Ada cerita sujati uli Cakepan Sucine unduk Hyang Yesus kalukat.

Tatkala Hyang Yesus mayusa telung dasa tiban, ditu ada anak muani madan Yohanes.

Dane Yohanes nongos di karang embang ane linggah buina tuh gersang, keto masi joh teken desa.

Nah kacerita jani, di tukad Yordane ditu ada sentanan-sentanan Abrahame. Ditu Dane Yohanes ngajahin anake liu ento buka kene, “Eh tobat ja ragane uli tingkah ane madosa, krana Sang Prabu sane kajanjiang olih Sang Hyang Tunggal jagi gelis rauh mamerintah.”

Ditu lantas anake liu ento tobat, nyerahang raga kalukat olih Dane Yohanes. Nah, uli anake liu ento ada ane matakon kene, "Napike ragane puniki Sang Prabu sane kajanjiang olih Sang Hyang Tunggal?" Keto pitakon anake ento. Laut Dane Yohanes masaut kene, “Tiang nglukat ragane nganggon yeh. Nanging Sang Prabu sane jagi rauh punika maduwe kuasa luwihin kapinin tiang. Ida jagi nglukat ragane nganggen Roh Sang Hyang Tunggal lan api."

Dugase ento, laut teka Hyang Yesus apange kalukat tekenin Dane Yohanes. Sakewala Dane Yohanes tusing misadia nglukat Hyang Yesus laut ngraos buka kene, “Sujatine titiang sane patut tobat lan kalukat olih I Ratu." Keto raos Dane Yohanes. Laut Hyang Yesus masaut, “Depang ja majalan buka kene, mangdane arsan Sang Hyang Tunggal sane mamargi.” Laut Dane Yohanes nglukat Hyang Yesus.

Risedek Hyang Yesus matangi uli yehe, langite mabukak. Roh Sang Hyang Tunggal tedun uli langite, marupa kedis dara ngencegin Hyang Yesus. Laut Sang Hyang Tunggal masabda kene, “Ene Putran Nirane ane Tunggal, ane Nira sayangin. Ring Anake ene Nira ledang.”