Wenten cerita sujati saking Cakepan Sucine indik Hyang Yesus kaukum padem.

Risampune Hyang Yesus kaadilin tur nerima hukuman padem, rika raris Hyang Yesus kabakta ka bukit ring sisin kota, wewekon jagat Yahudine. Jam sia semengan ring bukite punika, tangan lan cokor Hyang Yesuse kapacek ring taru salibe. Nah, ring bukite punika anake akeh sane liwat drika, wenten sane ngraos sapuniki, "Yen saja ragane Putran Sang Hyang Tunggal, tuwun ja uli kayu salibe ento."

Nah, drika pada wenten para pamimpin agamane lan para guru agama Yahudine, wenten sane ngraos sekadi puniki, "Ia ngaku Putran Sang Hyang Tunggal, depang ja apang Sang Hyang Tunggal nyelamatang ia, yen saja ia Putran Sang Hyang Tunggal." Kenten para pamimpin agama lan para guru agama Yahudine matbat Hyang Yesus.

Nah, kacerita mangkin, jam roras tengaine, gumine dados peteng dedet kantos jam telu nyoreang. Raris Hyang Yesus nyerahang dewek ring Sang Hyang Tunggal, raris padem. Risedek Hyang Yesus padem, rika raris wenten linuh ageng pisan, tanah lan bukite pada engkag. Nah irika wenten pamimpin prajurite nyaksiang paindikane punika, saha ngraos, “Sujatine anake puniki Putran Sang Hyang Tunggal.”

Kacerita mangkin, sorene, wenten anak sugih sane sampun pracaya ring Hyang Yesus nunas sawan Hyang Yesuse ring gebernure. Lan gubernure ngisinin pinunas anake sugih punika. Raris sawan Hyang Yesuse kaambil, kagulung nganggen kasa putih kedas. Anak sugihe punika, maduwe kuburan anyar ring bukit batune sane sampun kapompong kadadosang gua. Nah, ring kuburan gua sane anyar punika, rika sawan Hyang Yesuse kagenahang. Rika raris kuburan guane punika katekepin nganggen batu sane ageng pisan, raris anake sugih punika budal.