Ada cerita sujati uli Cakepan Sucine unduk Hyang Yesus kaukum mati.

Disubane Hyang Yesus kaadilin laut nerima ukuman mati, ditu lantas Hyang Yesus kaaba ka bukite di sisin kota, wawengkon gumi Yahudine. Jam sia semengan, di bukite ento, lima lan batis Hyang Yesuse kapacek di kayu salibe.

Nah, di bukite ento anake ane ngliwat-ngliwat ditu ada ane ngomong kene, "Yen sajan ragane Putran Sang Hyang Tunggal, tuwun ja uli kayu salibe ento."

Ditu masi ada para pamimpin agama lan para guru agama Yahudine, ada ane ngraos kene, "Ia ngaku Putran Sang Hyang Tunggal, depang ja apang Sang Hyang Tunggal nyelamatang ia, yen saja ia Putran Sang Hyang Tunggal." Keto para pamimpin agama lan para guru agama Yahudine matbat Hyang Yesus.

Nah, kacerita jani, jam roras tengaine, gumine dadi peteng dedet kanti jam telu sanjane. Laut Hyang Yesus nyerahang raga teken Sang Hyang Tunggal, lantas mati. Ritatkala Hyang Yesus mati, ditu lantas ada linuh gede pesan, tanah lan bukite pada engkag. Nah ditu ada pamimpin prajurite nyaksiang paundukane ento, saha ngomong, “Sujatine anake puniki Putran Sang Hyang Tunggal.”

Kacerita jani, sanjane, ada anak sugih ane suba pracaya teken Hyang Yesus ngidih sawan Hyang Yesuse teken gubernure. Lan gubernure ngisinin pangideh anake sugih ento. Laut sawan Hyang Yesuse kaambil, kagulung aji kasa putih kedas. Anake ane sugih ento ngelah kuburan anyar di bukit batu ane suba kapongpong dadi gua. Nah, di kuburan gua ane anyar ento, ditu sawan Hyang Yesuse kaejang. Ditu lantas kuburan guane ento katekepin aji batu ane gede pesan, laut anake sugih ento mulih.