Ada cerita uli Cakepan Sucine unduk Sang Hyang Tunggal majanji ngemertanin dane Abraham.

Disubane I Kain ngejohang dewek uling Sang Hyang Tunggal, manusane ngangsan ngliunan di jagate. Uling anake liu ento, ada adiri ane madan "Abraham." Tatkala dane Abraham maumur pitung dasa lima tiban, ditu lantas Sang Hyang Tunggal masabda teken dane Abraham kene, "Luas ja cai ka negara ane Nira patujuhin. Nira bakal nadiang cai bangsa ane gede. Adan caine bakal kasub. Turmaning uling cai, Nira bakal ngemaang wara nugraha sid sekancan bangsa di jagate." Laut dane Abraham lan kurenan danene majalan ka negara ane kapituduhin olih Sang Hyang Tunggal.

Nah kacerita jani, dane Abraham suba mekelo di negara ane kapituduhin olih Sang Hyang Tunggal. Ditu dane suba liu ngelah arta brana, nanging tonden ngelah pianak. Yadiastun dane Abraham tonden ngelah pianak, dane tetep pracaya teken Sang Hyang Tunggal lakar ngemaang pianak. Ento mekada Sang Hyang Tunggal nerima kapracayaan Abrahame, saha Sang Hyang Tunggal nadiang Abraham anak ane patut.

Disubane Abraham suba maumur sia dasa sia tiban, ada tamiu nekain dane, saha metakon, "Dijake kurenan caine?"

Laut dane nyautin, "Ipun ring jeroan tendane."

Buin tamiune ento ngraos, "Buin atiban, kurenan caine Sara bakal nglekadang pianak muani."

Ningehang paundukane ento, Sara kedek saha ngomong di kenehne, "Sajake tiang bakal nglekadang pianak? Sawireh tiang suba maumur sia dasa tiban tur suba layu; keto mase kurenan tiange suba tua."

Sujatine tamiune ento sing ada len wantah Sang Hyang Tunggal. Lan Ida laut masabda, "Nguda kurenan caine kedek? Sujati tusing ja ada ane keweh di arepan Nirane."

Nah enggalang cerita, disubane atiban, Sara nglekadang pianak muani buka janjin Sang Hyang Tunggale. Lan dane Abraham ngadanin pianakne ento "Ishak."