Ada cerita sujati uli Cakepan Sucine unduk Hyang Yesus neduhang angin linus di tengah danune.

Hyang Yesus ene wantah guru ane ngajahin kapatutan unduk Sang Hyang Tunggal. Ritatkala Hyang Yesus ngajahin, liu pesan anake madingehang Hyang Yesus. Uli anake liu ento, Hyang Yesus ngamilih aroras ane kadadiang murid ane setata marengin Hyang Yesus.

Tandina, Hyang Yesus ngaukin aroras murid-muridne laut ngraos kene, "Lan ja jani nyebrang Danu Galileane." Laut murid-muridne marengin Hyang Yesus nyeberang danune ento ane linggahne sawatara solas kilo.

Kacerita jani, suba di tengah danune. Di tengah danune ento, Hyang Yesus sirep leplep. Ritatkala Hyang Yesus sirep leplep, tandumade ada angin nglinus dadi ombak gede pesan. Yeh danune nglencok das ngabekin prahune. Ditu lantas murid-murid Hyang Yesuse pada jejeh laut makaukan mangunin Hyang Yesus, “Guru! Guru! Iraga tambis-tambis kleb!” Ditu lantas, Hyang Yesus bangun laut namprat ombak lan angin linuse ento. Nah, ombak lan angin linuse ento laut dedeh.

Ditu lantas Hyang Yesus ngomong kene, “Nguda ja ragane tusing pracaya teken tiang?” Ditu lantas murid-muride ngon lan jejeh nyaksiang paundukan ento, terus ngraos, “Sujatine anake puniki anak sakti. Ombak lan angin jerih kapinin ragane.”