Ada cerita sujati uli Cakepan Sucine unduk Hyang Yesus kaadilin.

Disubane Hyang Yesus ngidupin anake ane suba mati ane madan Lazarus, ditu liu pesan anake pracaya tekening Hyang Yesus. Nanging para pamimpin agama Yahudine mapineh, anake liu ento bakal nadiang Hyang Yesus raja. Ento mawinan para pamimpin agama Yahudine, takut wangsa Yahudine kaenyagang olih pamerintahan Roma, ane nyajah wangsa Yahudine krana katuduh dadi pamberontak. Ditu lantas para pamimpin agama Yahudine ngae daya bakal ngamatiang Hyang Yesus.

Nah kacerita jani, Hyang Yesus lan murid-muridne luas ka kota wawengkon gumin Yahudine. Di tengah jalan, Hyang Yesus ngraos kene, “Di kotane ento, utusan Sang Hyang Tunggal bakal kasiksa lan kamatiang. Nanging bin puane bakal idup buin.”

Nah kacerita jani, Hyang Yesus lan murid-muridne suba neked di kotane ento. Disubane enem dina di kotane ento, di dina petenge Hyang Yesus kaejuk oleh utusan para pamimpin agamane. Ritatkala ditu, murid-murid Hyang Yesuse malaib ngalain Hyang Yesus.

Petenge ento, Hyang Yesus kaadilin di pangadilan agamane. Di pangadilan agamane ento, para pamimpin agamane ane suba ngadilin Hyang Yesus, ngeka daya apange Hyang Yesus kaukum mati.

Kacerita jani, disubane semeng Hyang Yesus kaaba ka gubernure apanga Hyang Yesus kaukum mati. Diarepan gubernure, Hyang Yesus katuduh ane tidong-tidong, nanging Hyang Yesus mendep, tusing masaut apa-apa. Nyaksiang paundukane ento, gubernure ngon lan ngutsahayang mebasang Hyang Yesus. Ditu lantas gubernure matakon teken anake liu, "Apa ane patut tiang laksanayang tekenin Yesus nenenan?"

Laut anake liu ento masuriak, "Matiangja Yesus! Matiangja Yesus!"

Laut gubernure ento buin matakon, "Apake pelih anake ene?"

Anake liu ento uyut lan masuriak, "Matiangja Yesus! Matiangja Yesus!"

Nyaksiang paundukane ane uyut ento, gubernure laut mutusin apanga Hyang Yesus kaukum mati.