Ada cerita sujati uli Cakepan Sucine unduk Hyang Yesus idup buin.

Disubane sawan Hyang Yesuse kakubur di kuburan gua ane anyar, bin puane, di dina Redite semengan, ada anak luh ane suba pracaya teken Hyang Yesus kemu ka kuburane ento. Anake ento bakal ngaminyakin sawan Hyang Yesuse nganggon lengis ane miyik, sekadi pula-pali anak Yahudine.

Di subane anake luh ento neked di kuburan, dapetanga guane ento suba mabukak. Ditu lantas anake luh ento ngenggalang ngalih murid-murid Hyang Yesuse.

Disubane neked sid murid-murid Hyang Yesuse, ditu lantas anake luh ento kacunduk ngajak Dane Petrus lan Dane Yohanes. Laut anake luh ento nyeritayang unduk sawan Hyang Yesuse suba ilang. Ningeh paundukane ento, Dane Petrus lan Dane Yohanes malaib-laiban luas ka kuburane ento.

Disuba neked di kuburan, laut Dane Petrus macelep ke tengah kuburan goane ento, dapetanga kain pangaput sawan Hyang Yesuse suba di tanahe. Laut Dane Yohanes pada macelep ka tengah kuburan guane ento. Nyaksiang paundukane ento, laut Dane Yohanes pracaya tuah Hyang Yesus idup buin buka jati mula. Di subane keto, laut Dane Petrus lan Dane Yohanes luas ngamulihang.

Nah kacerita jani, di dina peteng murid-murid Hyang Yesus mapunduh di kamare ane makunci krana jejeh teken para pamimpin agama Yahudine. Tatkala murid-muride di tengah kamare ane makunci ento, tandumade majujuk Hyang Yesus di arepan para muride. Laut Hyang Yesus nunjukin lima lan batisne ane matatu, muktiang tuah ragane hidup buin buka jati mula.

Keto masi, petang dasa dina makelone, Hyang Yesus sesai ngedengang raga kepinin murid-muridne muktiyang ragane idup. Lantas, Hyang Yesus ngraos kene, “Cening lakar nerima kuasa saking Roh Sang Hyang Tunggal apanga cening dadi saksi di gumine ene.” Lantas Hyang Yesus ka swarga sing ada len tongos Sang Hyang Tunggale.

Nah keto lantas, para murid luas ke kota ngantosang kuasan Roh Sang Hyang Tunggal.