Wenten cerita sujati saking Cakepan Sucine indik Hyang Yesus nguripin anake sane sampun padem.

Ring negara Yahudi, wenten anak lanang sane mawasta Lazarus. Ipun masemeton sareng Ni Marta. Makakalih anake puniki maswitra becik sareng Hyang Yesus. Nah kacerita, tandina Lazarus sedek sungkan kras. Rika raris Marta, ngabarin Hyang Yesus indik Lazarus sungkan. Risedek punika, Hyang Yesus sedek wenten ring desa sane tiosan. Mirengin paindikan Lazarus sungkan, Hyang Yesus kari ring desa punika malih kapuan. Risampune kapuan, Hyang Yesus raris ngamanggil para sisiane tumuli ngandika sekadi puniki, “Lazarus suba mati, lan jani kemu ka umahne Lazarus!”

Nah kacerita mangkin, risampune Hyang Yesus lan para sisiane nampek ring genah Lazarus, kacunduk raris sareng Marta. Raris Marta matur sekadi puniki, “Yaning ida wenten driki tatkala Lazarus sungkan, sinah ipun nenten ja padem.”

Raris Hyang Yesus ngandika sapuniki, “Lazarus bakal idup buin. Lan nyen ja pracaya kapinin Tiang, ia bakal idup selamin-lamine. Krana Tiang sumber idup lan ngidupin anake sane suba mati. Pracayake ragane teken paundukane ene?”

Raris Marta masaur sapuniki, “Tiang pracaya, wantah ida Sang Prabu sane kajanjiang olih Sang Hyang Tunggal.”

Nah kacerita mangkin, Hyang Yesus sampun rauh ring kuburan Lazaruse kasarengin anake akeh. Lazarus kapendem ring bukit batu sane kapompong dados gua katekepin nganggen batu. Sawan Lazaruse sampun petang rahina ring semane lan sampun mebo keras. Yadiastun sampun mebo, Hyang Yesus nunden mukak batu panekep guane punika.

Raris Hyang Yesus ngastawa sapuniki, "Sang Hyang Tunggal, Ajin Titiang, Titiang ngaturang panyuksema turmaning ngastawa sapuniki, mangdane anake akeh puniki pracaya wantah Titiang utusan Aji." Risampune ngastawa, raris Hyang Yesus majeritan, “Lazarus, pesu ja!” Raris Lazarus metu saking guane punika.

Nah, nyaksiang paindikane punika, anake akeh sane wenten rika pracaya ring Hyang Yesus. Nanging saking paindikane punika, para pamimpin Yahudine sepakat jagi ngamademang Hyang Yesus.