुनालो माङ्लो छोन्मादोत्याङ्ओ अ़नाक युङ्याङ्नालो अ़ङ्ऩङ्दा पाक्निप़नि।
१९ अ़ङ्का पावल अ़ङ्छुक्आ छाप्तुङ्कि हिप्नाङ्ना,
मो अ़नाक अ़ङ्काङा छोरुङ।
मेन खानाआ देत्नि अ़ऩङ्वा ह़ङ्म़ङ त़तोक्तुओ,
मो मान्मान्केदो।
२० खाना अ़ङ्निछा त़लिसाओसा अ़ङ्का लोनाओ ओ य़ङ मेत्निप़नि खोन्कि ख्रिस्तदा अ़ङ्को अ़ङ्साकोङ्वा सेवाङ्नि लिने।
२१ अ़ङ्का लोनिओ खाना त़मेत्निप़नि खोन्कि हान च़लोक्छाङ त़मेत्निप़निनि सोम्कुवा मुयाङ्सा ओ छाप्लावा छाप्तुङ्योङ।
२२ खोन्कि अ़ङ्को निकि युङ्खाछाङ तोङ्निप़नि।
निनाम्हाङ्आ आम्नुओ यामात्मा अ़एन्कि अ़ङ्का खानानिन्एदा बान्मा तोक्तुङ्नेनिओ तामित्मा मुङाङा।
२३ येसु ख्रिस्तओ निकि अ़ङ्काएनान छेक्याङ्ओ इपाफ्रास्आ खानानिन सेवा ऩमेत्तिन्येन।
२४ अ़ङ्काएनान काचि कामुचि मर्कुस,
अरिस्तार्खस,
देमास खोन्कि लुकाओछाङ अ़चुसेवानि।
२५ हाङ्पा येसु ख्रिस्तओ अ़चुसोम्तुक्मा खानानिन्एदा युङ्ने।