Wenten cerita sujati saking Cakepan Sucine indik Hyang Yesus kaadilin.

Risampune Hyang Yesus nguripin anake sane sampun padem, sane mawasta Lazarus, rika akeh pisan anake pracaya ring Hyang Yesus. Nanging para pamimpin agama Yahudine mapineh, anake akeh punika jagi nadosang Hyang Yesus Raja. Punika mawinan para pamimpin agama Yahudine punika ajerih wangsa Yahudine kaenyagang olih pamerintahan Roma, sane nyajah wangsa Yahudine krana katuduh dados pambrontak. Rika raris para pamimpin agama Yahudine sepakat jagi ngamademang Hyang Yesus.

Nah kacerita mangkin, Hyang Yesus lan para sisianne luas ka kota wewengkon jagat Yahudine. Ring tengah margine, Hyang Yesus ngandika sapuniki, “Di kotane ento, utusan Sang Hyang Tunggal bakal kasiksa lan kamatiang. Nanging bin puane bakal idup buin.”

Nah kacerita mangkin, Hyang Yesus lan para sisiane sampun rauh ring kotane punika. Risampune enem rahine ring kotane punika, ring rahine wengine Hyang Yesus kaejuk olih utusan para pamimpin agamane. Risedek punika, para sisian Hyang Yesuse malaib ngalain Hyang Yesus.

Wengine punika, Hyang Yesus kaadilin ring pangadilin agamane. Ring pangadilin agamane punika, para pamimpin agamane sane sampun ngadilin Hyang Yesus, ngeka daya mangda Hyang Yesus kaukum padem.

Kaceritayang mangkin, benjang semengane Hyang Yesus kabakta ring gubernure mangda Hyang Yesus kaukum padem. Ring arepan gubernure Hyang Yesus katuduh sane boya-boya nanging Hyang Yesus meneng, nenten masaur napi-napi. Nyaksiang paindikane punika, gubernure angob lan ngutsahayang mebasang Hyang Yesus. Irika raris gubernure mataken ring anake akeh, “Apa ane patut tiang laksanayang tekenin Yesus nenenan?”

Raris anake akeh punika masuriak, “Matiang ja Yesus! Matiang ja Yesus!”

Raris gubernure punika malih mataken, “Apake pelih anake ene?”

Anake akeh punika ewa lan masuriak, “Matiang ja Yesus! Matiang ja Yesus!”

Nyaksiang paindikane sane ewa punika, gubernure raris mutusin mangda Hyang Yesus kaukum padem.