Ada cerita sujati uli Cakepan Sucine unduk Hyang Yesus ngubadin anak lumpuh.

Di subane Hyang Yesus ngubadin anak ane karasukin roh ja'at, laut Hyang Yesus lan murid-muridne nyeberang Danu Galilea mulih ka desa. Di desane ento, suba liu ada anak lan ada masi guru-guru agama Yahudine ditu. Nah keto masi, ada anak ane ngaba anak lumpuh kemu. Anake ento suba ngelah kapracayaan teken Hyang Yesus bisa ngubadin anake sakit. Keto masi, Hyang Yesus nawang anake ento ngelah kapracayaan teken ragane. Laut Hyang Yesus ngomong tekenin anake lumpuh ento, “Jero, dosan ragane suba kaampurayang.”

Nah ditu lantas guru-guru agama Yahudine melihang Hyang Yesus di kenehne kene, “Adi aneke ene matuhang raga teken Sang Hyang Tunggal? Krana wantah Sang Hyang Tunggal sane sida ngampurayang dosa.”

Nanging Hyang Yesus nawang apa isin keneh guru-guru agama Yahudine ento. Laut Hyang Yesus ngomong, “Nguda ragane ngelah keneh ane jele kapinin tiang? Tiang bakal muktiang tiang ngelah kuasa ngampurayang dosa di gumine ene.”

Laut Hyang Yesus ngraos tekening anake ane lumpuh ento kene, “Jero, bangun ja jerone, gulung tikehe, laut mulih.” Nah, ditu lantas anake ane lumpuh ento bangun laut ngulung tikehne luas ngamulihang.

Liu anake ditu nyaksiang paundukan ento pada ngon lan ngluihang Sang Hyang Tunggal.