Ada carita sujati uli Cakepan Sucine unduk manusane kaukum olih Sang Hyang Tunggal.

Disubane manusane ento ngenaar buah ane kalarang olih Sang Hyang Tunggal, laut Sang Hyang Tunggal rauh ring taman Eden. Dugase ento manusane ningehang klesegan Sang Hyang Tunggale, laut ia makedua ngengkebang raga. Ditu lantas Sang Hyang Tunggal mesabda, "ih Adam dijake kita?"

Raris Adam Matur kene, "Titiang nyilibang raga sawireh titiang takut, krana dewek titiange malalung."

Laut Sang Hyang Tunggal buin mesabda, "Nyen ngorahin kita malalung? Adake kita na'ar buah ane Nira larang ento?"

Laut Adam matur, "Anake istri sane IRatu genahang ring sisin titiange, ipun sane ngewehin titiang wohan puniki, raris titiang nunas."

Ditu lantas Sang Hyang Tunggal mesabda tekenin anake luh punika, "Ngudiang nyai melaksana buka kene?"

Anake luh punika laut matur kepinin Sang Hyang Tunggal, “I lelipi sane wenten ring tamane puniki, ipun mobabin titiang raris titiang nunas wohane punika."

Krana mobabin manusa, Sang Hyang Tunggal laut mastu I lelipi, "Cai kapastu dadi beburon ane paling nista ring seluwirin beburone. Katurunan anake luh ene bakal ngencak tendas caine, lan cai bakal ngenyagang tunggak batis katurunan anake luh ento."

keto masih teken anake ane muani, Sang Hyang Tunggal mesabda sekadi puniki, "Uling jani tanahe kapastu krana kita nglanggar titah Nirane. Kita bakal keweh ngalih rezeki, krana tanahe ene bakal ngasilang bet lan ketket. Mapeluh kita ngalih pengupa jiwa kanti kita mabalik dadi tanah buin, krana uli tanah kita kakardi."

Ditu lantas Sang Hyang Tunggal ngae penganggo malakar baan kulit beburon, kabaang imanusane. Laut Sang Hyang Tunggal ngulah imanusa uling tamane ento. apange manusane ento tusing mabalik ke tamane ento bakal ngalap buah pepunyanan kehidupan ane ngemaang idup selamen-lamennyane.