Ada cerita sujati uli Cakepan Sucine unduk Hyang Yesus ngidupin anake ane suba mati.

Di negara Yahudi, ada anak muani ane madan Lazarus. Ia manyama ngajak ni Marta. Mekedua anake ene matimpal luwung ngajak Hyang Yesus.

Nah kacerita, tandina Lazarus sedek gelem keras. Ditu lantas Marta, ngabarin Hyang Yesus unduk Lazarus gelem. Dugase ento, Hyang Yesus sedek ada di desa ane lenan. Ningehang paundukan Lazarus gelem, Hyang Yesus nu di desane ento buin kapuan. Disubane kapuan, Hyang Yesus laut ngajakin murid-muridne lan ngomong kene, "Lazarus suba mati, lan jani kemu ka umahne Lazarus!"

Nah kacerita jani, disubane Hyang Yesus lan murid-muridne paek di umahne Lazarus, katemu lantas ngajak Marta. Laut Marta ngomong kene, “Yening ida wenten driki ritatkala Lazarus sungkan, sinah ipun nenten ja padem.”

Laut Hyang Yesus ngomong kene, "Lazarus bakal idup buin. Lan nyen ja percaya kapinin Tiang, ia bakal idup selamin-lamine. Krana Tiang sumber idup lan ngidupin anake ane suba mati. Pracayake ragane teken paundukane ene?"

Laut Marta masaut kene, "Tiang pracaya, wantah ida puniki Sang Prabu sane kajanjiang olih Sang Hyang Tunggal."

Nah kacerita jani, Hyang Yesus suba neked di kuburan Lazaruse kabarengin anake liu. Lazarus kakubur di bukit batu ane kapompong dadi gua, katekepin aji batu. Bangken Lazaruse suba petang dina di kuburane lan suba mebo keras. Yadiastun suba mebo, Hyang Yesus nunden mukak batu panekep guane ento. Laut Hyang Yesus ngastawa kene, "Sang Hyang Tunggal, Ajin Titiang, Titiang ngaturan panyuksema turmaning ngastawa sapuniki, mangdane anake akeh puniki pracaya wantah Titiang utusan Aji." Disubane ngastawa, laut Hyang Yesus majeritan, "Lazarus, pesu ja!" Laut Lazarus pesu uli guane ento.

Nah nyaksiang paundukane ento, anake liu ane ada ditu pracaya tekenin Hyang Yesus. Nanging uli paundukane ento para pamimpin Yahudine sepakat bakal ngamatiang Hyang Yesus.