Ada cerita sujati uli Cakepan Suci unduk Sang Hyang Tunggal mintonin dane Abraham.

Disubane pianak dane Abrahame kelih, ditu lantas Sang Hyang Tunggal masabda ken dane Abraham kene, "Eh Abraham."

Laut dane Abraham masaut, "Inggih, Ratun titiang".

Laut Sang Hyang Tunggal masabda, "Kemu ja cai, ka gununge ane lakar Nira pitujuhin. Ajak ja panak caine ane tunggal, ane cai sayangin. Aturang ia dadi aturan maborbor di gununge ento."

Laut, buin mani semengane, dane Abraham nyiapin sekancan kaperluan danene tur mituduhin adadua parekan danene apanga nyarengin dane.

Enggalang cerita, disubane dane ningalin gununge ento, lantas dane ngraos ken parekan danene kene, "Nongos ja ragane dini. Tiang ngajak panak tiange bakal kemu ka gununge ento, ngaturang bakti ring Sang Hyang Tunggal. Disubane keto tiang bakal mabalik buin mai ajak panak tiange."

Nah laut dane Abraham lan pianak danene majalan nuju gununge ento. Di tengahin jalan, pianak danene ngraos kene, "Api lan saang sampun wenten. Ring dijake panak dombane?"

Laut Abraham nyautin, "Sang Hyang Tunggal jagi nyediayang."

Nah enggalang cerita, dane Abraham suba ada di gununge ento. Ditu dane nyujukang tugu nganggon batu, kaisinin saang di duur tugune ento. Lantas dane negul pianak danene di duur saange ento saha nyemak tiuk kal ngorok pianak danene. Tandumade Sang Hyang Tunggal masabda kene, "Wih Abraham, eda ja kudiang-kudianga panak kitane ento."

Ditu dane Abraham ningalin ada domba nyangket di bet-bete. Laut dane ngejuk dombane ento lan ngaturang di tugune ngantinin pianak danene. Lantas dane ngadanin tongose ento "Sang Hyang Tunggal nyediayang."

Nah, ditu lantas Sang Hyang Tunggal buin masabda kene, "Sawireh cai satya kapinin Nira, jani Nira bakal nglaksanayang sekancan semayan Nirane. Nira bakal nadiang cai bangsa ane gede. Turmaning uling cai, Nira bakal ngemang wara nugraha sid seluwirin bangsa di jagate."