Ada cerita sujati uli Cakepan Sucine unduk Hyang Yesus kagoda teken ratun buta kalane.

Disubane Hyang Yesus kalukat, Hyang Yesus kakuasain olih Roh Sang Hyang Tunggal.

Ditu lantas Roh Sang Hyang Tunggal nuntun Hyang Yesus ka karang embang ane linggah buina tuh gersang, keto masi joh teken desa.

Di tongose ento, Hyang Yesus kagoda tekenin Ratun buta kalane, kanti petang dasa dina mekelone. Petang dasa dinane ento, Hyang Yesus tusing ngajeng apa-apa, laut Hyang Yesus seduk.

Ditu lantas Ratun buta kalane ngraos tekening Hyang Yesus kene, “Yening sujati Ragane Putra Tunggal Sang Hyang Tunggal, dadiangja batu ene ajengan!” Sakewala Hyang Yesus masaut kene, “Tusing patut buka keto, krana ada sabda uli Cakepan Sucine, ‘Manusane tusing ja idup ulian ajengan dogen, nanging uli sekancan sabdan Sang Hyang Tunggale.’”

Laut Ratun buta kalane ngajak Hyang Yesus ka muncuk gununge ane tegeh. Di muncuk gununge ento, Ratun buta kalane ngedengin sekancan kerajaan gumine, lan ngomong kene, “Saluwirin kaagungan lan kaluwihan jagi serahang tiang teken Ragane, yening Ragane nyembah tiang.” Nanging Hyang Yesus ngraos, “Tusing ja patut buka keto, krana ada sabda uli Cakepan Sucine, ‘Kita patut nyembah Sang Hyang Tunggal dogen.’”

Laut Ratun buta kalane ngajak Hyang Yesus ka tongos utama anak Yahudine mabakti tekenin Sang Hyang Tunggal.

Di duur enebe, Ratun buta kalane ngraos buin tekenin Hyang Yesus kene, “Yaning saja Ragane Putra Tunggal Sang Hyang Tunggal, macebur ja uli duur enebe, krana ada sabda uli Cakepan Sucine, ‘Malaekate bakal nulungin ragane apang tusing sengkala.’” Sakewala Hyang Yesus masaut kene, “Tusing patut buka keto, krana ada sabda uli Cakepan Sucine, ‘Eda ja kita mintonin Sang Hyang Tunggal sasembahan kitane.’”

Nah ditu lantas Ratun buta kalane magedi ngalahin Hyang Yesus. Sakewala ia ngalih galah ane luung bakal buin ngoda Hyang Yesus.